སངས་རྒྱས་བཅོམ་ལྡན་འདས་དེ་དག་ཀྱང་དེ་ལ་ཕྱག་རྐྱོང་བར་མཛད་ཅིང་འདི་སྐད་དུ། ཀྱེ་ཡོན་ཏན་གྱིས་ཕྱུག་པ་དག་ཚུར་ཤོག །ངེད་ཀྱི་སངས་རྒྱས་ཀྱི་ཞིང་ཡོངས་སུ་དག་པར་གནས་པར་གྱིས་ཤིག །དེང་ངེད་ཀྱིས་ཁྱོད་ས་བཅུ་དག་ལ་གཞག་པར་བྱའོ་ཞེས་ཀྱང་གསུང་བར་མཛད་དོ། །དེ་སངས་རྒྱས་མཐོང་བའི་དགའ་བ་དང་། མཆོག་ཏུ་དགའ་བ་དང་། དད་པ་འཕགས་པ་དེས་འཆི་བའི་དུས་བྱས་ནས་ཀྱང་སངས་རྒྱས་ཀྱི་ཞིང་སྟོང་པ་མ་ཡིན་པ་དག་ཏུ་སྐྱེ་བར་འགྱུར་ཞིང་དེ་དེར་ཡང་ས་བཅུ་དག་ཐོབ་པར་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། རིག་སྔགས་ཀྱི་རྟེན་ལུང་སྟོན་པ་ཆེན་པོ་འདི་ནི་སེམས་ཅན་རྣམས་ཀྱི་ལས་ཟད་པར་བྱ་བ་དང་། རྣམ་པར་དག་པ་ཐོབ་པར་བྱ་བ་དང་། བྱང་གྲོལ་གྱི་བདེ་བ་ཐོབ་པར་བྱ་བའི་ཕྱིར་དེ་ལྟར་དོན་ཆེ་བ་དང་། ཕན་ཡོན་ཆེ་བ་ཡིན་གྱིས་ལོང་ལ་མི་མཇེད་ཀྱི་འཇིག་རྟེན་གྱི་ཁམས་སུ་སོང་ཤིག །ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་ལ་ཞུས་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་སྙིང་པོ་དཔལ་དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དེ་ལྟར་འཚལ་ལགས་སོ། །ཡང་དེའི་ཚེ་འཁོར་དེར་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པས་ཀྱང་ཚིག་འཐུན་པར་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། འདུས་པ་ཆེན་པོ་དེ་ཡང་བལྟ་བ་དང་། ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་བགྱིད་པའི་འོད་ཟེར་གྱི་ལེའུ་སེམས་ཅན་རྣམས་ཀྱི་ལས་བས་པར་འགྱུར་བའི་གཟུངས་སྔགས་ཐོས་པར་འཚལ་ཏེ། བདག་ཅག་ཀྱང་ཏིང་ངེ་འཛིན་གྱི་རྣལ་འབྱོར་ལས་ལངས་ནས་རིང་པོ་མ་ལགས། སྔ་མ་ཡང་ཀུན་ཕྱིན་ལགས་ན་བཙུན་པ་བཅོམ་ལྡན་འདས་འཇིག་རྟེན་གྱི་ཁམས་མི་མཇེད་དེར་བདག་ཅག་ཀྱང་མཆི་བར་གནང་བར་མཛད་པར་གསོལ། དེ་ནས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་འདི་སྐད་ཅེས་བཀའ་སྩལ་ཏོ།