།ཡང་དེའི་ཚེ་འཁོར་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་དག་ལས་ལངས་ནས་རིང་པོ་མ་ལོན་པ་གྲངས་མེད་དཔག་ཏུ་མེད་པ་དག་གིས་ཚིག་འཐུན་པར་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ལ་བལྟ་བ་དང་། ཕྱག་བགྱི་བ་དང་། མཆོད་པ་དང་། བསྙེན་བཀུར་བགྱི་བ་དང་། འདུས་པ་ཆེན་པོ་བལྟ་བ་དང་། ཉི་མའི་སྙིང་པོའི་ཆོས་ཀྱི་རྣམ་གྲངས་སྔོན་ཆད་མ་ཐོས་པ་ཉན་པར་འཚལ་ལགས་ན་བཅོམ་ལྡན་འདས་དེར་བདག་ཅག་མཆི་བར་གནང་བར་མཛད་དུ་གསོལ། དེ་ནས་དེ་བཞིན་གཤེགས་པ་རི་དབང་རྒྱལ་པོ་དེས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཐམས་ཅད་ལྷན་ཅིག་འཐུན་པར་བརྒྱ་བྱིན་གྱི་ཆ་བྱད་དང་། སྤྱོད་ལམ་དང་། རྟགས་དང་། དབྱིབས་དག་དང་། དབང་ཕྱུག་ལ་དབང་བས་དེང་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་ཐམས་ཅད་དང་ལྷན་ཅིག་ཏུ་ཐམས་ཅད་འགྲོགས་ཤིང་འཐུན་པར་བརྒྱ་བྱིན་གྱི་ཆ་བྱད་དང་། སྤྱོད་ལམ་དང་། རྟགས་དང་། དབྱིབས་དག་དང་། དབང་ཕྱུག་ལ་དབང་བར་བདག་ཉིད་མངོན་པར་སྤྲུལ་ནས་བཅོམ་ལྡན་འདས་དེ་བཞིན་གཤེགས་པ་རི་དབང་རྒྱལ་པོའི་ཞབས་གཉིས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ཏེ་དེ་ནས་ཆས་སོ། །དེ་དག་ཡུད་ཙམ་གྱིས་མི་མཇེད་ཀྱི་འཇིག་རྟེན་གྱི་ཁམས་འདིར་ཕྱིན་ཏེ། དེ་དག་ཕྱིན་པའི་མོད་ལ་སངས་རྒྱས་ཀྱི་ཞིང་མི་མཇེད་འདིར་བཅོམ་ལྡན་འདས་ཤཱཀྱ་ཐུབ་པ་དེ་ལ་མཆོད་པའི་ལས་བྱ་བའི་ཕྱིར་སྤོས་ཀྱི་ཆར་ཆེན་པོ་མངོན་པར་རབ་ཏུ་ཕབ་སྟེ། འདི་ལྟ་སྟེ། ཙན་དན་གོར་ཤིར་ཥ་དང་། ཙན་དན་སྦྲུལ་གྱི་སྙིང་པོ་དང་། ཏ་མ་ལའི་འདབ་མ་དང་། ཨ་ག་རུ་དང་། རྒྱ་སྤོས་དང་། དུས་ཀྱི་རྗེས་སུ་འབྲང་བའི་ཙན་དན་གྱི་ཕྱེ་མའི་ཆར་མངོན་པར་རབ་ཏུ་ཕབ་བོ། །དེ་དག་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེར་དོང་སྟེ་ཕྱིན་ནས་ཀྱང་ཐམས་ཅད་བརྒྱ་བྱིན་གྱི་ཆ་བྱད་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །བཅོམ་ལྡན་འདས་ནི་དེའི་བར་དུ་ཡང་རྒྱལ་པོ་གཟུགས་ཅན་སྙིང་པོ་དང་ཐབས་ཅིག་ཆོས་ཀྱིས་གནས་པའི་གཏམ་ཀུན་ཏུ་སྤྱོད་པར་མཛད་དོ།