།དེ་བཞིན་དུ་རང་རང་གི་རྣམ་པ་སྣ་ཚོགས་ཀྱི་མཆོག་ཐམས་ཅད་ཀྱི་བཟོད་པ་དང་། གཟུངས་དང་། ཏིང་ངེ་འཛིན་དག་ལ་མཉམ་པར་གཞག་པ་དག་ཏུ་གྱུར་ཏོ། །ཡང་དེའི་ཚེ་བསོད་ནམས་ཀྱི་སྟོབས་ཇི་ལྟ་བ་བཞིན་དུ་རྒྱུ་འཐུན་པའི་རྒྱུའི་སྟོབས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མཉམ་པར་གཞོག་པ་དེ་དག་དང་། བྱང་ཆུབ་སེམས་དཔའ་ཆེན་པོ་བསམ་གཏན་བྱེད་པ་དེ་དག་ལས་ཁ་ཅིག་གི་ལུས་ལས་འོད་འདི་ལྟ་བུ་བྱུང་སྟེ། དཔེར་ན་མར་མེའི་འོད་ལྟ་བུའོ། །ཁ་ཅིག་གི་ནི་སྐར་མདའ་དང་མཉམ་པ་དག་གོ། །ཁ་ཅིག་གི་ནི་བརྒྱ་བྱིན་དང་མཉམ་པ་དག་གོ། །ཁ་ཅིག་གི་ནི་མི་མཇེད་ཀྱི་བདག་པོ་ཚངས་པ་དང་མཉམ་པ་ནས་ཁ་ཅིག་གི་ནི་ཟླ་བ་དང་མཉམ་པའི་བར་དག་གོ། །ཁ་ཅིག་གི་ནི་ཉི་མ་དང་མཉམ་པ་དག་གོ། །ཁ་ཅིག་གི་ནི་ཉི་མ་གཉིས་དང་མཉམ་པ་དག་གོ། །ཁ་ཅིག་གི་ནི་ཉི་མ་གསུམ་དང་མཉམ་པ་དག་གོ། །ཁ་ཅིག་གི་ནི་ཉི་མ་ལྔ་དང་མཉམ་པ་དག་གོ། །ཁ་ཅིག་གི་ནི་ཉི་མ་སྟོང་དང་མཉམ་པའི་བར་དག་གོ། །ཁ་ཅིག་གི་ནི་ལུས་ལས་ནི་ཉི་མ་བྱེ་བ་བརྒྱ་སྟོང་དང་མཉམ་པའི་འོད་དག་བྱུང་སྟེ། མི་མཇེད་ཀྱི་སངས་རྒྱས་ཀྱི་ཞིང་འདི་ཐམས་ཅད་སྔོན་མ་མཐོང་མ་ཐོས་པའི་སྣང་བ་ཆེན་པོ་རྒྱ་ཆེ་བ་དེ་ལྟ་བུས་འཇིག་རྟེན་ཁྱབ་པར་གྱུར་ཏོ། །དེ་དག་གི་ལུས་ལས་མཆོག་ཏུ་སེམས་ཅན་གཞན་དག་གི་ལུས་དང་སེམས་ཀྱི་བདེ་བ་ལ་རེག་པ་དང་། དགའ་བ་དང་། རབ་ཏུ་ཚིམ་པར་བྱེད་པ། ནད་ཐམས་ཅད་རབ་ཏུ་ཞི་བར་བྱེད་པ། ལྟ་བ་ངན་པ་ཐམས་ཅད་རབ་ཏུ་ཞི་བར་བྱེད་པ། ལུས་ཀྱི་གནས་ངན་ལེན་ཐམས་ཅད་རབ་ཏུ་ཞི་བར་བྱེད་པ། བཀྲེས་པ་དང་སྐོམ་པ་ཐམས་ཅད་རབ་ཏུ་ཞི་བར་བྱེད་པ། འདོད་པ་ཐམས་ཅད་རབ་ཏུ་ཞི་བར་བྱེད་པ། ཁྲོ་བ་ཐམས་ཅད་དང་། འཇིགས་པ་ཐམས་ཅད་དང་། ཉོན་མོངས་པ་དང་། འཆིང་བ་ཐམས་ཅད་རབ་ཏུ་ཞི་བར་བྱེད་པའི་འོད་བྱུང་སྟེ། སངས་རྒྱས་ཀྱི་ཞིང་འདི་ན་སྲིད་པ་གསུམ་གྱི་བཙོན་རའི་སྡུག་བསྔལ་གྱི་འཇིགས་པ་ཐམས་ཅད་ཀྱི་བར་རབ་ཏུ་ཞི་བར་བྱེད་དོ། །དེའི་ཚེ་སངས་རྒྱས་ཀྱི་ཞིང་འདི་ན་སེམས་ཅན་ཐམས་ཅད་སངས་རྒྱས་ལ་འབབ་པ་དག་དང་། ཆོས་ལ་འབབ་པ་དག་དང་། དགེ་འདུན་གྱི་ཡོན་ཏན་ལ་དགའ་བ་ལ་མཁས་པ་དག་འཁོད་པར་གྱུར་ཏོ།