Degé Kangyur volume 66, F.108.a

ཅད་ན་ཕ་རོལ་ཏུ་ཕྱིན་པ་དྲུག་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བསྐལ་པ་བརྒྱས་ངེས་པར་བྱུང་བ་ནས་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ལ་གཞན་གྱི་དྲིང་མི་འཇོག་པའི་ཕྱིར་མི་ལྡོག་པ་སྒྲིབ་པ་མེད་པའི་ཡེ་ཤེས་ལ་མཁས་པའི་བར་འཁོད་པ་དེ་དག་ཐམས་ཅད་སངས་རྒྱས་ཀྱི་ཞིང་མི་མཇེད་འདིར་ཞུགས་པར་གྱུར་ཅིང་། འདིར་འཁོད་ནས་རང་རང་གི་དགེ་བའི་ཕྱོགས་དང་བསམ་གཏན་དག་གིས་རྣམ་པར་སྤྱོད་པར་གྱུར་ལ། དེས་ན་སངས་རྒྱས་ཀྱི་ཞིང་འདིར་ས་ཆེན་པོ་ཤིན་ཏུ་སྐལ་བ་དང་ལྡན་པ་དང་། བཅུད་དང་ལྡན་པ་དང་། ཡོན་ཏན་དང་ལྡན་པ་དང་། དྲན་པ་དང་ལྡན་པ་དང་། བརྩོན་འགྲུས་དང་ལྡན་པ་དང་། གཏོང་བ་དང་ལྡན་པར་སངས་རྒྱས་ཀྱི་ཞིང་གཞན་བཞིན་གྱུར་ཅིག་སྙམ་དགོངས་སོ། །​དེ་ལྟ་བས་ན་ད་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གང་སུ་དག་སངས་རྒྱས་ཀྱི་ཞིང་མི་མཇེད་དེར་ཞུགས་པ་དེ་དག་དེར་འཁོད་ནས་རང་རང་གི་ཇི་ལྟར་འཚམ་པའི་དགེ་བའི་ཕྱོགས་ཀྱིས་བསམ་གཏན་དག་བྱེད་དེ། སྒོམ་པ་དེ་དག་ལས་ཁ་ཅིག་གིས་ལུས་ལས་ནི་འོད་འདི་ལྟ་བུ་བྱུང་སྟེ། དཔེར་ན་འབྲུ་མར་གྱི་མར་མེ་བཞིན་ནོ། །​ཁ་ཅིག་གི་ལུས་ལས་ནི་འོད་འདི་ལྟ་བུའི་བར་དག་བྱུང་སྟེ། དཔེར་ན་ཟླ་བ་དང་ཉི་མ་བྱེ་བ་བརྒྱ་སྟོང་ཕྲག་མང་པོའི་འོད་བཞིན་ནོ། །​དེར་བྱང་ཆུབ་སེམས་དཔའ་སེམས་དཔའ་ཆེན་པོ་མང་དུ་འདུས་པ་ད་ལྟར་སྣང་བ་ཆེན་པོས་སངས་རྒྱས་ཀྱི་ཞིང་མི་མཇེད་ཁྱབ་པར་གྱུར་ཏོ། །​ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ལྷགས་པར་གྱུར་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱང་སྔོན་དེར་མ་ཕྱིན་པ་ཤ་སྟག་དེའི་ཚེ་ཏིང་ངེ་འཛིན་ལས་ལངས་ནས་སངས་རྒྱས་ཀྱི་ཞིང་མི་མཇེད་དེར་ཆས་ཏེ་དེར་དོང་ནས་ཀྱང་སྐྱིལ་མོ་ཀྲུང་གིས་འཁོད་ཅིང་རང་རང་གི་བསམ་གཏན་རྣམ་པ་སྣ་ཚོགས་དག་གིས་རྩེ་བར་བྱེད་དོ། །​དེར་ཡང་དེ་བཞིན་གཤེགས་པ་ཤཱཀྱ་ཐུབ་པ་ལ་དེ་དག་ཕྱག་འཚལ་བར་བྱེད་དོ། །​བསྙེན་བཀུར་བྱེད་དོ། འདུས་པ་ཆེན་པོ་དེ་ལ་ཡང་ལྟ་བར་བྱེད་དོ། །​དེར་དེ་དག་ཉི་མའི་སྙིང་པོའི་ཆོས་ཀྱིས་གནས་



The English translation of this folio by 84000 Translating the words of the Buddha can be found at:
https://read.84000.co/translation/toh257.html?part=UT22084-066-015-156#UT22084-066-015-156