།འདུས་པ་ཆེན་པོ་ཐེག་པ་ཆེན་པོའི་མདོ་ལས་ལེའུ་བཅུ་གཅིག་པ་སྟེ། ཉི་མའི་སྙིང་པོའི་ལེའུ་ལས་དམ་པའི་ཆོས་བསྲུང་བའི་འདུས་པ་དང་པོ་རྫོགས་སོ།། །།གང་གི་ཚེ་བཅོམ་ལྡན་འདས་རྒྱལ་པོ་གཟུགས་ཅན་སྙིང་པོ་དང་ཐབས་ཅིག་ཏུ་དགེ་སློང་ཆོས་ཀྱིས་གནས་པ་རྣམས་ཀུན་ཏུ་བསྲུང་བའི་གཏམ་ཡང་ཡང་དག་པར་རྩོམ་པ་མཛད་པ་དེའི་ཚེ་དེའི་དུས་ན། ཤར་ཕྱོགས་སུ་སངས་རྒྱས་ཀྱི་ཞིང་ཚད་མེད་པ་གང་གཱའི་ཀླུང་གི་བྱེ་མ་སྙེད་འདས་པ་དེ་ན་འཇིག་རྟེན་གྱི་ཁམས་ཡོངས་སུ་གདུང་བ་མེད་པ་ཞེས་བྱ་བ་ཡོད་དོ། །དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཙམ་པ་ཀའི་མདོག་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །སངས་རྒྱས་ཀྱི་ཞིང་དེ་ན་བཅོམ་ལྡན་འདས་དེ་བཞིན་གཤེགས་པ་ཙམ་པ་ཀའི་མདོག་དེའི་འཁོར་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ཞེས་བྱ་བ་ཆོས་ཉན་པའི་ཕྱིར་འདུག་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོས་གྱེན་དུ་རྣམ་པར་བལྟས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོས་སྟེང་གི་ནམ་མཁའ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་ཤར་ཕྱོགས་ནས་ཆས་ཤིང་ནུབ་ཕྱོགས་སུ་འདོང་བ་དག་མཐོང་བར་གྱུར་ཏོ། །དེ་ནས་གང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དག་འདོང་བ་ནུབ་ཕྱོགས་སུ་བལྟས་ནས་ཀྱང་། དེ་ནས་སྣང་བ་ཆེན་པོ་མཐོང་ནས་དེའི་ཚེ་སངས་རྒྱས་ཙམ་པ་ཀའི་མདོག་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་སྟེང་གི་ནམ་མཁའ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མ་མཆིས། དཔག་ཏུ་མ་མཆིས་པ་ཤར་ཕྱོགས་ནས་ཆས་ཤིང་ནུབ་ཕྱོགས་སུ་མཆི་བ་དག་བདག་གིས་མཐོང་ལགས་སོ། །ནུབ་ཕྱོགས་སུ་སྣང་བ་ཆེན་པོ་ཡང་བདག་གིས་མཐོང་ལགས་ན་འདི་ལ་རྒྱུ་གང་ལགས། དེ་ནས་དེ་བཞིན་གཤེགས་པ་ཙམ་པ་ཀའི་མདོག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ།