རྒྱལ་པོ་ཆེན་པོ་ད་ལྟར་དང་། མ་འོངས་པའི་དུས་ན་དེ་བཞིན་གཤེགས་པ་འཚོ་བའམ། ཡོངས་སུ་མྱ་ངན་ལས་འདས་པ་ཡང་རུང་སྟེ། ལྔ་བརྒྱ་པ་ཐ་མ་ལ་དམ་པའི་ཆོས་ཟད་པར་འགྱུར་བའི་བར་དུ་ཁྱིམ་ན་གནས་པ་དང་རབ་ཏུ་བྱུང་བ་གང་ཆོས་ཀྱིས་གནས་པ། ཡོན་ཏན་གྱིས་ཕྱུག་པ་དག་ལ་དེ་ལྟར་བསྔོས་པའི་ལོངས་སྤྱོད་དང་། ཉེ་བར་སྤྱོད་པ་དང་། ནོར་གྱི་ཡོ་བྱད་དང་། ཞིང་གི་གཞི་དང་། ཁྱིམ་གྱི་གཞི་དང་། ཀུན་དགའི་ར་བ་དང་། སྐྱེད་མོས་ཚལ་དང་། བྲན་དང་། བྲན་མོ་དང་། རྐང་བཞི་པ་དང་། ཆོས་གོས་དང་། བསོད་སྙོམས་དང་། མལ་ཆ་དང་། སྟན་དང་། ན་བའི་གསོས་སྨན་དང་། ཡོ་བྱད་དག་ཡོད་པ་དེ་ལས་འཕྲོག་གམ་རྐུ་བ་དེ་ལ་རྒྱལ་རིགས་བཏང་སྙོམས་པར་བྱེད་ཅིང་། རབ་ཏུ་བྱུང་བ་དང་། ཁྱིམ་ན་གནས་པ་རྐུན་མ་དེ་དག་ཆད་པ་ཅི་ཡོད་པ་བཞིན་ཆད་པས་གཅོད་དུ་མི་འཇུག་ན་རྒྱལ་རིགས་དེ་བསོད་ནམས་མ་ཡིན་པ་ཆེས་མང་དུ་སྐྱེད་དོ། །རྒྱལ་རིགས་ཇི་ལྟ་བ་བཞིན་གྲོང་གི་བླར་བསྐོས་པ་དང་། གྲོང་ཁྱེར་གྱི་བླ་དང་། གྲོང་རྡལ་གྱི་བླ་དང་། ལྗོངས་ཀྱི་བླར་བསྐོས་པ་ཡང་དེ་བཞིན་དུ་བཏང་སྙོམས་པར་བྱེད་ཅིང་། དེ་ལྟར་རྐུ་བའི་སེམས་ཅན་དེ་དག་ཟློག་པར་མི་བྱེད་ན། དེ་ལྟ་བུའི་གྲོང་གི་བླ་ནས་ལྗོངས་ཀྱི་བླའི་བར་དེ་བསོད་ནམས་མ་ཡིན་པའི་ཕུང་པོ་ཆེས་མང་དུ་སྐྱེད་དོ། །དེ་ནས་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་རྒྱལ་པོ་ཉིད་ནི་ཤིན་ཏུ་ལྕི་བ་ལགས་སོ། །རྒྱལ་རིགས་ནི་བག་མ་མཆིས་པ་མང་པོ་དང་ལྡན་པར་གནས་པ་ལགས་སོ། །བཙུན་པ་བཅོམ་ལྡན་འདས་གང་ཡང་རྒྱལ་པོ་བག་མ་མཆིས་པར་གནས་ཤིང་། གང་ཟག་ཆོས་ཀྱིས་གནས་པ་དེ་ལྟ་བུ་དག་སྲུང་བར་བགྱིད་པ་དང་། དེ་བཞིན་དུ་དེ་ལྟར་བསྔོས་པའི་ལོངས་སྤྱོད་དང་། ཉེ་བར་སྤྱོད་པ་འཕྲོག་པའི་སེམས་ཅན་རྣམས་སྡིག་པའི་ལས་དེ་ལས་སླར་ཟློག་པར་བགྱིད་པ་དང་། གྲོང་གི་བླ་ནས་ལྗོངས་ཀྱི་བླའི་བར་ཡང་དེ་བཞིན་དུ་དེ་ལྟར་བསྔོས་པའི་ལོངས་སྤྱོད་དང་། ཉེ་བར་སྤྱོད་པ་དག་རྐུ་བའི་སེམས་ཅན་རྣམས་སྡིག་པའི་ལས་དེ་ལས་སླར་ཟློག་པར་བགྱིད་ན་དེ་བསོད་ནམས་ཀྱི་ཕུང་པོ་ཇི་སྙེད་ཅིག་སྐྱེད་པར་འགྱུར་ལགས།