།གཽ་ཏམ་དམངས་ལ་ཐམས་ཅད་སྐྱབས་གནས་པ། །ཁྱེད་ཅག་གི་ནི་ཅི་ཡི་ཕྱིར་མ་མཐོང་། །དཀའ་ཐུབ་དྲག་པོ་དྲང་སྲོང་ཆེན་པོ་དག །གཞན་རྣམས་ལ་ནི་གྲོགས་དག་ཁྱེད་ཕྱག་འཚོལ། །རྟས་བསྲུངས་མཐོན་འཕུར་སྐར་མ་དགའ་བ་དང་། །ངན་སྤོང་བུ་ལ་ཅི་ཕྱིར་ཕྱག་མི་འཚལ། །དེ་ནས་ཀླུ་དེ་དག་ཐམས་ཅད་ཁ་ཅིག་ནི་དྲང་སྲོང་རབ་ཏུ་དཔལ་ལྡན་ལ་ཕྱག་འཚལ་བར་བྱེད་དོ། །ཁ་ཅིག་ནི་བརྟེན་པོ་ལ་ཕྱག་འཚལ་བར་བྱེད་དོ། །ཁ་ཅིག་ནི་རྟས་བསྲུངས་ལ་ཕྱག་འཚལ་བར་བྱེད་དོ། །ཁ་ཅིག་ནི་མཐོན་པོར་འཕུར་ལ་ཕྱག་འཚལ་བར་བྱེད་དོ། །ཁ་ཅིག་ནི་སྐར་མ་ལ་དགའ་བ་ལ་ཕྱག་འཚལ་བར་བྱེད་དོ། །ཁ་ཅིག་ནི་དྲང་སྲོང་ངན་སྤོང་གི་བུ་ལ་ཕྱག་འཚལ་བར་བྱེད་དོ། །མངོན་པར་ཤེས་པ་ལྔ་དང་ལྡན་པ་དེ་དག་ལ་སྐྱབས་སུ་ཉེ་བར་དོང་ངོ་། །ཡང་དེའི་ཚེ། དྲང་སྲོང་མངོན་པར་ཤེས་པ་ལྔ་དང་ལྡན་པ་དེ་དག་གངས་ཀྱི་ནུབ་ཕྱོགས་ཀྱི་ངོས་ལ་དྲང་སྲོང་སྐར་མ་ལ་དགའ་བའི་མདུན་ན། ཤཱཀྱ་ཁྱུ་མཆོག་གི་ཡོན་ཏན་བསྔགས་པ་ཉན་ཅིང་འཁོད་དེ། དྲང་སྲོང་དེ་དག་གིས་ཀླུ་ཐམས་ཅད་འོ་དོད་འབོད་པ་ཐོས་སོ། །ཐོས་ནས་ཀྱང་དྲང་སྲོང་ལྔ་པོ་དེ་དག་སྟན་ལས་ལངས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མ་ལ་དགའ་བ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་དྲང་སྲོང་ཐུབ་པའི་གནས་རྟེན་དུ་ཀླུ་ཐམས་ཅད་གནོད་པར་གྱུར་ཅིང་བདག་ཅག་ལ་སྐྱབས་སུ་ཉེ་བར་གནས་པ་གཟིགས་སམ། བཞེངས་ཏེ་དེར་བཞུད་ལ་ཀླུའི་སྡེ་ཐམས་ཅད་ཡོངས་སུ་ཐར་བར་མཛོད་ཅིག །དེས་སྨྲས་པ། ཁྱེད་དེང་ཤིག །ལྷ་དང་། ཀླུ་དང་། གནོད་སྦྱིན་བརྒྱ་སྟོང་ཕྲག་མང་པོ་འདི་དག་ངའི་མདུན་དུ་འཁོད་ནས་ཚངས་པའི་གནས་པ་དམིགས་པ་མེད་པ་ཡོངས་སུ་འདྲི་བར་བྱེད་དེ། ངས་དེ་དག་གི་སེམས་ཡོངས་སུ་མགུ་བར་བྱའོ། །དེ་ནས་སྐར་མ་ལ་དགའ་བའི་རྐང་པ་གཉིས་ལ་དྲང་སྲོང་དེ་དག་ཐམས་ཅད་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་རྫུ་འཕྲུལ་གྱིས་དོང་སྟེ་དྲང་སྲོང་ཐུབ་པའི་གནས་ཀྱི་གཞི་རྟེན་དུ་འཁོད་དོ། །དེ་ནས་དེ་དག་ལ་ཀླུ་དེ་དག་མགོ་བོས་ཕྱག་འཚལ་ཏེ་འདི་སྐད་ཅེས་སྨྲས་སོ།