།བཅོམ་ལྡན་འདས་ལ་དེ་དག་གིས་རང་རང་གི་ལྷ་རྫས་ཀྱི་ཆོས་གོས་དག་སྐུ་ལ་གསོལ་ནས་ཕྱོགས་གཅིག་ཏུ་འཁོད་དོ། །བདུད་སྡིག་ཅན་གྱིས་མཐོང་སྟེ། མཐོང་ནས་ཀྱང་ཡང་ཤས་ཆེར་འཁྲུགས་ཤིང་སྐྲག་ནས་འདི་སྐད་ཅེས་སྨྲས་སོ། །དགེ་སྦྱོང་གི་ནི་ལྟོར་ཆུད་པས། །འཁོར་དེ་དག་དང་བྲལ་བར་གྱུར། །འདི་ནས་གང་དུ་དོང་བ་ནི། །ཐམས་ཅད་དེ་ཡི་དབང་དུ་སོང་། །དེས་སུ་ཡང་ཕྱི་རོལ་དུ་མ་འབྱུང་ཤིག །བདུད་ཀྱི་སྤྱོད་ཡུལ་འདིར་བདག་ཅག་གནས་པར་བྱའོ་ཞེས་སྨྲས་ནས་མྱུར་དུ་གྲོང་ཁྱེར་གྱི་སྒོ་བཅད་དེ་གབ་ཏུ་བཅུག་གོ། །དེ་ནས་བཅོམ་ལྡན་འདས་ཀྱིས་ཡང་ཇི་ལྟར་ནམ་མཁའི་སྤྱན་ལས་གསུངས་པ་བཞིན་དུ་དེ་དག་ལ་ཚངས་པའི་གནས་པ་རྣམ་པ་གསུམ་པོ་སེམས་ཅན་ལ་དམིགས་པ་དང་། ཆོས་ལ་དམིགས་པ་དང་། དམིགས་པ་མེད་པ་རྒྱ་ཆེར་བསྟན་པར་ཡང་དག་པར་བརྩམ་པ་མཛད་དོ། །རི་ཁ་ལ་ཏི་ཡའི་རྩེ་མོ་དྲང་སྲོང་ཐུབ་པའི་གནས་སུ་ཀླུ་གང་དག་རྟེན་ཅིང་འདུས་པ་དེ་དག་ཐམས་ཅད་ཀྱིས་ཀྱང་རང་རང་གི་ལུས་ཆུང་ངུར་མཐོང་སྟེ། དཔེར་ན་མིག་སྨན་བསྐུ་བའི་ཐུར་མ་བཞིན་ནོ། །ཇི་ལྟར་སྔོན་གྱི་ལུས་བཞིན་དུ་ཡང་བཞག་པར་མ་ནུས་སོ། །སླར་འབྱུང་བར་ཡང་མ་ནུས་ཏེ། དེ་དག་ཐམས་ཅད་འཇིགས་ཤིང་སྐྲག་ལ་སྤུ་ཟིང་ཞེས་བྱེད་པའི་བ་སྤུའི་ཁུང་བུ་བྱུང་ནས། དེ་དག་ཐམས་ཅད་ཀྱིས་དགའ་བོ་དང་ཉེ་དགའ་ལ་རབ་ཏུ་བཏུད་ནས་འདི་སྐད་ཅེས་སྨྲས་སོ། །གང་གི་ཚེ་བདག་ཅག་གི་གྲོང་དུ་ཤ་སྦྲང་དང་། སྦྲང་བུ་མཆུ་རིངས་དང་། སྦྲང་བུ་གདུག་པ་རྣམས་ཀུན་ཏུ་བྱུང་བ་དེའི་ཚེ་བདག་ཅག་གནས་ཐམས་ཅད་བོར་ནས་བསྐྱབ་པའི་ཕྱིར་འདིར་ཞུགས་ནས་འདི་ནས་གང་དུ་ཡང་མཆི་བར་མ་ནུས་ཏེ། ལུས་དག་ཀྱང་ཆུང་ངུར་གྱུར་ལགས་ན་གང་གིས་བདག་ཅག་གནས་སུ་མཆི་བར་བདག་ཅག་བསྐྱབ་ཏུ་གསོལ། མི་འཇིགས་པ་སྩལ་བར་གསོལ། དགའ་བོ་དང་ཉེ་དགའ་གཉིས་ཀྱིས་ཀྱང་སྨྲས་པ། དགེ་སྦྱོང་འདི་ནི་གཡོ་སྒྱུ་ཅན་གྱིས་བློ། །ཤཱཀྱའི་བུ་ཕོ་སྒྱུ་མ་བྱེད་པ་ཡིན། །སངས་རྒྱས་ཞིང་འདིར་ཞུགས་པར་གྱུར་ནས་སུ། །ལུས་ཀུན་ལ་ནི་ཐམས་ཅད་ཆུད་པར་གྱུར།