ཐམས་ཅད་ཀྱང་ཕྱིར་མི་ལྡོག་པར་གྱུར་ཏོ། །དེའི་ཚེ་དེ་དག་གིས་ཏིང་ངེ་འཛིན་དང་། གཟུངས་དང་། བཟོད་པ་སྣ་ཚོགས་ཐོབ་ནས་དགེ་བའི་རྩ་བ་རྣམས་བསྐྱེད་དོ། །སེམས་ཅན་ཐམས་ཅད་ཀྱིས་སངས་རྒྱས་ཀྱི་ཞིང་མི་མཇེད་འདིར་གང་བཅོམ་ལྡན་འདས་ཀྱི་སྐུ་ལ་ཆུད་པར་གྱུར་པའི་བཀོད་པ་དེ་ལྟ་བུ་ཡང་མཐོང་ངོ་། །དེ་དག་ཐམས་ཅད་དེ་བཞིན་གཤེགས་པའི་ཡོན་ཏན་རྣམས་ལ་ངོ་མཚར་ཐོབ་ཅིང་རྨད་དུ་བྱུང་བ་ཐོབ་བོ། །དེའི་ཚེ་གང་དག་སྔོན་ཆད་སེམས་མ་བསྐྱེད་པའི་སེམས་ཅན་གང་གཱའི་ཀླུང་གི་བྱེ་མ་སྙེད་གྲངས་མེད་པ་དཔག་ཏུ་མེད་པ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་བཞིན་དུ་རང་སངས་རྒྱས་ཀྱི་ཐེག་པ་དང་། དེ་བཞིན་དུ་ཉན་ཐོས་ཀྱི་ཐེག་པར་ཡང་སེམས་དག་བསྐྱེད་དེ། དེ་དག་ཐམས་ཅད་ཕྱིར་མི་ལྡོག་པའི་ས་ཐོབ་པར་གྱུར་ཏོ། །དེ་བཞིན་དུ་འཁོར་ལོས་སྒྱུར་བའི་ལུས་བྱད་ཀྱིས་ཞེས་བྱ་བའི་བར་དང་། ཕྱིར་མི་ལྡོག་པའི་ས་ཐོབ་པར་གྱུར་ཏོ་ཞེས་བྱ་བའི་བར་དུ་ཡིན་ཏེ། སེམས་ཅན་ཡོངས་སུ་སྨིན་པར་མཛད་པའི་ཕྱིར་ཇི་ལྟར་བཅོམ་ལྡན་འདས་ཆོ་འཕྲུལ་ཆེན་པོ་སངས་རྒྱས་ཐམས་ཅད་ཀྱི་ཡུལ་གྱི་རྒྱུ་འཐུན་པར་ཏིང་ངེ་འཛིན་དེ་ལྟ་བུ་ལ་སྙོམས་པར་ཞུགས་པ་བཞིན་ནོ། །འདུས་པ་ཆེན་པོ་ཉི་མའི་སྙིང་པོའི་ལེའུ་བཅུ་གཅིག་པ་ལས་ལེའུ་དྲུག་པའོ།། །།དེ་ནས་བདུད་སྡིག་ཅན་གྱིས་དེ་བཞིན་གཤེགས་པ་འཁོར་དང་བཅས་པ་ཉིད་ཀྱི་ཕོ་བྲང་ན་དེ་བཞིན་གཤེགས་པའི་དབྱིངས་ན་བཞུགས་པ་མཐོང་ནས་མཆོག་ཏུ་ཡིད་མི་བདེ་སྟེ་ལུས་ཐམས་ཅད་ནས་རྡུལ་འཐོན་ཞིང་མཆི་མ་དག་བྱུང་ནས་མི་དགའ་བར་གྱུར་ཏོ། །དེ་ནས་བདུད་སྡིག་ཅན་གྱིས་གནས་ཐམས་ཅད་དུ་རྒྱུ་བར་བྱེད། །རྣམ་པར་རྒྱུ་བར་བྱེད། འཇུག་པར་བྱེད། འབྱུང་བར་བྱེད། ལྡང་བར་བྱེད། རྒྱུག་པར་བྱེད། ཀུན་ཏུ་རྒྱུག་པར་བྱེད། གླལ་བར་བྱེད། འཛུམ་པར་བྱེད། ཤུགས་རིང་དུ་འབྱིན་པར་བྱེད། ཁ་ལ་ལྕེས་ལྡག་པར་བྱེད། མིག་འཛུམས་པར་བྱེད། ལག་པ་གཉིས་རྐྱོང་ཞིང་སྐུམ་པར་བྱེད། མགོ་ལ་ལག་པ་གཉིས་ཀྱིས་རྡོབ་པར་བྱེད།