དེ་བརྒྱ་ལམ་ན་རེས་འགའ་ཞིག་མི་རྣམས་དང་སྐལ་བ་མཉམ་པར་སྐྱེས་ན་ཡང་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པ་དག་ཏུ་མིག་མ་ཚང་བ་དང་། ཚུལ་དུ་མི་ཤིས་པར་སྐྱེ་བར་འགྱུར་རོ། །རྒྱལ་པོ་ཆེན་པོ་གང་ཆོས་ཀྱིས་གནས་པ་དག་ལ་བསྔོས་པའི་ལོངས་སྤྱོད་དང་ཉེ་བར་སྤྱོད་པ་དང་། ནོར་གྱི་ཡོ་བྱད་འཕྲོག་པར་བྱེད་པ་དེའི་ལོག་པར་སྒྲུབ་པ་དེ་ནི་དེ་ལྟ་བུ་ཡིན་ནོ། །དེ་ནས་རྒྱལ་པོ་གཟུགས་ཅན་སྙིང་པོ་མཆི་མ་དག་ཕྱུང་ནས་གསོལ་པ། བཙུན་པ་བཅོམ་ལྡན་འདས་སྐྱེས་བུ་གང་ཟག་དེ་ལྟ་བུ་ནི་སེམས་ཅན་དམྱལ་བ་ན་གནས་པར་མི་བསྔོ་ལགས་ཀྱི། གང་གིས་མི་ཉིད་རྙེད་པ་ཐོབ་ནས་བསོད་ནམས་མ་ལགས་པ་ཆེན་པོ་དེ་ལྟ་བུ་ཀུན་ཏུ་སྤྱོད་པར་འགྱུར་བའི་མི་ཉིད་རྙེད་པ་ནི་དེ་ལྟ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ད་ལྟར་དང་མ་འོངས་པའི་དུས་ན་རྒྱལ་རིགས་ཆོས་ཀྱིས་གནས་པ་ཁྱེད་ཅག་གི་ལག་ཏུ་གང་ཟག་ཡོངས་སུ་གཏད་ཀྱིས་སྲུངས་ཤིག །ཡོངས་སུ་སྲུངས་ཤིག །རབ་ཏུ་བྱུང་བའམ། ཁྱིམ་ན་གནས་པ་གང་དགེ་སློང་ཆོས་ཀྱིས་གནས་པ་རྣམས་ལ་དེ་ལྟར་བསྔོས་པའི་ལོངས་སྤྱོད་དང་། ཉེ་བར་སྤྱོད་པ་དང་། ནོར་གྱི་ཡོ་བྱད་འཕྲོག་པར་བྱེད་པ་དེ་ལ་ཁྱེད་ཀྱིས་ཇི་ནས་ཀྱང་ཆོས་དང་འཐུན་པས་ཆད་པས་གཅད་པར་བྱའོ། །རྒྱལ་པོས་གསོལ་པ། བཙུན་པ་བཅོམ་ལྡན་འདས་གལ་ཏེ་གང་དག་དགེ་སློང་ཆོས་ཀྱིས་གནས་པ་རྣམས་ལ་དེ་ལྟར་བསྔོས་པའི་ལོངས་སྤྱོད་དང་། ཉེ་བར་སྤྱོད་པ་དང་། ནོར་གྱི་ཡོ་བྱད་འཕྲོག་པར་བྱེད་པའི་ཁྱིམ་ན་གནས་པ་དང་རབ་ཏུ་བྱུང་བ་དེ་དག་ཅི་ནས་ཆོས་དང་འཐུན་པས་ཆད་པས་གཅོད་པར་མི་བགྱིད་ཅིང་། དེ་ལ་རྒྱལ་པོ་བཏང་སྙོམས་པར་གནས་པར་བགྱིད་ལགས་ན་རྒྱལ་རིགས་དེ་བསོད་ནམས་མ་ལགས་པའི་ཕུང་པོ་ཇི་སྙེད་ཅིག་སྐྱེད་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་གཤེགས་པ་མ་གཏོགས་པར་ཉན་ཐོས་དང་། རང་རྒྱལ་བ་དག་དང་བཅས་པའི་སེམས་ཅན་ཐམས་ཅད་ཀྱི་བསོད་ནམས་ཇི་སྙེད་ཡོད་པའི་བསོད་ནམས་ཀྱི་ཕུང་པོ་དེ་ལྟ་བུ་དང་། སེམས་ཅན་གཅིག་ཅིག་ལྡན་པར་གྱུར་ན། སེམས་ཅན་དེ་ཉན་ཐོས་དང་། རང་རྒྱལ་བ་ཐམས་ཅད་ལས་ཆེས་ཁྱད་པར་དུ་འཕགས་པ་དང་། ཆེས་བསོད་ནམས་དང་ལྡན་པར་འགྱུར་བ་ཡིན་ནམ།