དཀོན་མཆོག་གསུམ་གྱི་གདུང་རྒྱུན་མི་གཅད་པའི་ཕྱིར་སྔོན་ཡང་མི་མཇེད་ཀྱི་སངས་རྒྱས་ཀྱི་ཞིང་འདི་ཡོངས་སུ་སྤྱོད་པ་མཛད་དོ། །ད་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་པ། དཔག་ཏུ་མེད་པ་གང་དག་ཕྱོགས་བཅུའི་སངས་རྒྱས་ཀྱི་ཞིང་གཞན་གང་གཱའི་ཀླུང་གི་བྱེ་མ་སྙེད་ནས་ངའི་སངས་རྒྱས་ཀྱི་ཞིང་འདིར་ཞུ་བ་དང་། ཞལ་བལྟ་བ་དང་། ཕྱག་འཚལ་བ་དང་། མཆོད་པ་དང་། བསྙེན་བཀུར་བྱ་བའི་ཕྱིར་དང་། ནམ་མཁའི་མིག་དང་ལྡན་པ། སོ་སོ་ཡང་དག་པར་རིག་པ་བཞི་དང་ལྡན་པ། ཆོས་ཀྱིས་གནས་པ་རྣམས་ཀྱི་བྱང་ཆུབ་སེམས་དཔའི་སྤྱོད་པ་མཉན་པའི་ཕྱིར་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་ང་ལ་སྙིང་ཉེ་བའི་ཕྱིར་ཆོས་ཀྱི་ཚུལ་རིང་དུ་གནས་པར་བྱ་བའི་དོན་དང་། དཀོན་མཆོག་གསུམ་གྱི་གདུང་རྒྱུན་མི་གཅད་པའི་དོན་དུ་བསམ་གཏན་གྱི་ཡུལ་གྱིས་ས་སྟེང་དུ་འཁོད་ནས། བདུད་ཐམས་ཅད་ཀྱི་ཡུལ་ཚར་བཅད་པའི་ཕྱིར་དང་། འཁོར་བས་སྐྲག་པ་སྦྱིན་པ་ལ་མངོན་པར་བརྩོན་པའི་སེམས་ཅན་དེ་དག་ལ་སྙིང་བརྩེ་བའི་ཕྱིར་སངས་རྒྱས་ཀྱི་ཞིང་འདི་ཡོངས་སུ་སྤྱོད་པ་དག་ཏུ་བྱེད་དོ། །ད་ལྟར་དང་མ་འོངས་པའི་དུས་ན་ངའི་བསྟན་པ་འདི་དང་། དམ་པའི་ཆོས་སམ། དམ་པའི་ཆོས་ཀྱི་གཟུགས་བརྙན་ཡུན་ཇི་སྲིད་གནས་པར་ཆོས་ཀྱིས་གནས་པའི་དགེ་སློང་རྣམས་ལ་ཁྱིམ་དང་། ཀུན་དགའི་ར་བ་དང་། ཞིང་དང་། བྲན་དང་། བྲན་མོའི་བར་གང་སུ་དག་གིས་དེ་ལྟར་བསྔོས་པ་དེ་ལ་སྡིག་པ་སྤྱོད་པའི་དགེ་སློང་ཚུལ་ཁྲིམས་འཆལ་པ་གང་དག་ཐ་ན་འདབ་མ་གཅིག་དང་། འབྲས་བུ་གཅིག་དང་། མེ་ཏོག་གཅིག་ཅིག་ཡོངས་སུ་སྤྱོད་པ་དག་ཏུ་བྱེད་ན་དེ་ནི་མི་བླུན་པོ་དེ་ལ་དོན་མ་ཡིན་པ་དང་། ཕན་པ་མ་ཡིན་པར་འགྱུར་ཏེ། དེ་ལ་གནོད་པ་བཞི་ཡང་འབྱུང་བར་འགྱུར་རོ། །བཞི་གང་ཞེ་ན། ཕྱོགས་ཐམས་ཅད་དུ་མི་སྙན་པ་ཆེན་པོ་འགྲོ་བ་ཡིན། མཛའ་བོ་དང་། ཉེ་དུ་དང་། སྣག་གི་གཉེན་མཚམས་དང་། མཁན་པོ་དང་། སློབ་དཔོན་དང་། རིམ་གྲོ་པ་སྡུག་ཅིང་ཡིད་དུ་འོང་བ་དག་དང་མྱུར་དུ་འབྲལ་བར་འགྱུར་བ་ཡིན། ནད་ཚབས་ཆེན་པོ་ཡུན་རིང་བ་དག་གིས་ཐེབས་པར་འགྱུར་བ་ཡིན།