།དེ་བཞིན་དུ་འདི་ལ་གནས་པའི་བྱང་ཆུབ་སེམས་དཔའི་ལུས་རྩིའི་སྡོང་བུ་ལས་ལག་པ་ཁྱེར་རམ། རྐང་པ་ཁྱེར་རམ། མིག་ཁྱེར་རམ། ཤ་ཁྱེར་རམ། ཁྲག་ཁྱེར་རམ། རྐང་ཁྱེར་རམ། ཡན་ལག་རེ་རེ་ནས་ཁྱེར་རམ། བྲན་ཕོ་དང་། བྲན་མོ་ཁྱེར་རམ། ནོར་རམ་འབྲུ་ཁྱེར་ཡང་དེ་འདི་སྙམ་དུ་བདག་གི་ལག་པ་ཁྱེར་རོ། །བདག་གི་རྐང་པ་ཁྱེར་རོ། །བདག་གི་མིག་ཁྱེར་རོ། །བདག་གི་ཤ་ཁྱེར་རོ། །བདག་གི་ཁྲག་ཁྱེར་རོ། །བདག་གི་རྐང་ཁྱེར་རོ། །བདག་གི་ཡན་ལག་རེ་རེ་ནས་ཁྱེར་རོ། །བདག་གི་བྲན་ཕོ་དང་། བྲན་མོ་ཁྱེར་རོ། །བདག་གི་ནོར་དང་འབྲུ་ཁྱེར་རོ་སྙམ་དུ་མི་སེམས་ཏེ། དེ་ནི་སེམས་ཅན་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ནད་བསལ་བའི་ཕྱིར་ཞུགས་པ་ཡིན་ནོ། །འདི་ལ་གནས་པའི་བྱང་ཆུབ་སེམས་དཔའི་ལུས་ནི་ཕལ་པ་ཐ་མའི་ལུས་མ་ཡིན་གྱི་བྱིན་གྱིས་བརླབས་པའི་ལུས་དང་། བདུད་རྩིའི་ལུས་ཡིན་པར་རིག་པར་བྱའོ། །སྤྲིན་ཆེན་སྙིང་པོ་གཞན་ཡང་འདི་ལ་གནས་པའི་བྱང་ཆུབ་སེམས་དཔའ་ནི་གང་གི་ཚེ་བྱིན་གྱིས་བརླབས་པའི་ལུས་ཟད་པར་བྱེད་པ་དེའི་ཚེ་བྱ་རྒོད་དང་། ཆུན་ལག་ལ་སོགས་པ་སྲོག་ཆགས་རྣམས་ཀྱིས་དེའི་རོ་རྩིའི་སྡོང་བུ་བཞིན་དུ་ཟས་སུ་ཟ་བར་འགྱུར་ལ། སེམས་ཅན་དེ་དག་ཐམས་ཅད་ཀྱང་ངན་སོང་དུ་འགྲོ་བར་འགྱུར་བ་དེ་ནི་གནས་མེད་དེ། ལྷ་དང་མིའི་ནང་དུ་སྐྱེ་ཞིང་སངས་རྒྱས་མང་པོ་མཉེས་པར་བྱེད་པར་འགྱུར་རོ། །སྤྲིན་ཆེན་སྙིང་པོ་གཞན་ཡང་ཏིང་ངེ་འཛིན་འདི་མྱུར་དུ་རྟོགས་པར་འདོད་པའི་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མས་ནི་འདི་ལྟར་སེམས་བསྐྱེད་པར་བྱ་སྟེ། དེ་བཞིན་གཤེགས་པ་ནི་རྟག་པ་དང་། ཐེར་ཟུག་པ་དང་། ཞི་བ་དང་། བརྟན་པ་དང་། དམ་པའི་ཆོས་ཀྱི་མདོ་ནུབ་པར་མི་འགྱུར་བར་བྱ་བའི་ཕྱིར་སེམས་ཅན་གང་དང་གང་ལ་ཅི་དང་ཅིས་དོན་དུ་འགྱུར་བ་དེ་དང་དེ་ལ་དེ་དང་དེ་སྦྱིན་པར་བྱའོ་སྙམ་སྟེ། ལག་པ་འདོད་པ་རྣམས་ལ་ནི་ལག་པ་སྦྱིན་ནོ། །རྐང་པ་འདོད་པ་རྣམས་ལ་ནི་རྐང་པ་སྦྱིན་ནོ། །མིག་འདོད་པ་རྣམས་ལ་ནི་མིག་སྦྱིན་ནོ། །ཤ་འདོད་པ་རྣམས་ལ་ནི་ཤ་སྦྱིན་ནོ། །ཁྲག་འདོད་པ་རྣམས་ལ་ནི་ཁྲག་སྦྱིན་ནོ། །རྐང་འདོད་པ་རྣམས་ལ་ནི་རྐང་སྦྱིན་ནོ། །ཡན་ལག་རེ་རེ་ནས་འདོད་པ་རྣམས་ལ་ཡང་ཡན་ལག་རེ་རེ་ནས་སྦྱིན་ནོ། །