བཅོམ་ལྡན་འདས་དེ་བཞིན་གཤེགས་པས་ཅི་ལས་དགོངས་ཏེ་བྱིན་གྱིས་བརླབས་པའི་ལུས་ཡིན་ནོ་ཞེས་གསུང་། གལ་ཏེ་བྱིན་གྱིས་བརླབས་པའི་ལུས་ལགས་ན་ནི་སེམས་ཅན་རྣམས་ལ་སྩལ་བ་ན་ཡང་འདི་ལྟར་ཆོས་ཀྱི་ལུས་སུ་བཞག་པས་དེར་འགལ་བ་ཆེན་པོར་འགྱུར་རོ། །ཀྱེ་མ་འདི་ལ་གནས་པའི་བྱང་ཆུབ་སེམས་དཔའ་ནི་ཤའི་ལུས་སེམས་ཅན་རྣམས་ལ་སྩོལ་བར་བགྱིད་དོ་ཞེས་གདའ་བས་ན་ཤོ་བེ་ལགས་སོ་ཞེས་མཆི་བར་འགྱུར་རོ། །བཀའ་སྩལ་པ། སྤྲིན་ཆེན་སྙིང་པོ་དེ་སྐད་མ་ཟེར་ཅིག་འདི་ལ་གནས་པའི་བྱང་ཆུབ་སེམས་དཔའི་ལུས་བྱིན་གྱིས་བརླབས་པ་གང་ཡིན་པ་དེ་ནི་སྒྱུ་མ་མཁན་གྱིས་སྤྲུལ་པའི་ལུས་བཞིན་དུ་བལྟ་བར་བྱའོ། །གསོལ་པ། བཅོམ་ལྡན་འདས་དེ་བཞིན་གཤེགས་པས་ཅི་ལས་དགོངས་ཏེ་ཕྱིན་ཅི་ལོག་གི་འདུ་ཤེས་དང་། ཕྱིན་ཅི་མ་ལོག་པའི་འདུ་ཤེས་དང་། ཉོན་མོངས་པ་ཅན་གྱི་ཆོས་དང་། ཉོན་མོངས་པ་ཅན་མ་ཡིན་པའི་ཆོས་ཞེས་ཡང་དང་ཡང་དུ་དེ་སྐད་གསུང་། བཀའ་སྩལ་པ། སྤྲིན་ཆེན་སྙིང་པོ་དེ་ལྟར་རྣམ་པ་གཞན་དུ་མ་སེམས་ཤིག །འདི་ལ་གནས་པའི་བྱང་ཆུབ་སེམས་དཔའི་ལུས་བྱིན་གྱིས་བརླབས་པ་གང་ཡིན་པ་དེ་དག་ནི་རྩིའི་སྡོང་བུ་ལྟ་བུའི་ལུས་ཡིན་ནོ། །འདི་ལ་གནས་པའི་བྱང་ཆུབ་སེམས་དཔའ་ནི་རྩྭ་དང་། རྩིག་པ་དང་། ཤིང་དང་། བོང་བ་དང་། མིག་ཡོར་ལྟ་བུར་བསྒོམ་སྟེ། ཀྱེ་མ་བདག་གི་ལུས་ནི་སྤྱོད་པ་མེད་ཅིང་བྱེད་པ་མེད་པ་སྟེ། སེམས་མེད་པ་ཅན། སྙིང་པོ་མེད་པའི་ལུས། ཁམས་སུ་མ་གཏོགས་པ་སྟེ། ཅི་སྟེ་འདི་ལ་ལ་ལ་ཞིག་གཅོད་པར་བྱེད་དམ། འབྱེད་པར་བྱེད་དམ། འཕྲོག་པར་བྱེད་དམ། རྐུ་བར་བྱེད་ཀྱང་རུང་སྟེ། བདག་གི་ལུས་རྩིའི་སྡོང་བུ་ལྟར་དོན་མེད་པར་མ་གྱུར་ཅིག་ཅེས་སྒོམ་པར་བྱེད་དོ། །དེ་ཅིའི་ཕྱིར་ཞེ་ན། ཆོས་ཀྱི་ལུས་སུ་བཞག་པའི་ཕྱིར་རོ། །སྤྲིན་ཆེན་སྙིང་པོ་གཞན་ཡང་དཔེར་ན་རྩིའི་སྡོང་བུ་དེའི་རྩ་བ་ཁྱེར་ན་ཡང་འདི་སྙམ་དུ་བདག་གི་རྩ་བ་ཁྱེར་རོ་སྙམ་དུ་མི་སེམས་སོ། །ཤུན་ལྤགས་སམ། པྲིའམ། ལོ་མའམ། མེ་ཏོག་གམ། འབྲས་བུ་འམ། མགོ་ཏོགས་སམ། སྡོང་བུ་འམ། ཡལ་ག་འམ། བུར་མ་འམ། རྩ་བ་དག་ཁྱེར་ཡང་རུང་སྟེ། དེ་འདི་སྙམ་དུ་བདག་གི་ཤུན་ལྤགས་ཁྱེར་རོ། །བདག་གི་པྲི་ཁྱེར་རོ། །བདག་གི་ལོ་མ་ཁྱེར་རོ། །སྙམ་དུ་མི་སེམས་སོ། །དེ་བཞིན་དུ་འདི་ལ་གནས་པའི་བྱང་ཆུབ་སེམས་དཔའི་ལུས་རྩིའི་སྡོང་བུ་ལས་ལག་པ་ཁྱེར་རམ།