བྲན་འདོད་པ་རྣམས་ལ་ཡང་བྲན་དུ་འགྲོ་བར་བྱའོ། །དམ་པའི་ཆོས་བསྟན་པ་དང་བཤད་པའི་ཕྱིར་ཡང་བདག་གི་ལག་པ་ཁྱེར་བར་གྱུར་ཅིག །བདག་གི་རྐང་པ་ཁྱེར་བར་གྱུར་ཅིག །དེ་བཞིན་དུ་སྣ་དང་། རྣ་བ་དང་། ཡན་ལག་སོ་སོ་རྣམས་དང་། དེའི་འོག་ཏུ་བདག་གི་སྲོག་ཀྱང་ཡོངས་སུ་གཏོང་བར་གྱུར་ཅིག་ཅེས་སེམས་བསྐྱེད་པར་བྱ་སྟེ། བདག་ཉིད་རྩིའི་སྡོང་བུ་བཞིན་དུ་རྟག་ཏུ་བསྐྱེད་པར་བྱ་ཞིང་ཇི་སྲིད་འཚོའི་བར་དུ་ཡང་སེམས་བསྐྱེད་པར་བྱས་ན་སེ་གོལ་གཏོགས་པ་ཙམ་དུ་སེམས་བསྐྱེད་པར་བྱ་བ་ལྟ་ཅི་སྨོས། སྤྲིན་ཆེན་སྙིང་པོ་གཞན་ཡང་དཔེར་ན། རྟའི་རྒྱལ་པོ་རྔོག་ཁྱེར་དང་ལྡན་པ་སྤྲིན་གྱི་ཤུགས་ཅན་ནི་གྲུ་ཞིག་པའི་མི་རྣམས་ཀྱི་ཕྱིར་བརྟན་པའི་སེམས་ཀྱིས་ཆས་ཏེ། རི་མ་ལ་ཡའི་དབུས་སུ་འདུག་ནས་སྒྲ་ཆེན་པོ་བསྒྲགས་ཏེ། གང་དག་ངའི་རྒྱབ་བམ། ཕོངས་སམ། བྱ་ལ་འམ། ཐ་ན་སྤུའི་ཉག་མ་ཙམ་ལས་འཇུ་བའི་སེམས་ཅན་གང་ཡིན་པ་དེ་དག་ཐམས་ཅད་བསྒྲལ་བར་བྱའོ། །ཞེས་ཟེར་བ་དེ་བཞིན་དུ་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་དག་སྤྱོད་པ་ཅན་དང་། ཀུན་ཏུ་རྒྱུ་དང་། སེམས་ཅན་གཞན་དག་ལ་འཕྱ་བའི་ཕྱིར་རམ། བསྟིང་བའི་ཕྱིར་ཏིང་ངེ་འཛིན་འདི་ལས་དེ་བཞིན་གཤེགས་པ་རྟག་པ་དང་། ཐེར་ཟུག་པ་དང་། ཞི་བ་དང་། བརྟན་པ་དང་། ཟབ་པའི་ཚིག་གི་དོན་ནམ། ཚིགས་སུ་བཅད་པ་འམ། ཐ་ན་ཚིག་གི་ཕྱེད་ཀྱང་རུང་སྟེ། རྣ་ལམ་དུ་ཐོས་པར་བྱེད་པ་དག་དང་། གང་དག་འཆད་པ་ཡང་རུང་བའི་སེམས་ཅན་གྲུ་ཞིག་པར་གྱུར་པ་དང་འདྲ་བ་དེ་དག་ངན་སོང་ངན་འགྲོ་ལོག་པར་ལྟུང་བའི་དྲ་བ་ལས་གྲོལ་བར་བྱེད་དོ། །སྤྲིན་ཆེན་སྙིང་པོ་གཞན་ཡང་ཏིང་ངེ་འཛིན་འདི་རྣ་ལམ་དུ་གྲག་པ་ཙམ་གྱིས་དེ་དག་མིའི་དབང་པོའི་ཕུན་སུམ་ཚོགས་པ་ལས་ཉམས་པར་མི་འགྱུར་རོ། །ལྷའི་དབང་པོའི་ཕུན་སུམ་ཚོགས་པ་ལས་ཉམས་པར་མི་འགྱུར་རོ། །ཚངས་པའི་དབང་པོའི་ཕུན་སུམ་ཚོགས་པ་ལས་ཉམས་པར་མི་འགྱུར་རོ། །སངས་རྒྱས་འབྱུང་བའི་ཕུན་སུམ་ཚོགས་པ་ལས་ཉམས་པར་མི་འགྱུར་རོ། །མདོ་འདིའི་ཏིང་ངེ་འཛིན་གྱི་ཕུན་སུམ་ཚོགས་པ་ལས་ཉམས་པར་མི་འགྱུར་རོ། །གསོལ་པ། བཅོམ་ལྡན་འདས་ཇི་ལྟར་ན་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ཤིན་ཏུ་ཡང་དག་པའི་ལྟ་བ་ཅན་ལགས།