གླང་པོ་ཆེ་མཆོག་ལ་བརྡེག་པར་བྱ་བ་ནི་གླང་པོ་ཆེ་མཆོག་གིས་བཟོད་པར་ཟད་དོ། །བྲམ་ཟེ་ཆེན་པོ་དེ་བཞིན་དུ་དེ་བཞིན་གཤེགས་པའི་ལྡེམ་པོ་ངག་གི་རྭས་བརྡུང་བ་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱི་བོང་བུས་ཤིན་ཏུ་མི་བཟོད་དེ། དེ་བཞིན་གཤེགས་པའི་ལྡེམ་པོ་ངག་གི་རྭས་བརྡུངས་པ་ནི་དེ་བཞིན་གཤེགས་པ་དང་འདྲ་བས་བཟོད་པར་ཟད་དོ། །བྲམ་ཟེ་ཆེན་པོ་དེ་བཞིན་གཤེགས་པའི་ཡོན་ཏན་གྱི་ཆེ་བ་ཉིད་ལ་ལྟོས། བྲམ་ཟེ་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་སེར་པོ་ཆེན་པོ་བྱང་ཆུབ་སེམས་དཔའི་འཁོར་གྱིས་བསྐོར་བ་ལ་བཟོད་པ་གསོལ་ཅིག །བྲམ་ཟེ་ཆེན་པོ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ལྷ་སྦྱིན་གྱི་ཡོན་ཏན་གྱི་ཆེ་བ་ཉིད་མི་ཤེས་པ་དེ་དག་ནི་སངས་རྒྱས་བྱུང་བའི་ཕྱེད་ཐོབ་ཙམ་དུ་ཟད་པ་ཡིན་པར་རིག་པར་བྱའོ། །མིག་ཡ་གཅིག་པར་རིག་པར་བྱའོ། །མི་ལུས་ཀྱི་ཕྱེད་ཐོབ་པ་ཡིན་པར་རིག་པར་བྱའོ། །བྲམ་ཟེ་ཆེན་པོ་གཞན་ཡང་ལྷ་སྦྱིན་གྱི་ཡོན་ཏན་གྱི་ཆེ་བ་ཉིད་ལ་ལྟོས། སེམས་ཅན་ཐམས་ཅད་ཀྱིས་ནི་དེ་བཞིན་གཤེགས་པའི་གནོད་པ་བཟོད་པར་ཡང་མི་ནུས། དེ་བཞིན་གཤེགས་པའི་ཡོན་ཏན་གྱི་ཆེ་བ་ཉིད་ཤེས་པར་ཡང་མི་ནུས། སེམས་ཅན་ཐམས་ཅད་ཀྱིས་ནི་དེ་བཞིན་གཤེགས་པའི་ཡུལ་མཐོང་བར་ཡང་མི་ནུས། དེ་བཞིན་གཤེགས་པ་ལ་བལྟ་བར་ཡང་མི་ནུས་སོ། །བྲམ་ཟེ་ཆེན་པོ་ལྷ་སྦྱིན་གྱིས་དེ་བཞིན་གཤེགས་པའི་གནོད་པ་བཟོད་པར་ཡང་ནུས་སོ། །དེ་བཞིན་གཤེགས་པའི་ཡོན་ཏན་གྱི་ཆེ་བ་ཉིད་ཀྱང་རྟོགས་སོ། །ཉན་ཐོས་དང་། རང་སངས་རྒྱས་ཐམས་ཅད་ཀྱི་ཡུལ་མ་ཡིན་པ་དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་ལ་ཡང་རྣམ་པར་འཕྲུལ་པར་བྱེད་དོ། །དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཡང་དག་པར་སྟོན་པར་ཡང་ནུས་སོ། །དེ་བཞིན་གཤེགས་པའི་ཡུལ་དང་འདྲ་བའི་སྐྱེས་བུ་ཆེན་པོ་ཡིན་པར་ཡང་བལྟ་བར་བྱའོ། །འདུལ་བའི་དབང་གིས་དེ་བཞིན་གཤེགས་པ་གང་དང་གང་དུ་སྣང་བར་འགྱུར་བ་དེ་དང་དེར་སྐྱེས་བུ་ཆེན་པོ་དེ་ཡང་དེ་བཞིན་གཤེགས་པའི་ཕྱི་བཞིན་དུ་འབྲང་ཞིང་སྣང་བར་འགྱུར་རོ། །བྲམ་ཟེ་ཆེན་པོ་དེ་བཞིན་གཤེགས་པའི་ཡུལ་ནི་ཁོ་བོ་ཅག་གིས་ཀྱང་བསྟན་པར་མི་ནུས་ཏེ། དེ་བཞིན་གཤེགས་པའི་ཐབས་ཡིན་པར་བལྟ་བར་བྱའོ། །དེ་བཞིན་གཤེགས་པའི་ལྡེམ་པོ་ངག་གི་སྒོའི་ཡུལ་གྱི་ཆོས་བསྟན་པ་ལ་ལྟོས།