།དེ་བཞིན་གཤེགས་པའི་ལྡེམ་པོ་ངག་གི་སྒོའི་ཡུལ་གྱི་ཆོས་བསྟན་པ་ལ་ལྟོས། དེ་ནས་དེའི་ཚེ་འཁོར་ཐམས་ཅད་ཀྱིས་བཅོམ་ལྡན་འདས་ལ་མཆོད་པ་ཆེན་པོའི་ལས་བྱས་ནས་ཁ་འཐུན་པར་ཚིགས་སུ་བཅད་པ་འདི་སྨྲས་སོ། །བདུད་རྣམས་བྱེ་བ་ཕྲག་བརྒྱས་ཀྱང་། །དགེ་འདུན་དབྱེ་བར་མི་ནུས་ཏེ། །སེམས་ཅན་རྣམས་ལ་སྨན་སླད་དུ། །ལས་ཀྱི་རྒྱུ་བའང་སྟོན་པར་མཛད། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྤྲིན་ཆེན་སྙིང་པོ་ལ་འདི་སྐད་ཅེས་བཀའ་སྩལ་ཏོ། །སྤྲིན་ཆེན་སྙིང་པོ་ལེགས་སོ་ལེགས་སོ། །དེ་དེ་བཞིན་ཏེ། སྤྲིན་ཆེན་སྙིང་པོ་དེ་བཞིན་གཤེགས་པའི་ཡུལ་ཉན་ཐོས་དང་། རང་སངས་རྒྱས་ཐམས་ཅད་དང་མི་མཚུངས་པ་དང་། ལྷ་སྦྱིན་གྱི་ཡོན་ཏན་གྱི་ཆེ་བ་ཉིད་དེ་བཞིན་གཤེགས་པའི་ལྡེམ་པོ་ངག་གི་གཞི་གཞག་པའི་ཕྱི་རོལ་གྱི་སེམས་ཅན་ཐམས་ཅད་ཀྱི་ཐེ་ཙོམ་གཅད་པའི་ཕྱིར་ཤིན་ཏུ་ལེགས་པར་བཤད་པ་ལེགས་སོ་ལེགས་སོ། །སྤྲིན་ཆེན་སྙིང་པོ་གཞན་ཡང་ཟབ་མོ་བསྟན་པའི་ཆུའི་རྒྱ་མཚོའི་དུས་ཚོད་ཀྱི་ཏིང་ངེ་འཛིན་གྱི་ཡུལ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་རིའི་རྒྱལ་པོ་རི་རབ་དེ་ཙམ་དུ་མཐོ་ཞིང་། དེ་ཙམ་དུ་རྒྱ་ཆེ་ལ། དེ་ཙམ་དུ་ཡུལ་དུ་བྱས་པ། དེ་ཙམ་དུ་བཙན་པ་ཡུངས་འབྲུའི་ནང་དུ་ཆུད་པར་བྱེད་དེ། འོན་ཀྱང་ཡུངས་འབྲུའི་ནང་ན་ཡང་སྐྱེ་བར་མི་འགྱུར་ཞིང་། བྱ་བ་བྱེད་པ་དེ་དག་ཀྱང་སྣང་ལ། རྒྱལ་ཆེན་བཞི་པ་དང་། སུམ་ཅུ་རྩ་གསུམ་པ་རྣམས་ཀྱིས་ཀྱང་བདག་ཅག་གང་དུ་བཅུག་པ་དང་། བདག་ཅག་གང་ན་འཁོད་པ་ཡང་མི་ཚོར་རོ། །སེམས་ཅན་གཞན་དག་གིས་ནི་རིའི་རྒྱལ་པོ་རི་རབ་ཡུངས་འབྲུའི་ནང་དུ་བཅུག་པར་ཡང་ཤེས་ཤིང་མཐོང་ངོ་། །སྤྲིན་ཆེན་སྙིང་པོ་ཟབ་མོ་བསྟན་པའི་ཆུའི་རྒྱ་མཚོའི་དུས་ཚོད་ཀྱི་ཏིང་ངེ་འཛིན་གྱི་རྣམ་པར་ཐར་པའི་ཡུལ་ལ་འཇུག་པ་ལ་ལྟོས། སྤྲིན་ཆེན་སྙིང་པོ་གཞན་ཡང་ཟབ་མོ་བརྟན་པའི་ཆུའི་རྒྱ་མཚོའི་དུས་ཚོད་ཀྱི་ཏིང་ངེ་འཛིན་གྱི་ཡུལ་ལ་གནས་པའི་བྱང་ཆུབ་སེམས་དཔའ་ནི་རྒྱ་མཚོ་ཆེན་པོ་བཞིའི་ཆུའི་ཕུང་པོ་འདི་བ་སྤུ་གཅིག་གི་ཁུང་དུ་ཆུད་པར་བྱེད་དེ། འོན་ཀྱང་ཉ་དང་། རུ་སྦལ་དང་། སྦལ་པ་དང་། ཆུ་སྲིན་བྱིས་པ་གསོད་དང་ཆུ་སྲིན་དང་ཆུ་སྲིན་ས་ལ་པ་དང་། ཨོ་ད་ཀ་དང་། ཆུ་སྦྲུལ་དང་། ཏི་རི་ཀ་ར་ལ་སོགས་པ་དང་། དེ་བཞིན་དུ་ཆུའི་སྲོག་ཆགས་གཞན་དག་ལ་ཡང་གནོད་པར་འགྱུར་བ་མེད་དོ།