།འཇམ་དཔལ་དེ་བཞིན་གཤེགས་པ་དེའི་འཇིག་རྟེན་གྱི་ཁམས་དེ་རིན་པོ་ཆེ་སྣ་བདུན་ལས་གྲུབ་པའི་པད་མ་དག་གིས་རྒྱས་པར་གྱུར་ཏེ། པད་མ་དེ་དག་གི་དབུས་ནས་བྱང་ཆུབ་སེམས་དཔའ་དེ་དག་སྐྱིལ་མོ་ཀྲུང་བཅས་བཞིན་དུ་བྱུང་ལ། པད་མ་དེ་དག་ལས་ཀྱང་འོད་ཟེར་བྱུང་ངོ་། །བྱང་ཆུབ་སེམས་དཔའ་དེ་དག་གིས་འོད་ཟེར་དེ་དག་ལས་སྤྲུལ་པ་སྤྲུལ་པར་བྱེད་དེ། སྤྲུལ་པ་དཔག་ཏུ་མེད་པ་དག་སྤྲུལ་པར་བྱེད་ཅིང་སྤྲུལ་པས་ཆོས་ཀྱང་སྟོན་ཏོ། །འཇམ་དཔལ་འོད་ཟེར་དེ་དག་གིས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་དྲུག་ཅུ་སྙེད་དག་སྣང་བས་གསལ་བར་བྱས་སོ། །འཇམ་དཔལ་དཔེར་ན་སྟོན་ཀའི་དུས་སུ་ནམ་མཁའ་དག་ཅིང་དྲི་མ་མེད་ལ་ཆར་སྤྲིན་མེད་པ། ཟླ་བ་ཡར་གྱི་ཚེས་བཅྭ་ལྔའི་ནམ་གྱི་གུང་ཐུན་ལ་ཟླ་བའི་དཀྱིལ་འཁོར་སྤྲིན་མེད་ཟླ་བའི་འོད་ཟེར་གྱིས་ཀུན་དུ་གསལ་བར་སྣང་བ་དེའི་ཚེ་འཛམ་བུའི་གླིང་ཁོར་ཡུག་ཏུ་སྣང་བས་ཤིན་ཏུ་ཁྱབ་པར་འགྱུར་རོ། །འཇམ་དཔལ་དེ་བཞིན་དུ་འཇིག་རྟེན་གྱི་ཁམས་ཟླ་འཕགས་འོད་ཟེར་དེ་ཁོར་ཡུག་ཏུ་ཡང་སྣང་བས་ཤིན་ཏུ་ཁྱབ་པར་འགྱུར་རོ། །དེ་བཞིན་དུ་ཤར་དང་། ལྷོ་དང་། ནུབ་དང་། བྱང་དང་། དེ་བཞིན་དུ་སྟེང་དང་། དེ་བཞིན་དུ་འོག་དང་། དེ་བཞིན་དུ་ཕྱོགས་མཚམས་དང་། དེ་བཞིན་དུ་ཕྱོགས་བཅུའི་འཇིག་རྟེན་དག་ཏུ་ཡང་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་དྲུག་ཅུ་སྙེད་དག་སྣང་བས་གསལ་བར་བྱས་སོ། །འཇམ་དཔལ་རྒྱུ་དེས་ན་འཇིག་རྟེན་གྱི་ཁམས་མི་མཇེད་ཀྱི་མིང་ཟླ་འཕགས་འོད་ཟེར་ཅེས་བྱའོ། །འཇམ་དཔལ་དེ་བཞིན་གཤེགས་པ་དེ་ཆོས་སྟོན་པའི་སྤྱི་བོ་ནས་པད་མ་བྱུང་སྟེ། པད་མ་དེ་དག་ལས་འོད་ཟེར་བྱུང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བར་བྱས་སོ། །འོད་ཟེར་དེ་དག་ལས་ཀྱང་སངས་རྒྱས་ཀྱི་སྐུ་བྱུང་སྟེ། སངས་རྒྱས་ཀྱི་སྐུ་དེ་དག་གིས་ཀྱང་དེ་བཞིན་གཤེགས་པ་དེ་ལ་པད་མ་དག་གིས་གཏོར་ཏོ། །མངོན་པར་གཏོར་ཏོ། །འཇམ་དཔལ་པད་མ་གཏོར་བ་དེ་དག་ཉིད་ཀྱང་དེ་བཞིན་གཤེགས་པའི་སྐུར་གནས་སོ། །འཇམ་དཔལ་འདི་ལྟར་བཅོམ་ལྡན་འདས་དེའི་སྔོན་གྱི་སྨོན་ལམ་གྱི་རྒྱུས་ན། བཅོམ་ལྡན་འདས་དེ་པད་མ་མངོན་འཕགས་ཞེས་བྱའོ། །འཇམ་དཔལ་དེ་ནས་ངས་དེ་བཞིན་གཤེགས་པ་པད་མ་མངོན་འཕགས་འོད་ཟེར་རོལ་པ་དེ་ལ་འདི་སྐད་ཅེས་སྨྲས་སོ།