ཤེས་རབ་འཆལ་པར་གྱུར་པ་གང་ཡིན་པ་དེ་དག་གིས་མཐོང་ནས་དེ་དག་གད་མོ་ཆེན་པོའི་གད་རྒྱངས་དག་རྒོད་པར་འགྱུར་རོ། །དེ་ཅིའི་ཕྱིར་ཞེ་ན། ཇི་ལྟར་ཡང་བྱིས་པའི་རང་བཞིན་ཉིད་ཡིན་པའི་ཕྱིར་རོ། །མཁས་པ་ཤེས་རབ་རྣོན་པོའི་རང་བཞིན་ཅན་གང་ཡིན་པ་དེ་དག་ནི་འདི་སྐད་ཅེས་བླུན་པོ་འདི་དག་དེ་ལ་ཇི་ཞིག་ཐེ་ཚོམ་ཟ་ན་གད་མོ་ཆེན་པོའི་གད་རྒྱངས་དག་རྒོད་ཅེས་སྨྲ་བ་དེ་བཞིན་དུ། ཤཱ་རིའི་བུ་དེའི་ཚེ་སྟོང་པ་ཉིད་རབ་ཏུ་སྟོན་པར་འགྱུར་བའི་དགེ་སློང་གང་ཡིན་པ་དེ་དག་ལ་འཚོ་བ་དོན་དུ་གཉེར་བ་དེ་དག་འཕྱ་བར་སེམས་པར་འགྱུར་རོ། །དེ་ཅིའི་ཕྱིར་ཞེ་ན། ཇི་ལྟར་ཡང་དེ་ལ་མ་བསླབས་པ་ཉིད་ཡིན་པའི་ཕྱིར་དང་། དེ་དག་སངས་རྒྱས་ཀྱི་གསུང་སྟོང་པ་ཉིད་འདི་ཐོས་ན་སྐྲག་པར་འགྱུར་བའི་ཕྱིར་རོ། །ཤཱ་རིའི་བུ་སྐྱེས་བུ་བླུན་པོ་དེ་དག་ཡུན་ཇི་སྲིད་ཅིག་ཏུ་ཆུད་ཟོས་པ་ལ་ལྟོས། འདི་ལྟར་བདེ་ལེགས་གང་ཡིན་པ་ལ་ནི་ཅི་ནས་ཀྱང་བདེ་ལེགས་མ་ཡིན་པའི་འདུ་ཤེས་འབྱུང་ཞིང་འཇིགས་པ་མ་ཡིན་པ་ལ་ནི་འཇིགས་པའི་འདུ་ཤེས་འབྱུང་ངོ་། །ཤཱ་རིའི་བུ་དེའི་ཚེ་དགེ་སློང་དག་དགེ་བའི་ཆོས་རྣམས་ལ་ཕན་པ་མ་ཡིན་པའི་འདུ་ཤེས་དང་། མི་དགེ་བའི་ཆོས་རྣམས་ལ་ཕན་པའི་འདུ་ཤེས་ཕྱིན་ཅི་ལོག་ཏུ་འཛིན་པ་དག་འབྱུང་བར་འགྱུར་རོ། །ཤཱ་རིའི་བུ་དགེ་སློང་དེ་དག་ནི་རྙེད་པ་ལ་གདུ་བ་དང་། འདོད་ཆགས་ཆེ་བ་དང་། ཞེ་སྡང་ཆེ་བ་དང་། གཏི་མུག་ཆེ་བ་དང་། མི་དགེ་བའི་རྩ་བ་གསུམ་ཡང་དག་པར་བླངས་ཏེ་འཇུག་པར་འགྱུར་རོ། །ཤཱ་རིའི་བུ་དེ་ལ་ངས་དགེ་སློང་ཚུལ་ཁྲིམས་དང་ལྡན་པ་དག་རྗེས་སུ་གཟུང་བ་ལ་ལྟོས་ནས། ལྷག་པའི་ཚུལ་ཁྲིམས་ཀྱི་བསླབ་པའི་གཞི་བཅས་པ་དང་སོ་སོར་ཐར་པའི་མདོ་བསྟན་པ་གང་ཡིན་པ་དེ། དེའི་ཚེ་དེ་དག་གིས་འཇིག་རྟེན་གྱི་ཟང་ཟིང་གི་ཆེད་དུ་ཁྱིམ་པ་ལ་བརྗོད་པར་འགྱུར་རོ། །གླེགས་བམ་དུ་བྱས་ཏེ་ཁྱིམ་པ་ལ་སྦྱིན་པར་སེམས་སོ། །ཤཱ་རིའི་བུ་དེ་ལ་སྐྱེས་བུ་དམ་པ་མ་ཡིན་པ་དེ་ལྟ་བུ་དག་ལ་ནི་སྟོང་པ་ཉིད་ཀྱིས་ཅི་བྱར་ཡོད། རང་གི་མཚན་ཉིད་ཀྱིས་སྟོང་པའི་ཆོས་རྣམས་ཀྱིས་ཅི་བྱར་ཡོད། དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་སྐྱེས་བུ་བླུན་པོ་དེ་དག་ནི་ཆགས་པ་སྤང་བའི་ཕྱིར་བརྩོན་པར་མི་ནུས་ན། མ་རིག་པ་སྤང་བའི་ཕྱིར་བརྩོན་པར་བྱ་བ་ལྟ་ཅི་སྨོས་ཏེ། དེ་ནི་གནས་ཡོད་པ་མ་ཡིན་ནོ། །ཤཱ་རིའི་བུ་དེའི་ཚེ་མ་བསླབས་པའི་དགེ་སློང་འདུལ་བ་འཛིན་པ་དག་འབྱུང་ངོ་།