འཇིག་རྟེན་ན་ལེགས་པར་གསུངས་པ་གང་ཡིན་པ་ལན་པར་མི་བྱེད་དོ། །ཤཱ་རིའི་བུ་དེ་ལྟ་བས་ན་བཅོམ་ལྡན་འདས་འོད་སྲུང་གིས་མ་འོངས་པའི་དུས་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་དེའི་ཉན་ཐོས་རྣམས་འཇིག་རྟེན་གྱི་ཟང་ཟིང་གི་ཕྱིར་ཁྱིམ་པ་དང་རབ་ཏུ་བྱུང་བ་དག་ལ་དོན་དམ་པ་སྟོང་པ་ཉིད་རབ་ཏུ་སྟོན་པར་འགྱུར་རོ། །དེ་ལ་ཁྱིམ་པ་དང་། རབ་ཏུ་བྱུང་བ་བྱིས་པ་ཤེས་རབ་འཆལ་པའི་རང་བཞིན་ཅན་དེ་དག་སྨོད་པར་འགྱུར་ཡིད་མི་ཆེས་པར་འགྱུར་ཏེ། དེ་དག་དཔལ་ཆེན་པོ་དབྱུག་པས་སྐྲོད་པར་འགྱུར་རོ། །དེའི་རྒྱུས་ཡང་ངན་སོང་དུ་འདོང་བར་འགྱུར་རོ་ཞེས་ལུང་བསྟན་ཏེ། ཤཱ་རིའི་བུ་དེའི་ཚེ་མི་འཐུན་པའི་གཏམ་རྣམས་ལ་ཤིན་ཏུ་གནས་པར་འགྱུར་ཞིང་དེ་ལ་ཡང་སྙིང་པོའི་འདུ་ཤེས་སུ་བྱེད་པར་འགྱུར་རོ། །སངས་རྒྱས་ཀྱི་གསུང་དོན་དམ་པ་སྤོང་ཞིང་ཐོས་ནས་ཡང་སྐྲག་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེའི་ཚེ་བདག་ཏུ་སྨྲ་བ་དང་། སེམས་ཅན་དུ་སྨྲ་བ་དང་། གང་ཟག་གི་འདུ་ཤེས་ཅན་དུ་གྱུར་པ་དང་། འདུན་པ་ཞན་པ་དང་། ལེ་ལོ་དང་། སྙོམ་ལས་དང་། རྙེད་པ་ལ་གདུ་བ་དང་། འདོད་ཆགས་ཆེ་བ་དང་། ཞེ་སྡང་ཆེ་བ་དང་། གཏི་མུག་ཆེ་བ་དང་། རྙེད་པ་དང་བཀུར་སྟི་འདོད་པ་དང་། མཁས་པའི་ང་རྒྱལ་དང་། བྱིས་པ་དང་། གཞུང་འབྱེད་པ་དང་། རྩོད་པ་ཆེད་ཆེར་བྱེད་པ་དང་། ཕན་ཚུན་དུ་བྱམས་པའི་སེམས་མེད་པ་དང་། དགེ་སྦྱོང་གི་ཆོས་ཀྱིས་སྟོང་པ་དང་། རྙེད་པ་དང་བཀུར་སྟི་ཁོ་ན་ལ་མངོན་པར་དགའ་བར་གྱུར་པ་དང་། ལས་ཀྱི་མཐའ་མང་བ་དང་། བུད་མེད་ཀྱི་བློ་གྲོས་བྱེད་པར་གྱུར་པ་དང་། གཞན་གྱི་སྐྱོན་ཚོལ་བར་གྱུར་པ་དང་། ཇི་ལྟར་ཡང་བདག་ཉིད་མ་བསླབས་པས་རང་གི་སྐྱོན་འཆབ་པ་དང་། སྡིག་པ་སྦེད་ཅིང་དགེ་བ་སྤྱོམས་པར་གྱུར་པའི་ཕྱིར་རོ། །ད་ལྟར་གྱི་ཡོངས་སུ་དག་པ་སྡིག་པ་བསལ་བ། དགེ་བའི་ཆོས་ཀྱིས་གནས་པ་གང་ཡིན་པ་དེ་དག་ནི་དེའི་ཚེ་བསླབ་པའི་ཚིག་རྣམས་སྲོག་གི་ཕྱིར་ཡང་འདས་པར་སྦས་ཏེ་སྟོན་པར་མི་འགྱུར་རོ། །ཤཱ་རིའི་བུ་དེ་ལྟར་མ་སྦས་པའི་ཚུལ་ཁྲིམས་ཅན་རྣམས་ལ་ནི་སྟོང་པ་ཉིད་ཀྱིས་བྱར་ཅི་ཡོད། རང་གི་མཚན་ཉིད་ཀྱིས་སྟོང་པའི་ཆོས་རྣམས་ཀྱིས་བྱར་ཅི་ཡོད། དཔེར་ན་རིགས་ཀྱི་བུ་དག་གིས་རོལ་མོའི་གནས་སུ་སྒྱུ་མར་གཏོགས་པའི་རྣམ་པ་དུ་མ་དག་ཉེ་བར་བསྟན་པ་ན་དེ་ན་བྱིས་པ་ཞུམ་པ། རྨོངས་པ། ཤེས་རབ་འཆལ་པར་གྱུར་པ་གང་ཡིན་པ་དེ་དག་གིས་མཐོང་ནས་དེ་དག་གད་མོ་ཆེན་པོའི་གད་རྒྱངས་དག་རྒོད་པར་འགྱུར་རོ།