།ཤཱ་རིའི་བུ་དེའི་ཚེ་མ་བསླབས་པའི་དགེ་སློང་འདུལ་བ་འཛིན་པ་དག་འབྱུང་ངོ་། །མ་བསླབས་པའི་ཆོས་ཀྱི་གཏམ་དང་ལྡན་པ་དང་། མ་བསླབས་པའི་དགེ་སློང་མདོ་སྡེ་དང་ལྡན་པ་དག་ཕལ་ཆེར་འབྱུང་ངོ་། །ཤཱ་རིའི་བུ་དེའི་ཚེ་མ་བསླབས་པའི་དགེ་སློང་འདུལ་བ་འཛིན་པ་འབྱུང་བ་ནི་གང་། མ་བསླབས་པའི་ཆོས་ཀྱི་གཏམ་དང་ལྡན་པ་འབྱུང་བ་ནི་གང་། མ་བསླབས་པའི་དགེ་སློང་མདོ་སྡེ་དང་ལྡན་པ་འབྱུང་བ་ནི་གང་ཞེ་ན། ཤཱ་རིའི་བུ་འདི་ལ་བསླབ་པ་ནི་གསུམ་སྟེ། གསུམ་གང་ཞེ་ན། འདི་ལྟ་སྟེ། ལྷག་པའི་ཚུལ་ཁྲིམས་ཀྱི་བསླབ་པ་དང་། ལྷག་པའི་སེམས་ཀྱི་བསླབ་པ་དང་། ལྷག་པའི་ཤེས་རབ་ཀྱི་བསླབ་པ་སྟེ། ཤཱ་རིའི་བུ་དེ་བཞིན་གཤེགས་པས་གསུངས་པའི་བསླབ་པ་གསུམ་ནི་འདི་དག་ཡིན་ནོ། །དེ་དག་གིས་བསླབ་པ་གསུམ་པོ་འདི་དག་ལ་མ་བསླབས་པར་ཐོས་པ་ཙམ་གྱིས་གཞན་ལ་ཁྱད་དུ་གསོད་པར་བྱེད་དེ། དེ་ཉིད་སྐྱེས་བུ་བླུན་པོ་དེ་དག་གི་བར་དུ་གཅོད་པར་འགྱུར་རོ། །སྐྱེས་བུ་དེ་དག་ནི་ཆོས་དང་འཐུན་པས་ཐེ་ཚོམ་དྲིས་ན་ཡང་ལན་ཐེབས་པར་མི་འགྱུར་ན། དམིགས་སུ་མེད་པ་སྟོང་པ་ཉིད་ཀྱི་ཆོས་རྣམས་ལ་བརྩོན་འགྲུས་བརྩམ་པ་ལྟ་ཅི་སྨོས་ཏེ། དེ་ནི་གནས་ཡོད་པ་མ་ཡིན་ནོ། །ཤཱ་རིའི་བུ་དེ་ལ་ཚུལ་ཁྲིམས་རལ་པའི་དགེ་སློང་གང་ཡིན་པ་དེ་དག་འབྱུང་བར་འགྱུར་ཏེ། དེ་དག་ཁྱིམ་པའི་ལས་ཀྱི་མཐའ་རྣམས་བྱེད་པར་འགྱུར་རོ། །ཕོ་ཉའི་ལས་ཀྱིས་འཚོ་བར་རྟོག་པར་འགྱུར་རོ། །སྨན་པའི་ཐ་སྙད་ཀྱིས་འཚོ་བར་རྟོག་པར་འགྱུར་རོ། །ཤཱ་རིའི་བུ་ངའི་བསྟན་པ་ལ་རབ་ཏུ་བྱུང་ནས། ངའི་བྱང་ཆུབ་ཀྱིས་འཚོ་བར་བྱེད་དེ། དེ་བཞིན་གཤེགས་པ་ལ་སྐྱེ་བ་དང་བཅས་པས་ཀུན་ཏུ་སྤྱོད་པར་འགྱུར་བ་ལ་ལྟོས། ཤཱ་རིའི་བུ་དེའི་ཚེ་རྒྱལ་པོ་ཆེན་པོ་བཞི་དང་། ལྷ་རྣམས་ཀྱི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། གཞན་ཡང་ལྷ་སྟོང་ཕྲག་མང་པོ་དག་དེ་ལྟ་བུའི་གསུང་རབ་ལ་རྣམ་པ་དུ་མར་གྱེས་པ་མཐོང་ནས་སྨྲེ་སྔགས་ཆེན་པོས་སྨྲེ་སྔགས་འདོན་པར་འགྱུར་རོ། །ཤཱ་རིའི་བུ་ང་ལ་བརྟེན་ནས་ཁྱིམ་པའི་གོ་རེ་ལོང་བྱེད་པར་འགྱུར་བ་གང་ཡིན་པ་དེ་ནི་འཚམ་པ་མ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་ངའི་ཉན་ཐོས་རྣམས་ནི་ལྷའམ། ཀླུའམ། གནོད་སྦྱིན་སུ་ལ་ཡང་ཉེ་གནས་ཀྱིས་ཡོངས་སུ་སྤྱོད་པར་བྱེད་པ་མ་ཡིན་ནོ།