མཆོད་པ་མ་བྱས་པ་ཡིན། བསྙེན་བཀུར་མ་བྱས་པ་ཡིན་ཏེ། ཆོས་ལ་མ་ཡིན། དགེ་འདུན་ལ་མ་ཡིན་ཞིང་། དེ་བཞིན་གཤེགས་པའི་བསླབ་པ་རྣམས་ཕྱེ་མར་འཐག་པར་བྱེད་པས་དེ་ནི་གཞན་མུ་སྟེགས་ཅན་དགེ་སྦྱོང་ལྟར་བཅོས་པའི་ཆོས་ཀྱི་རྐུན་པོར་གནས་པ་ཡིན་ནོ། །ཤཱ་རིའི་བུ་མ་འོངས་པའི་དུས་ན་དགེ་སློང་ལུས་མ་བསྒོམས་པ། ཚུལ་ཁྲིམས་མ་བསྒོམས་པ། སེམས་མ་བསྒོམས་པ། ཤེས་རབ་མ་བསྒོམས་པ་དག་འབྱུང་བར་འགྱུར་ཏེ། དེ་དག་དེ་བཞིན་གཤེགས་པའི་གསུང་ལ་འཕྱ་བར་འགྱུར་ཅོ་འདྲི་བར་འགྱུར་རོ། །དེ་བཞིན་གཤེགས་པའི་གནས་པ་གང་ལ་དེ་བཞིན་གཤེགས་པ་གུས་པ་དང་བཅས་པ་འཛེམ་པ་དང་བཅས་པ། དོན་དམ་པ་སྟོང་པ་ཉིད་ལ་རྟག་པར་རྒྱུན་དུ་དོན་དམ་པ་སྟོང་པ་ཉིད་ཀྱི་གནས་པ་འདིས་གནས་པ་ལ་ཁྱད་དུ་གསོད་པར་འགྱུར་རོ། །དེ་དག་དེའི་ཚེ་ཡང་དག་པའི་མཐའི་དེ་བཞིན་གཤེགས་པའི་གནས་པ་སྟོང་པ་ཉིད་དེ་ལ་འཕྱ་བར་འགྱུར། ཅོ་འདྲི་བར་འགྱུར། ཁྱད་དུ་གསོད་པར་འགྱུར་རོ། །ཤཱ་རིའི་བུ་དེའི་ཚེ་སྟོང་པ་ཉིད་ལ་མི་གནས་པའི་དགེ་སློང་མང་དུ་འབྱུང་བར་འགྱུར་ཏེ། དེ་དག་དེའི་ཚེ་འཕྱ་བར་འགྱུར། ཅོ་འདྲི་བར་འགྱུར། ཁྱད་དུ་གསོད་པར་འགྱུར་རོ། །ཤཱ་རིའི་བུ་དེ་བཞིན་གཤེགས་པས་སྟོང་པ་ཉིད་ཀྱིས་གནས་པ་གང་ཡིན་པ་དེ་དག་ལ་དེ་ལྟར་ལེགས་ས་ཞེས་བྱ་བས་སྤྲོ་བར་མཛད། ཚིག་བཞིན་དུ་མཛད་དོ། །དེའི་ཚེ་འཚོ་བ་དོན་དུ་གཉེར་བ་དེ་དག་ནི་ཁ་ཟས་ཁོ་ན་ཀུན་དུ་ཚོལ་བ་ན། གང་ཟག་ཏུ་འཛིན་པས་སྐྱེ་བོ་དགའ་བར་བྱ་བར་སེམས་པར་འགྱུར་རོ། །ཤཱ་རིའི་བུ་དེའི་ཚེ་དགེ་སློང་གང་དག་སྟོང་པའི་ཆོས་རྣམས་ལ་ཆོས་རྣམས་ནི་སྟོང་པའོ་ཞེས་རབ་ཏུ་སྟོན་པར་འགྱུར་བ་དང་། བདག་མེད་པའི་ཆོས་རྣམས་ལ་ཆོས་རྣམས་ནི་བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གང་ཟག་མེད་པའི་ཆོས་རྣམས་ལ་ཆོས་རྣམས་ནི་གང་ཟག་མེད་དོ་ཞེས་སྟོན་པར་འགྱུར་བ་དེ་དག་ཀུན་ཏུ་འཚོ་བ་པ་དེ་དག་གིས་ཤིན་ཏུ་ཟིལ་གྱིས་མནན་པར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ་དེ་ནི་སེམས་ཅན་རྣམས་ཀྱི་དགེ་བའི་རྩ་བ་ཀུན་ཏུ་གཅོད་པའི་སྔོན་དུ་འགྲོ་བའི་མཚན་མ་དང་པོ་ནི་དེ་ཡིན་ཏེ། བྱིས་པའི་རང་བཞིན་ཅན་དག་ཙན་དན་ཤིང་གི་རིན་ཐང་དུ་འཚོང་བ་བཞིན་དུ། འཇིག་རྟེན་ན་ལེགས་པར་གསུངས་པ་གང་ཡིན་པ་ལན་པར་མི་བྱེད་དོ།