དེ་དག་དེ་བཞིན་གཤེགས་པས་གནས་འཆར་གཞུག་པའི་འོས་སུ་གསུངས་པ་ཡིན་ནོ། །ཤཱ་རིའི་བུ་གཞན་མུ་སྟེགས་ཅན་གྱི་སྨྲ་བ་གང་ཞེ་ན། གང་དག་སྲིད་པའི་འདུ་ཤེས་དང་། བདག་གི་འདུ་ཤེས་དང་། སེམས་ཅན་གྱི་འདུ་ཤེས་དང་། སྲོག་གི་འདུ་ཤེས་དང་། གང་ཟག་གི་འདུ་ཤེས་དང་། དམིགས་པ་ཅན་གྱི་འདུ་ཤེས་དང་། དམིགས་པ་ཅན་གྱི་བྱ་བ་ལ་བྱིང་བ་དང་། ལམ་གོལ་བ་འཛིན་པ་དང་། རང་གི་མཚན་ཉིད་ཀྱིས་སྟོང་པའི་ཆོས་རྣམས་ལ་ཡིད་གཉིས་དང་། ཐེ་ཙོམ་ཟ་བ་དང་། འཛིན་པ་སྣ་ཚོགས་དང་། ཡང་དག་པ་མ་ཡིན་པ་ལ་ཆགས་པས་གནས་ཀྱི། དོན་དམ་པ་སྟོང་པ་ཉིད་ལ་ནི་མི་འཇུག་པ་སྟེ། ཕྱིན་ཅི་ལོག་ཏུ་གྱུར་པས་དེས་ན་གཞན་མུ་སྟེགས་ཅན་ཞེས་བྱའོ། །ཤཱ་རིའི་བུ་དེ་བས་ན་ཆོས་གོས་ལ་གནས་འཆར་གཞུག་པ་མ་ཡིན་ཞིང་། ཁ་དོག་གི་རིགས་རྣམ་པ་སྣ་ཚོགས་ཀྱི་འོས་ཀྱང་མ་ཡིན་ནོ། །ཤཱ་རིའི་བུ་ཁྱིམ་པའམ་ངུར་སྨྲིག་བགོས་པ་སུ་ཡང་རུང་། འདི་ལྟ་བུའི་དམིགས་པ་ཅན་གྱི་ལྟ་བ་ཡོད་པ་དེ་དག་ཐམས་ཅད་ནི་དེ་བཞིན་གཤེགས་པས་གཞན་མུ་སྟེགས་ཅན་དག་ཡིན་ནོ་ཞེས་གསུངས་སོ། །དེ་དག་ནི་ཆོས་འདུལ་བ་འདི་ལ་རབ་ཏུ་འབྱུང་བར་འདོད་ན་གནས་འཆར་གཞུག་པའི་འོས་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་དམིགས་པའི་ལྟ་བ་ནི་ལོག་པར་ལྟ་བ་ཡིན་པའི་ཕྱིར་རོ། །དེ་ནི་ཆོས་འདུལ་བ་འདི་ལ་བྱ་བ་ལ་བྱིང་བ་ཡིན་ནོ། །དེ་ནི་དེ་བཞིན་གཤེགས་པའི་ཆོམ་རྐུན་པ་ཆེན་པོ་འཁྲུག་ལོང་པ་ཡིན་ནོ། །ཤཱ་རིའི་བུ་ང་ནི་ལོག་པའི་ལྟ་བ་ཅན་རབ་ཏུ་འབྱུང་བ་དང་། བསྙེན་པར་རྫོགས་པར་བྱ་བའི་ཕྱིར་སྐབས་དབྱེ་བར་མི་མཛད་དོ། །ཤཱ་རིའི་བུ་གང་ཞིག་ཆོས་ཐམས་ཅད་བདག་མེད་དོ་ཞེས་རྗེས་སུ་འཐུན་པའི་བཟོད་པ་མི་སྐྱེད་པ་དང་། ཆོས་ཐམས་ཅད་སྟོང་པ་དང་། བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གང་ཟག་མེད་པའོ་ཞེས་མ་མོས་ཤིང་མི་འཇུག་པ་དེ་ཆོས་འདུལ་བ་འདི་ལ་རབ་ཏུ་འབྱུང་ཞིང་རབ་ཏུ་འབྱུང་ནས་ཆོས་ཐམས་ཅད་བདག་མེད་པ། སེམས་ཅན་མེད་པ། སྲོག་མེད་པ། གང་ཟག་མེད་པ། དོན་དམ་པ་སྟོང་པ་ཉིད་ཐོས་ན་མ་མོས་ཤིང་མི་འཇུག་ན། དེ་མི་དབང་བར་དད་པས་བྱིན་པ་ལ་ཡོངས་སུ་ལོངས་སྤྱོད་པར་བྱེད་པས། དེས་སངས་རྒྱས་ལ་བཀུར་སྟིར་མ་བྱས་པ་ཡིན། བླ་མར་མ་བྱས་པ་ཡིན། རྗེད་པ་མ་བྱས་པ་ཡིན། མཆོད་པ་མ་བྱས་པ་ཡིན།