འཁྲུག་ལོང་པ་སུ་ཡང་རུང་མི་རྒྱུ་བར་བྱ་བའི་ཕྱིར་དེ་ཤིན་ཏུ་བསྲུངས་ཤིང་ཤིན་ཏུ་སྦས་པ་ཡིན་ནོ། །གང་དག་དེ་བཞིན་གཤེགས་པའམ། དེ་བཞིན་གཤེགས་པའི་འཁོར་གྱི་གསང་བའི་དོན་གྱི་གསང་སྔགས་ཀྱི་ཚིག་འདི་དེ་བཞིན་གཤེགས་པའི་གསུང་ལས་ཕྱི་རོལ་དུ་གྱུར་པ། ཚིག་གི་བྱ་བ་མེད་པ་གང་ཡིན་པ་དག་ལ་མི་སྨྲ་བ་སྟེ། ཤཱ་རིའི་བུ་དེ་ལྟར་དེ་བཞིན་གཤེགས་པས་བྱ་བ་ལ་གཞོལ་བ་གཞིའི་ཤེས་རབ་ཆེན་པོས་ཆོས་ཀྱི་གྲོང་ཁྱེར་ཤིན་ཏུ་བསྲུངས་པ་ཡིན་ནོ། །ཤཱ་རིའི་བུ་ཆོས་ཀྱི་གྲོང་ཁྱེར་དེའི་བར་ཆད་བྱེད་པ་གང་ཡིན་པ་དེ་ནི་ད་ལྟར་མེད་དོ། །ཤཱ་རིའི་བུ་ད་ལྟར་ཆོས་ཀྱི་གྲོང་ཁྱེར་དེའི་བར་ཆད་བྱེད་པ་གང་དག་ཡོད་ན། དེ་དག་ནི་འདི་ལ་ཆོམ་རྐུན་པ་ཞེས་བྱའོ། །འཁྲུག་ལོང་པ་ཞེས་བྱའོ། །གང་དག་དེ་བཞིན་གཤེགས་པའམ། དེ་བཞིན་གཤེགས་པའི་འཁོར་གྱི་གསང་བའི་དོན་གྱི་གསང་སྔགས་ཀྱི་ཚིག་འདི་ཕྱི་རོལ་པ་ལ་སྨྲ་ན། དེ་དག་ངའི་སྤྱན་སྔར་ཉེ་བར་འོངས་ཤིང་ལྷགས་ཀྱང་ངས་དེ་དག་ཆོས་དང་འཐུན་པའི་གཏམ་གྱིས་སྡུད་པར་མི་མཛད། དེ་དག་ལ་བྱ་བ་སྟོན་པར་མི་མཛད། དེ་དག་ལ་གསང་བའི་དོན་གྱི་གསང་སྔགས་ཀྱི་ཚིག་བརྗོད་པར་མི་མཛད་དོ། །དེ་དག་ལ་ཡང་བྱ་བ་འདི་དག་ཀུན་ཏུ་ཚོལ་བ་ན། རབ་ཏུ་འབྱུང་བ་དང་། བསྙེན་པར་རྫོགས་པར་བྱ་བའི་ཕྱིར་གླགས་ཚོལ་བར་བྱེད་དོ། །ངས་དེ་དག་བྱ་བ་ལ་མཐུ་ཡོད་པར་མཁྱེན་ནས། སྐབས་དབྱེ་བ་མཛད་དོ། །ཟླ་བ་བཞིའི་གནས་འཆར་གཞུག་གོ་ཞེས་གསུངས་སོ། །དེ་ཅིའི་ཕྱིར་ཞེ་ན། དེ་ཉིད་ཆོས་ཀྱི་གྲོང་ཁྱེར་སྲུང་ཞིང་སྦ་བའི་ཕྱིར་དང་། མ་འོངས་པའི་འཁྲུག་ལོང་བ་རྣམས་བསྲུངས་པ་ཡིན་ནོ། །ཤཱ་རིའི་བུ་དེ་ལྟར་དེ་བཞིན་གཤེགས་པས་ཆོས་ཀྱི་གྲོང་ཁྱེར་ཤིན་དུ་ཡོངས་སུ་བཟུང་བས་དེ་དག་གིས་གླགས་མི་རྙེད་དོ། །དེ་དག་གིས་གླགས་མི་རྙེད་པས་དེ་བཞིན་གཤེགས་པའི་གསུང་འཛིན་ཅིང་སྡིག་པ་ཅན་གྱི་ལྟ་བ་སྤོང་བར་འགྱུར་རོ། །དེ་དག་དེ་ལྟར་སེམས་མགུ་ནས་རབ་ཏུ་དབྱུང་བ་དང་། བསྙེན་པར་རྫོགས་པར་བྱའོ། །དེ་དག་དེ་ལྟར་རབ་ཏུ་ཕྱུང་བ་ན་ལྷ་དང་བཅས་པའི་འཇིག་རྟེན་གྱིས་མི་བསྒུལ་བར་འགྱུར་རོ། །ཤཱ་རིའི་བུ་དེ་བཞིན་གཤེགས་པས་གནས་འཆར་གཞུག་གོ་ཞེས་གསུངས་པའི་འོས་གང་ཞེ་ན། གཞན་མུ་སྟེགས་ཅན་རྣམས་དང་། གཞན་མུ་སྟེགས་ཅན་གྱི་སྨྲ་བ་ལ་དགའ་བ་སུ་ཡང་རུང་བ་དག་སྟེ། དེ་དག་དེ་བཞིན་གཤེགས་པས་གནས་འཆར་གཞུག་པའི་འོས་སུ་གསུངས་པ་ཡིན་ནོ།