Degé Kangyur volume 62, F.37.a

དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །​འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཁོང་ཁྲོ་བ་སྤོང་བ་ལ་གནས་ཀྱིས། གཞན་དག་ཀྱང་ཁོང་ཁྲོ་བ་སྤོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཁོང་ཁྲོ་བ་སྤོང་བ་ནི་དགེ་བའི་ལས་སྐྱེས་པ་རྣམས་ཆུད་མི་གཟོན་པ་གང་ཡིན་པའོ། །​བདག་ནི་ཆོ་ག་ལ་གནས་ཀྱིས། གཞན་དག་ཀྱང་ཆོ་ག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོ་ག་ནི་ངོ་ཚ་ཤེས་པ་དང་ཁྲེལ་ཡོད་པ་གང་ཡིན་པའོ། །​བདག་ནི་བདག་གི་དགེ་བའི་རྩ་བ་ཡང་དག་པར་སྲུང་བ་ལ་གནས་ཀྱིས། གཞན་དག་ཀྱང་རང་གི་དགེ་བའི་རྩ་བ་ཡང་དག་པར་སྲུང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་རང་གི་དགེ་བའི་རྩ་བ་ཡང་དག་པར་སྲུང་བ་ནི་ལས་ཀྱི་བྱ་བ་ལ་འཇུག་པ་གང་ཡིན་པའོ། །​བདག་ནི་གཞན་གྱི་དགེ་བའི་རྩ་བ་ཆུད་མི་གཟོན་པ་ལ་གནས་ཀྱིས། གཞན་དག་ཀྱང་གཞན་གྱི་དགེ་བའི་རྩ་བ་ཆུད་མི་གཟོན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གཞན་གྱི་དགེ་བའི་རྩ་བ་ཆུད་མི་གཟོན་པ་ནི་བྱམས་པ་ཆེན་པོ་དང་སྙིང་རྗེ་ཆེན་པོ་ལ་གནས་པ་གང་ཡིན་པའོ། །​བདག་ནི་སྟོང་པ་ཉིད་ལ་མོས་པ་ལ་གནས་ཀྱིས། གཞན་དག་ཀྱང་སྟོང་པ་ཉིད་ལ་མོས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྟོང་པ་ཉིད་ནི་ལྟ་བར་གྱུར་པའི་རང་བཞིན་གང་ཡིན་པ་སྟེ། ལྟ་བར་གྱུར་པའི་རང་བཞིན་ལས་སྟོང་པ་ཉིད་གཞན་མ་ཡིན་ཏེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །​འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་སྒྲིབ་པ་མེད་པའི་རྣམ་པར་གྲོལ་བའི་



The English translation of this folio by 84000 Translating the words of the Buddha can be found at:
https://read.84000.co/translation/toh201.html?part=UT22084-062-001-781#UT22084-062-001-781