Degé Kangyur volume 62, F.16.a

བདག་ནི་གཞན་གྱི་སེམས་རྗེས་སུ་བསྲུང་བར་བྱ་བ་ལ་གནས་ཀྱིས། གཞན་དག་ཀྱང་གཞན་གྱི་སེམས་རྗེས་སུ་བསྲུང་བར་བྱ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གཞན་གྱི་སེམས་རྗེས་སུ་བསྲུང་བར་བྱ་བ་ནི་ཕ་རོལ་གྱི་འཁྲུལ་པ་ལ་མ་ཁྲོས་པར་སྐུར་བ་གང་ཡིན་པའོ། །​བདག་ནི་སེམས་རབ་ཏུ་དུལ་བ་ལ་གནས་ཀྱིས། གཞན་དག་ཀྱང་སེམས་རབ་ཏུ་དུལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་རབ་ཏུ་དུལ་བ་ནི་སེམས་ཅན་ཡོངས་སུ་སྨིན་པར་བྱེད་པ་ལ་སྐྱོ་བ་བཟོད་པ་གང་ཡིན་པའོ། །​བདག་ནི་ཁྲོ་བ་མེད་པ་ཉིད་ལ་གནས་ཀྱིས། གཞན་དག་ཀྱང་ཁྲོ་བ་མེད་པ་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཁྲོ་བ་མེད་པ་ཉིད་ནི་སེམས་ཅན་ཐམས་ཅད་ལ་ཁོང་ཁྲོ་བ་མེད་པའི་སེམས་ཉིད་གང་ཡིན་པའོ། །​བདག་ནི་བདག་ལ་སོ་སོར་རྟོག་པ་ལ་གནས་ཀྱིས། གཞན་དག་ཀྱང་བདག་ལ་སོ་སོར་རྟོག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བདག་ལ་སོ་སོར་རྟོག་པ་ནི་བདག་ལ་བདག་མེད་པའི་མཚན་ཉིད་གང་ཡིན་པའོ། །​བདག་ནི་ཅི་ཡང་མེད་པ་ལ་གནས་ཀྱིས། གཞན་དག་ཀྱང་ཅི་ཡང་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཅི་ཡང་མེད་པ་ནི་ལུས་ལ་དམིགས་པ་ལས་དབེན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །​འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་མི་སྐྱེ་བའི་བཟོད་པ་ལ་གནས་ཀྱིས། གཞན་དག་ཀྱང་མི་སྐྱེ་བའི་བཟོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མི་སྐྱེ་བའི་བཟོད་པ་ནི་འགོག་པ་མངོན་དུ་བྱེད་པ་གང་ཡིན་པའོ། །​བདག་ནི་འགོག་པ་མེད་པའི་བཟོད་པ་ལ་གནས་ཀྱིས། གཞན་དག་ཀྱང་འགོག་པ་མེད་པའི་བཟོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་འགོག་པ་མེད་པའི་བཟོད་པ་ནི་མི་སྐྱེ་བ་མངོན་དུ་བྱེད་པ་གང་ཡིན་པའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh201.html?part=UT22084-062-001-739#UT22084-062-001-739