Degé Kangyur volume 62, F.54.b

།དེ་བཞིན་གཤེགས་པ་ཁྱིམ་འདི་ན་ཐ་དད་ལ་ཁྱིམ་གཞན་དུ་གནས་པ་མ་ཡིན་ནོ། །​དེ་བཞིན་གཤེགས་པ་ལྷའི་རིས་འདི་ན་ཐ་དད་ལ་ལྷའི་རིས་གཞན་དུ་གནས་པ་མ་ཡིན་ནོ། །​དེ་བཞིན་གཤེགས་པ་དུད་འགྲོའི་སྐྱེ་གནས་སུ་སྐྱེ་བ་འདི་ན་ཐ་དད་ལ་དུད་འགྲོའི་སྐྱེ་གནས་སུ་སྐྱེ་བ་གཞན་དུ་གནས་པ་མ་ཡིན་ནོ། །​དེ་བཞིན་གཤེགས་པ་ཡི་དགས་ཀྱི་འགྲོ་བ་འདི་ན་ཐ་དད་ལ་ཡི་དགས་ཀྱི་འགྲོ་བ་གཞན་དུ་གནས་པ་མ་ཡིན་ནོ། །​དེ་བཞིན་གཤེགས་པ་སེམས་ཅན་དམྱལ་བའི་འགྲོ་བ་འདི་ན་ཐ་དད་ལ་སེམས་ཅན་དམྱལ་བའི་འགྲོ་བ་གཞན་དུ་གནས་པ་མ་ཡིན་ནོ། །​དེ་བཞིན་གཤེགས་པ་འདོད་པའི་ཁམས་ན་ཐ་དད་ལ་གཟུགས་ཀྱི་ཁམས་སུ་གནས་པ་མ་ཡིན་ནོ། །​འཇམ་དཔལ་དེ་བཞིན་གཤེགས་པའི་དབྱེར་མེད་ཅིང་མི་གནས་པ་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་བྱིན་གྱིས་བརླབས་ཀྱང་བསྟན་པར་མི་ནུས་སོ། །​འཇམ་དཔལ་དེ་ལ་དེ་བཞིན་གཤེགས་པའི་སྐུ་ཐོགས་པ་མེད་པ་ནི་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་དག་ན་སངས་རྒྱས་ཀྱི་ཞིང་གང་དག་ཡོད་པ་དེ་དག་གི་ནམ་མཁའ་ཅི་འདྲ་བའི་མཐའ་ནི་ཡོད་སྲིད་ཀྱི། དུས་གསུམ་གྱི་ཕྱོགས་མཐའ་ཡས་པ་དག་ན་རྒྱལ་བའི་གཙུག་ཏོར་འབྱུང་བ་དང་། འཇིག་པར་སྣང་བའི་རྒྱལ་བའི་གཙུག་ཏོར་གྱི་མཐའ་ནི་ཕྱོགས་རྣམས་ན་མི་རྙེད་དོ། །​དེ་དག་གི་ནམ་མཁའ་ཅི་འདྲ་བའི་མཐའ་ནི་ཡོད་སྲིད་ཀྱི། དེ་བཞིན་དུ་རྒྱལ་བའི་མཛོད་སྤུ་དང་། དེ་བཞིན་དུ་མཚན་རེ་རེ་དང་། དེ་བཞིན་དུ་དཔེ་བྱད་བཟང་པོ་རེ་རེ་དང་། དེ་བཞིན་དུ་སྤུའི་ཁུང་བུ་རེ་རེའི་མཐའ་ནི་ཕྱོགས་རྣམས་ན་མི་རྙེད་དོ། །​ལྷ་དང་། མི་དང་། བྱང་ཆུབ་སེམས་དཔའ་གང་དག་ཆོས་ཀྱི་ཚུལ་བསྟན་པ་ཇི་ལྟ་བུས་འདུལ་བ་དེ་དག་གིས་ཆོས་ཀྱི་ཚུལ་བསྟན་པ་དེ་འདྲ་བ་དག་འབྱུང་བར་ཤེས་ཏེ། དེ་ལ་ལྷ་དང་། མི་དང་། བྱང་ཆུབ་སེམས་དཔའ་ཁ་ཅིག་གིས་ནི་གཙུག་ཏོར་ལས་བསོད་ནམས་ཀྱི་ཚོགས་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །​ཁ་ཅིག་གིས་ནི་ཡེ་ཤེས་ཀྱི་ཚོགས་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །​ཁ་ཅིག་གིས་ནི་ཕ་རོལ་ཏུ་ཕྱིན་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ།



The English translation of this folio by 84000 - Translating the words of the Buddha can be found at:
https://read.84000.co/translation/toh201.html?part=UT22084-062-001-816#UT22084-062-001-816