Degé Kangyur volume 61, F.97.b

སྤྲོས་པའི་རྣམ་པ་ཐམས་ཅད་ཀྱི་མཚན་མ་ལེགས་པར་བཟུང་བ། སེམས་ཅན་ཡོངས་སུ་སྨིན་པར་བྱ་བ་ལ་མཁས་པ། འདུ་ཤེས་ཐམས་ཅད་དང་བྲལ་བ། ཉན་ཐོས་ཀྱི་ཐེག་པ་རྣམ་པར་གཞག་པ་ལ་མཁས་པ། ཆོས་བསྟན་པ་ཡང་དག་པར་དབྱེ་བར་འཇུག་པར་བྱེད་པ། རང་སངས་རྒྱས་ཀྱི་ཐེག་པ་སྟོན་པ། ཉེ་བར་ཞི་བའི་བསྔགས་པ་བརྗོད་པ། བྱང་ཆུབ་སེམས་དཔའ་ཡང་དག་པར་སློང་བ། སྤྱོད་པ་ཇི་ལྟ་བ་བཞིན་དུ་ཞེ་འགྲས་པ་མེད་པར་ཆོས་སྟོན་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། འཇམ་དཔལ་གཞོན་ནུར་གྱུར་པ་དང་། སྤོབས་པ་བརྩེགས་པ་དང་། ལག་ན་རིན་ཆེན་ལྡན་དང་། སྤོས་འོད་དང་། མཐའ་ཡས་སྣང་བའི་བློ་གྲོས་དང་། ངན་སོང་སྤོང་དང་། དོན་གྲུབ་སེམས་པ་དང་། ཡོན་ཏན་རྒྱལ་པོ་སྣང་དང་། མྱ་ངན་གྱི་མུན་པ་ཐམས་ཅད་སེལ་བའི་བློ་གྲོས་དང་། མི་མཉམ་པ་ཐམས་ཅད་སྟོན་པ་དང་། དེའི་རང་བཞིན་དུ་མི་གནས་པ་དང་། བློ་མཐའ་ཡས་དང་། བརྩོན་འགྲུས་དང་། རྩལ་བརྟན་པོར་སེམས་པ་དང་། རིན་ཆེན་འབྱུང་གནས་དང་། བཀོད་པའི་རྒྱལ་པོ་དང་། རྣམ་པར་འཕྲུལ་པའི་རྒྱལ་པོ་དང་། འཁྲུལ་པ་མེད་པའི་མཐུ་རྩལ་དང་། ཁྱད་པར་བློ་གྲོས་དང་། ཀུན་ནས་མཛེས་དང་། སྒྲིབ་མེད་སྟོན་དང་། རྣམ་པར་རྩེ་དང་། གསེར་མཆོག་འོད་དཔལ་དང་། ཆོས་ཐམས་ཅད་ལ་རྟག་ཏུ་ལྟ་བའི་བློ་ལྡན་དང་། སྤོས་དྲི་མྱུར་སྦྱིན་མེ་ཏོག་ཀུན་ཏུ་རྒྱས་དང་། གཙོ་བོ་བརྩེགས་དང་། མྱ་ངན་མེད་པའི་དཔལ་དང་། ལྷུན་པོའི་ལྟོ་དང་། སྤྱན་རས་གཟིགས་དབང་ཕྱུག་དང་། སྤོས་ཀྱི་དབང་ཕྱུག་རྒྱལ་པོ་དང་། མཆོག་ཏུ་དགའ་བའི་རྒྱལ་པོ་དང་། བློ་མཐའ་ཡས་སྒྲུབ་པ་དང་། དམ་པའི་ཆོས་ཐམས་ཅད་མི་བརྗེད་པར་གནས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེ་ལྟར་སྒྲ་མངོན་པར་སྒྲོགས་པ་དང་། དེ་དག་དང་བྱང་ཆུབ་སེམས་དཔའ་སྟོང་ཕྲག་མང་པོ་གཞན་དག་དང་ཡང་ཐབས་ཅིག་ཏུ་བཞུགས་སོ། །​དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་ཤམ་ཐབས་དང་ཆོས་གོས་གསོལ་ཏེ། ལྷུང་བཟེད་བསྣམས་ནས་དགེ་སློང་ཉིས་སྟོང་གིས་བསྐོར་ཅིང་མདུན་དུ་བདར་ཏེ་ཡངས་པའི་གྲོང་ཁྱེར་ཆེན་པོར་བསོད་སྙོམས་ལ་གཤེགས་ནས།



The English translation of this folio by 84000 - Translating the words of the Buddha can be found at:
https://read.84000.co/translation/toh184.html?part=UT22084-061-004-274#UT22084-061-004-274