།སུས་ཆོས་ཐམས་ཅད་འབྱུང་བ་མེད་པར་མཐོང་བ་དེས་ཀུན་འབྱུང་བ་སྤངས་སོ། །སུས་ཆོས་ཐམས་ཅད་ཤིན་ཏུ་ཡོངས་སུ་མྱ་ངན་ལས་འདས་པར་མཐོང་བ་དེས་འགོག་པ་མངོན་སུམ་དུ་བྱས་སོ། །སུས་ཆོས་ཐམས་ཅད་དངོས་པོ་མེད་པར་མཐོང་བ་དེས་ལམ་བསྒོམས་སོ། །འཇམ་དཔལ་སུས་འཕགས་པའི་བདེན་པ་བཞི་པོ་དག་འདི་ལྟ་བུར་མཐོང་བ་དེ་ཆོས་འདི་དག་ནི་དགེ་བ་དག་གོ། །ཆོས་འདི་དག་ནི་མི་དགེ་བ་དག་གོ། །ཆོས་འདི་དག་ནི་སྤང་བར་བྱ་བ་དག་གོ། །ཆོས་འདི་དག་ནི་མངོན་སུམ་དུ་བྱ་བ་དག་གོ། །སྡུག་བསྔལ་ནི་ཡོངས་སུ་ཤེས་པར་བྱ་བའོ། །ཀུན་འབྱུང་བ་ནི་སྤང་བར་བྱ་བའོ། །འགོག་པ་ནི་མངོན་སུམ་དུ་བྱ་བའོ། །ལམ་ནི་བསྒོམ་པར་བྱ་བའོ་སྙམ་དུ་མི་རྟོག་རྣམ་པར་མི་རྟོག་གོ། །དེ་ཅིའི་ཕྱིར་ཞེ་ན། གང་ལ་བྱིས་པ་སོ་སོའི་སྐྱེ་བོ་དག་ཆགས་པ་དང་། ཞེ་སྡང་བ་དང་། གཏི་མུག་པའི་ཆོས་དེ་མ་སྐྱེས་པར་དེས་མཐོང་ཞིང་ཡང་དག་པ་མ་ཡིན་པ་ཀུན་བརྟགས་པ་དང་། རྣམ་པར་བསྒྲུབས་པར་མཐོང་བའི་ཕྱིར་ཏེ། ཆོས་དེ་གང་ཡང་མི་ལེན་ཏོ། །མི་འདོར་རོ། །དེ་ཁམས་གསུམ་པ་ལ་སེམས་མི་ཆགས་ཏེ། ཁམས་གསུམ་པ་ཐམས་ཅད་མ་སྐྱེས་པ་དང་། སྒྱུ་མ་ལྟ་བུ་དང་། རྨི་ལམ་ལྟ་བུ་དང་། བྲག་ཅ་ལྟ་བུ་དང་། མིག་ཡོར་ལྟ་བུར་མཐོང་ངོ་། །དེས་ཆོས་ཐམས་ཅད་ཀྱི་རང་བཞིན་དེ་ལྟར་མཐོང་བས་སེམས་ཅན་ཐམས་ཅད་ལ་རྗེས་སུ་ཆགས་པ་དང་། ཁོང་ཁྲོ་བ་དང་བྲལ་བར་འགྱུར་རོ། །དེ་ཅིའི་ཕྱིར་ཞེ་ན། དེས་གང་ལ་རྗེས་སུ་ཆགས་པ་དང་། ཁོང་ཁྲོ་བར་འགྱུར་བའི་ཆོས་དེ་མི་དམིགས་ཏེ། དེས་ནམ་མཁའ་དང་མཚུངས་པའི་སེམས་ཀྱིས་སངས་རྒྱས་ཀྱང་ཡང་དག་པར་རྗེས་སུ་མི་མཐོང་། ཆོས་དང་། དགེ་འདུན་ཡང་ཡང་དག་པར་རྗེས་སུ་མི་མཐོང་ངོ་། །དེས་ཆོས་ཐམས་ཅད་སྟོང་པར་ཡང་དག་པར་རྗེས་སུ་མི་མཐོང་སྟེ། ཆོས་གང་དག་ལའང་ཐེ་ཚོམ་མི་ཟའོ། །ཐེ་ཚོམ་མི་ཟ་བས་ཉེ་བར་ལེན་པར་མི་འགྱུར་རོ། །ཉེ་བར་མི་ལེན་པས་ལེན་པ་མེད་པར་ཡོངས་སུ་མྱ་ངན་ལས་འདའོ། །འཇམ་དཔལ་དགེ་སློང་རབ་འབྱོར་གྱིས་ཆོས་ཐམས་ཅད་རྣམ་པ་དེ་ལྟ་བུར་ཤེས་པས་དེ་བཞིན་གཤེགས་པའི་ཞབས་ལ་ཕྱག་འཚལ་དུ་མི་འོང་ངོ་།