དགེ་བའི་རྩ་བ་ཐམས་ཅད་རྣམ་པར་འཕེལ་བའི་བརྩོན་འགྲུས་ཀྱི་བྱིན་གྱི་རླབས་ཀྱི་སྟོབས་བྱེད་པ། དགྲ་དང་ཕས་ཀྱིས་རྒོལ་བ་ཐམས་ཅད་ཤིན་ཏུ་ཚར་གཅོད་པར་བྱེད་པ། ངོ་མི་མཚར་དང་། བཀྲ་མི་ཤིས་པ་དང་། རྩོད་པ་དང་། རྨི་ལམ་ངན་པ་དང་། ལྟས་ངན་པ་དང་། མུ་གེ་དང་། འཇིགས་པའི་ཚོགས་དང་། འཐབ་པ་དང་། འགྱེད་པ་དང་། འཆིང་བ་དང་། འཐབ་མོ་དང་། རྩོད་པ་དང་། ཆར་མི་འབབ་པ་དང་། དུས་མ་ཡིན་པར་གྲང་ཞིང་ཚ་བ་དང་། རླུང་དང་། ཚ་བ་དང་། ནད་དང་། སྒྲ་མི་སྙན་པ་ཐམས་ཅད་རབ་ཏུ་ཞི་བར་བྱེད་པ། ལྷ་དང་། ཀླུ་དང་། གནོད་སྦྱིན་དང་། མི་དང་། མི་མ་ཡིན་པ་ཐམས་ཅད་འདུན་པར་བྱེད་པ་རྒྱལ་རིགས་ཐམས་ཅད་འདུན་པར་བྱེད་ཅིང་འགུགས་པ། རིགས་བཞི་ཐམས་ཅད་ཆོས་ཀྱི་དོན་ལ་འཛུད་པ། ཤེས་རབ་ཀྱི་སྒྲོན་མ་རབ་ཏུ་འབར་བར་བྱེད་པ། ལམ་དྲང་པོར་རབ་ཏུ་སྟོན་པ་ཁྱིམ་དང་། གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་དང་། ཕོ་བྲང་འཁོར་དང་། ཡུལ་འཁོར་ཐམས་ཅད་འདུན་པར་བྱེད་པ། གཟའ་དང་། རྒྱུ་སྐར་དང་། ཉིན་པར་དང་། མཚན་མོ་དང་། ཟླ་བ་གཅིག་དང་། ཟླ་བ་ཕྱེད་དང་། དུས་དང་། ལོ་ཐམས་ཅད་འཐུན་པར་བྱེད་པ། ལོ་ཏོག་དང་། མེ་ཏོག་དང་། འབྲས་བུ་དང་། འབྲུ་དང་། སྨན་ཐམས་ཅད་གྲུབ་པར་བྱེད་པ། བཟོ་དང་། ལས་ཀྱི་མཐའ་དང་། གནས་དང་། བྱིན་གྱི་རླབས་དང་། དགོས་པ་ཐམས་ཅད་གྲུབ་པར་བྱེད་པ། ལུས་དང་། ངག་དང་། ཡིད་ཀྱི་ཉེས་པ་ཐམས་ཅད་རབ་ཏུ་ཞི་བར་བྱེད་པ། རིག་པ་དང་། དྲན་པ་དང་། བློ་གྲོས་དང་། མོས་པ་དང་། དཔའ་བ་དང་། བརྟན་པ་དང་། བཟོད་པ་དང་། སྤོབས་པ་རྣམ་པར་འཕེལ་བར་བྱེད་པ། ཆོས་ཐམས་ཅད་ལ་སྒྲིབ་པ་མེད་པའི་སྣང་བས་རབ་ཏུ་སད་པར་བྱེད་པ། འཕགས་པའི་རིགས་བཞིས་ཆོས་ཀྱི་ཚུལ་བྱིན་གྱིས་རློབ་པ། ཐེག་པ་ཆེན་པོ་སྟོན་པར་བྱེད་པ། བྱང་ཆུབ་སེམས་དཔའ་རྣམ་པར་འཕེལ་བར་བྱེད་པ། སེམས་ཅན་ཆེན་པོ་རྣམས་དབུགས་འབྱིན་པ། ཕྱིར་མི་ལྡོག་པའི་ས་ལ་རྡོ་རྗེ་ལྟ་བུའི་སེམས་བྱིན་གྱིས་རློབ་པ། ས་བཅུ་ལ་ཡང་དག་པར་འཇུག་པར་བྱེད་པ། མི་སྐྱེ་བའི་ཆོས་ལ་བཟོད་པ་ཁོང་དུ་ཆུད་པར་བྱེད་པ། དབང་བསྐུར་བའི་ཆོས་དང་། བྱང་ཆུབ་ལ་གཞོལ་བར་བྱེད་པ། གདུལ་བའི་སེམས་ཅན་རྣམས་རྗེས་སུ་འཛིན་པ། ཆོས་ཀྱི་འཁོར་ལོ་རབ་ཏུ་བསྐོར་བ།