།ཟད་པའི་དུས་ཚེ་འཁོར་དུ་མདོ་སྡེའི་གཏམ་བྱས་པ་ནི་བསོད་ནམས་ཁྱད་པར་འཕགས། །དེ་ནས་དེ་བཞིན་གཤེགས་པ་མི་འཁྲུགས་པས་ཀྱང་འདི་སྐད་ཅེས་བཀའ་སྩལ་ཏོ། །བློ་གྲོས་འཆང་བ་གང་གིས་བཟོད་པ་བསྒོམ་ཞིང་རྟག་ཏུ་བརྩོན་འགྲུས་རྩོམ། །རྟག་ཏུ་བསམ་གཏན་གཞོལ་ཞིང་མཉམ་གཞག་ལུས་ཀྱིས་ཤེས་རབ་སྤེལ་བ་བབས། །ཟད་པའི་དུས་ངན་ཚེ་ན་གང་ཞིག་དམ་ཆོས་ཕྱག་རྒྱ་འདི་འཛིན་པ། །དེ་ཡི་བཟོད་དང་བརྩོན་འགྲུས་འདི་ནི་མཚུངས་མེད་ཤེས་རབ་གཞལ་དུ་མེད། །དེ་ནས་དེ་བཞིན་གཤེགས་པ་ཏིང་ངེ་འཛིན་རྡུལ་དང་བྲལ་བའི་སྟོབས་ཀྱིས་རྣམ་པར་གནོན་པས་ཀྱང་འདི་སྐད་ཅེས་བཀའ་སྩལ་ཏོ། །གང་གིས་མདོ་འདི་བཤད་ནས་བཟུང་དང་མངོན་པར་བྲིས་པ་དང་། །གཞན་དག་འཛིན་བཅུག་གུས་པར་རྟག་ཏུ་ཀློག་པ་དང་། །བདུག་པ་མེ་ཏོག་ཕྲེང་བ་གོས་མཆོག་རྣམས་ཀྱིས་མཆོད། །བསོད་ནམས་གང་ཐོབ་དེ་ནི་བརྗོད་པར་མི་ནུས་སོ། །དེ་ནས་སངས་རྒྱས་བཅོམ་ལྡན་འདས་ཚད་མེད་གྲངས་མེད་པ་དེ་དག་གིས། མདོ་སྡེ་འདིའི་བསྔགས་པ་དང་། ཡོན་ཏན་དང་། ཕན་ཡོན་དཔག་ཏུ་མེད་པར་བརྗོད་ནས། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་ལ་བོས་ཏེ། འདི་སྐད་ཅེས་བཀའ་སྩལ་ཏོ། །ཀྱེ་གྲོགས་པོ་དག་ལས་ཀྱི་སྒྲིབ་པ་དང་། ཉོན་མོངས་པ་ཐམས་ཅད་བྱང་བར་བྱེད་པ། ཕྱི་མའི་དུས་ན་གང་ཐོས་པ་ཙམ་གྱིས་ཀྱང་། སེམས་ཅན་རྣམས་ཀྱི་ལས་ཀྱི་སྒྲིབ་པ་དང་། ཉོན་མོངས་པ་ཐམས་ཅད་ཟད་པར་འགྱུར་བའི་ཆོས་ཀྱི་རྣམ་གྲངས་འདི་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། །ཐམས་ཅད་དང་ལྡན་པའི་འཁོར་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འདུས་པ་ཆེན་པོ་རིན་པོ་ཆེ་ཏོག་གི་གཟུངས་ལས། མཐར་ཕྱིན་པའི་ལེའུ་སྟེ། བཅུ་གསུམ་པའོ།། །།འཕགས་པ་འདུས་པ་ཆེན་པོ་རིན་པོ་ཆེ་ཏོག་གི་གཟུངས་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཤཱི་ལེནྡྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།