མི་མ་ཡིན་པ་དང་བཅས་ཏེ། གནས་དེར་འགྲོ་ཞིང་ཆུང་ངུ་ན་ཚིགས་སུ་བཅད་པ་གཅིག་གམ་ཚིག་གཅིག་ཙམ་ཡང་མི་བརྗེད་མི་ཉམས་པར་བཟུང་ངོ་ཞེས་གསོལ་ཏོ། །མདོ་སྡེ་འདི་གསུངས་པའི་ཚེ་དགེ་སློང་སྟོང་སྙེད་ཀྱིས་དགེ་སྦྱོང་གི་འབྲས་བུ་བཞི་ཐོབ་པར་གྱུར་ཏོ། །དགེ་སློང་མ་སྟོང་ལྔ་བརྒྱས་རྒྱུན་ཏུ་ཞུགས་པའི་འབྲས་བུ་ཐོབ་པར་གྱུར་ཏོ། །དགེ་བསྙེན་ལྔ་བརྒྱ་ཡོངས་སུ་དག་པར་གྱུར་ཏེ། ལྷ་དང་། མི་དང་། ལྷ་མ་ཡིན་ལ་སོགས་པས་ཕྱག་བྱས་ནས་ཕྱིར་དོང་ངོ་། །འཕགས་པ་ཏིང་ངེ་འཛིན་མཆོག་དམ་པ་རྫོགས་སོ།། །།༄༅༅། །རྒྱ་གར་སྐད་དུ། ཨཱརྱ་མ་ཧཱ་སན་ནི་པཱ་ཏ་རཏྣ་ཀེ་ཏུ་དྷཱ་ར་ཎཱི་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་འདུས་པ་ཆེན་པོ་རིན་པོ་ཆེ་ཏོག་གི་གཟུངས་ཞེས་བྱ་བ་ཐེག་པ་ཆེན་པོའི་མདོ། དེ་བཞིན་གཤེགས་པ་འོད་ཞི་སྤོས་སྣང་དཔལ་ལ་ཕྱག་འཚལ་ལོ། །ཚངས་པ་ཆེན་པོ་དབྱངས་ཅན་ལ་ཕྱག་འཚལ་ལོ། །དེ་ལ་ཕྱག་འཚལ་ཏེ། བདུད་ཀྱི་འཁོར་གྱིས་མི་ཚུགས་པ་ཞེས་བྱ་བའི་གཟུངས་འདི་སྦྱོར་བར་བགྱིས། བདག་གིས་རིག་སྔགས་འདི་གྲུབ་པར་གྱུར་ཅིག་འདི་ལྟ་སྟེ། ཨ་བཱ་མེ། ཨ་བཱ་མེ། ཨཾ་བ་རེ། ཨཾ་བ་རེ། པ་རི་ཀུན་ཛ། ན་ཊ་ན་ཊ། པུ་སྐ་ར་བཱ་ཧ། ཛ་ལུ་ཁ། ཁ་མ་ཁ་ཡ། ཨི་ལི་མི་ལི། ཀི་ལི་མི་ལི། ཀཱིརྟི་པ་ར། མུ་དྲེ་མུ་དྲ་མུ་ཁེ་སྭཱ་ཧཱ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་འོད་མའི་ཚལ། བྱ་ཀ་ལན་ད་ཀ་གནས་པ་ན། དགེ་སློང་སྟོང་དུ་ཚང་བའི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རབ་ཏུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཆད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ་ཤ་སྟག་དང་། ཐབས་ཅིག་ཏུ་བཞུགས་སོ། །བྱང་ཆུབ་སེམས་དཔའ་ཁྲིའི་བྱང་ཆུབ་སེམས་དཔའི་དགེ་འདུན་ཆེན་པོ་ལ་འདི་ལྟ་སྟེ།