Degé Kangyur volume 56, F.195.b

དུད་འགྲོའི་སྐྱེ་གནས་པ་དང་། གཤིན་རྗེའི་འཇིག་རྟེན་པ་མི་འཁྲུགས་པ་བྱེ་བ་ཁྲག་ཁྲིག་བརྒྱ་སྟོང་མང་པོ་ནི་དྲན་པ་རྙེད་དེ། དགེ་བའི་རྩ་བ་སྔོན་བསྐྱེད་པ་དྲན་ནས་སངས་རྒྱས་ལ་ཕྱག་འཚལ་ལོ་ཞེས་བྱས་ཏེ། ངན་སོང་དེ་དག་ནས་ཤི་འཕོས་ནས་ལྷར་སྐྱེས་སོ། །​བདུད་ཀྱི་སྡེ་དེའི་ནང་ནས་བདུད་ཀྱི་བུ་ཉི་ཁྲིའི་ཚོགས་ཀྱི་འཁོར་དང་བཅས་པས་བཅོམ་ལྡན་འདས་ཀྱི་ཆོ་འཕྲུལ་ཆེན་པོ་འདི་ལྟ་བུ་མཐོང་ནས། བཅོམ་ལྡན་འདས་ལ་རབ་ཏུ་དགའ་བར་གྱུར་ཏེ། བཅོམ་ལྡན་འདས་ག་ལ་བ་དེར་དོང་ནས་ཕྱིན་པ་དང་། བདུད་ཀྱི་བུ་མོ་ལྔ་བརྒྱ་དང་ལྷན་ཅིག་ཏུ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཐལ་མོ་སྦྱར་ནས་ཚིགས་སུ་བཅད་པ་འདི་དག་སྨྲས་སོ། །​རྣམ་དག་སྐུ་མངའ་མཆོག་ཏུ་གཟུགས་བཟང་བ། །​ཡེ་ཤེས་རྒྱ་མཚོ་གསེར་གྱི་ལྷུན་པོ་འདྲ། །​གྲགས་པ་འཇིག་རྟེན་བཀྲམ་ནས་ལྷམ་མེ་བ། །​མགོན་པོ་ཁྱོད་ཉིད་ལ་ནི་སྐྱབས་སུ་མཆི། །རབ་ཏུ་ལམ་སྟོར་རྣམ་པར་མིག་ཟུམས་ལ། །​ཁྱོད་ནི་འཇིག་རྟེན་སྒྲོན་མ་ཉི་མ་འདྲ། །​གཞན་གྱིས་མི་ཐུབ་སྲོག་ཆགས་རྩ་ལག་གཅིག །​དེད་དཔོན་ཁྱོད་ལ་སྐྱབས་སུ་རབ་ཏུ་མཆི། །​ཤིན་ཏུ་ཚོགས་བསགས་ཡེ་ཤེས་འབྱོར་པའི་མཛོད། །​ནམ་མཁའི་རང་བཞིན་གཟོད་ནས་རྣམ་གྲོལ་ཐུགས། །ཐུགས་རྗེ་བསམ་པ་ཡིད་འོང་འཇམ་པའི་གསུང་། །​དོན་ཀུན་གྲུབ་པ་ཁྱོད་ལ་སྐྱབས་སུ་མཆི། །​འཁོར་བའི་དགོན་པ་ལས་ནི་ཁྱོད་ཐར་མཛད། །​ཚོགས་པ་ལས་ཀྱང་རྒྱུ་དང་འབྲས་བུ་སྟོན། །​བྱམས་ལ་གནས་ཤིང་མཆོག་གི་ཆོ་ག་མཁྱེན། །​ཐུགས་རྗེ་གནས་པའི་སྐྱབས་སུ་རབ་ཏུ་མཆི། །​སྒྱུ་མ་སྨྱིག་རྒྱུ་ཆུ་ཟླ་འདྲ་བ་ཡི། །​སྲེད་པ་ལ་ནི་ཡུལ་གྱི་གནས་ཀྱིས་ཆགས། །​མི་ཤེས་ནད་སེལ་འཇིག་རྟེན་རྣམས་ཀྱི་མགོན། །​སྨན་པའི་རྒྱལ་པོ་ཁྱོད་ལ་སྐྱབས་སུ་མཆི། །​ཆུ་བོ་བཞི་དབུས་ཟམ་པར་གྱུར་པ་ཁྱོད། །​ནོར་བདུན་འཕགས་པའི་ཚུལ་གྱིས་རབ་སྒྲོལ་བ། །​ཡང་དག་ལམ་སྟོན་འཇིག་རྟེན་རྩ་ལག་པོ། །​ཐུགས་རྗེ་ལྡན་པ་ཁྱོད་ལ་འདིར་མཆོད་དོ། །​བློ་མཆོག་ཁྱོད་ལ་བདག་ཅག་བཟོད་པར་གསོལ། །​ཁྱོད་ལ་བདག་ཅག་ཡིད་ཀྱིས་གནོད་བསམས་པ། །​མགོན་པོ་དཔའ་བོས་ནོངས་པ་བཟོད་པར་གསོལ། །​ཁྱོད་ནི་འགྲོ་བའི་རྩ་ལག་གཅིག་པུ་གཙོ། །​བདག་ཅག་བདུད་ཀྱི་ཕྱོགས་རྣམས་རབ་སྤངས་ཏེ།



The English translation of this folio by 84000 - Translating the words of the Buddha can be found at:
https://read.84000.co/translation/toh138.html?part=UT22084-056-006-1897#UT22084-056-006-1897