Degé Kangyur volume 56, F.260.a

ཤཱཀྱ་ཐུབ་པ་ཉི་མ་ཁྱོད་ནི་ནུབ་ནས། སངས་རྒྱས་ཀྱི་ཞིང་འདིར་སུ་ཞིག་མཆོག་ཏུ་འགྱུར། དམ་པའི་ཆོས་འདི་འཛིན་པར་འགྱུར། དམ་པའི་ཆོས་ཀྱི་ཚུལ་འདི་འབར་བར་བགྱིད་པར་འགྱུར། སེམས་ཅན་རྣམས་ཡོངས་སུ་སྨིན་པར་བགྱིད་པར་འགྱུར། འདུས་པ་ཆེན་པོ་འདིར་ཡང་བགྲང་བར་ཆུད་པར་འགྱུར། བདག་གིས་སུའི་ལག་ཏུ་ཆོས་ཀྱི་རྣམ་གྲངས་འདི་ཡོངས་སུ་གཏད་པར་བགྱི། དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་དེ་བཞིན་གཤེགས་པ་མེ་ཏོག་མན་དཱ་ར་བའི་དྲི་མོས་ལ་འདི་སྐད་ཅེས་གསུངས་སོ། །​སངས་རྒྱས་ཀྱི་ཞིང་འདི་ན་གནས་པའི་བྱང་ཆུབ་སེམས་དཔའ་བཟོད་པ་ཐོབ་པ་རྣམས་སམ། བརྒྱ་བྱིན་ནམ། ཚངས་པའམ། འཇིག་རྟེན་སྐྱོང་བའམ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོའི་དབང་པོའམ། གང་སུ་ཡང་རུང་སྟེ། ཆོས་ཀྱི་ཚུལ་འདི་ལ་མངོན་པར་བརྩོན་པ་རྣམས་དང་། གང་དག་དབུས་ཀྱི་གླིང་བཞི་པོ་འདི་དག་ན་གནས་པ། ཆོས་ཀྱི་ཚུལ་འདི་ལ་མངོན་པར་དད་པའི་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ནས། ལྟོ་འཕྱེ་ཆེན་པོའི་དབང་པོའི་བར་དེ་དག་གི་ལག་ཏུ་གཟུངས་ཀྱི་ཕྱག་རྒྱའི་ཆོས་ཀྱི་རྣམ་གྲངས་འདི་ཡོངས་སུ་གཏད་པར་མཛོད་ཅིག །​དེ་ནས་དེ་བཞིན་གཤེགས་པ་མེ་ཏོག་མན་དཱ་ར་བའི་དྲི་མོས་ཀྱིས། དབྱངས་ཀྱི་དཀྱིལ་འཁོར་གྱི་ཚིག་བརྗོད་པ་ཐོགས་པ་མེད་པས། སངས་རྒྱས་ཀྱི་ཞིང་མཐའ་དག་ཁྱབ་པར་མཛད་ནས། འདི་སྐད་ཅེས་བཀའ་སྩལ་ཏོ། །​གྲོགས་པོ་དག་གང་སུ་དག་སངས་རྒྱས་ཀྱི་ཞིང་འདིར་འདུས་པ་ཐམས་ཅད་ཉོན་ཅིག །​དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བ་ནི་ཤིན་ཏུ་དཀོན་ནོ། །​སངས་རྒྱས་བཅོམ་ལྡན་འདས་ཐམས་ཅད་གཅིག་ཏུ་སངས་རྒྱས་ཀྱི་ཞིང་གཅིག་ཏུ་འདུས་པ་འདི་ཡང་ཤིན་ཏུ་དཀོན་ཏེ། ཁྱོད་ལ་ཐུགས་བརྩེ་བ་དང་། སེམས་ཅན་ཐམས་ཅད་རྗེས་སུ་གཟུང་བ་དང་། དམ་པའི་ཆོས་ཀྱི་ཚུལ་བྱིན་གྱིས་བརླབས་པ་དང་། བླ་ན་མེད་པའི་ལམ་ལ་བཀོད་པའི་ཕྱིར། སངས་རྒྱས་འདི་དག་ཐམས་ཅད་འདུས་ཏེ།



The English translation of this folio by 84000 - Translating the words of the Buddha can be found at:
https://read.84000.co/translation/toh138.html?part=UT22084-056-006-2026#UT22084-056-006-2026