Degé Kangyur volume 55, F.216.b

དངུལ་ལས་བྱས་པ་དག་ཀྱང་ཡོད། བཻ་དཱུརྱ་ལས་བྱས་པ་དག་ཀྱང་ཡོད། ཤེལ་ལས་བྱས་པ་དག་ཀྱང་ཡོད། མུ་ཏིག་དམར་པོ་དང་རྡོའི་སྙིང་པོ་དང་། སྤུག་ལས་བྱས་པ་དག་ཀྱང་ཡོད་དོ། །​རིན་པོ་ཆེ་གསེར་དང་དངུལ་དང་སྣ་གཉིས་པ་དག་ཀྱང་ཡོད། རིན་པོ་ཆེ་གསེར་དང་དངུལ་དང་བཻ་དཱུརྱ་དང་སྣ་གསུམ་པ་དག་ཀྱང་ཡོད། རིན་པོ་ཆེ་གསེར་དང་དངུལ་དང་བཻ་དཱུརྱ་དང་ཤེལ་དང་སྣ་བཞི་པ་དག་ཀྱང་ཡོད། རིན་པོ་ཆེ་གསེར་དང་དངུལ་དང་བཻ་དཱུརྱ་དང་ཤེལ་དང་མུ་ཏིག་དམར་པོ་དང་སྣ་ལྔ་པའི་ཁང་པ་བརྩེགས་པ་དག་ཀྱང་ཡོད། རིན་པོ་ཆེ་གསེར་དང་དངུལ་དང་བཻ་དཱུརྱ་དང་ཤེལ་དང་མུ་ཏིག་དམར་པོ་དང་སྤུག་དང་སྣ་དྲུག་པའི་ཁང་པ་བརྩེགས་པ་དག་ཀྱང་ཡོད། རིན་པོ་ཆེ་གསེར་དང་དངུལ་དང་བཻ་དཱུརྱ་དང་ཤེལ་དང་མུ་ཏིག་དམར་པོ་དང་སྤུག་དང་རྡོའི་སྙིང་པོ་དང་སྣ་བདུན་པའི་ཁང་པ་བརྩེགས་པ་དག་ཀྱང་ཡོད། ཙན་དན་དམར་པོ་ལས་བྱས་པའི་ཁང་པ་བརྩེགས་པ་དག་ཀྱང་ཡོད། ཙན་དན་སྦྲུལ་གྱི་སྙིང་པོ་ལས་བྱས་པ་དག་ཀྱང་ཡོད། ཨ་ཀ་རུ་དང་ཙན་དན་ལས་བྱས་པ་དག་ཀྱང་ཡོད། ཨ་ག་རུ་ནག་པོ་དང་ཙན་དན་ལས་བྱས་པ་དག་ཀྱང་ཡོད། ཙན་དན་ཐམས་ཅད་ལས་བྱས་པའི་ཁང་པ་བརྩེགས་པ་དག་ཀྱང་ཡོད། མེ་ཏོག་ཨུད་པ་ལ་དང་པད་མ་དང་ཀུ་མུ་ད་དང་པད་མ་དཀར་པོ་ལས་བྱས་པའི་ཁང་པ་བརྩེགས་པ་དག་ཀྱང་ཡོད། སྣ་མའི་མེ་ཏོག་དང་བར་ཤ་ཀ་དང་ཙམ་པ་ཀ་དང་། སྐྱ་སྣར་དང་ཨ་ཏི་མུག་ཏ་ཀ་དང་ཏ་ར་ནི་དང་གོ་ཏ་ར་ནི་ལས་བྱས་པའི་ཁང་པ་བརྩེགས་པ་དག་ཀྱང་ཡོད། མེ་ཏོག་ད་ནུ་སྐ་རི་ལས་བྱས་པའི་ཁང་པ་བརྩེགས་པ་དག་ཀྱང་ཡོད། མེ་ཏོག་མན་དཱ་ར་དང་མན་དཱ་ར་ཆེན་པོ་ལས་བྱས་པའི་ཁང་པ་བརྩེགས་པ་དག་ཀྱང་ཡོད། མེ་ཏོག་པ་རུ་ཥ་ཀ་དང་པ་རུ་ཥ་ཀ་ཆེན་པོ་དང་མཉྫུ་ཥ་ཀ་དང་མཉྫུ་ཥ་ཀ་ཆེན་པོ་དང་། མདོག་མཛེས་དང་མདོག་མཛེས་ཆེན་པོ་དང་། མེ་ཏོག་འཁོར་ལོ་དང་འཁོར་ལོ་ཆེན་པོ་དང་ཀུན་ཏུ་འཁོར་ལོ་དང་། ཤིན་ཏུ་མཛེས་པའི་འཁོར་ལོ་དང་མེ་ཏོག་ཟླ་བ་དང་ཟླ་བ་ཆེན་པོ་དང་། ཤིན་ཏུ་མཛེས་པའི་ཟླ་བ་དང་ཟླ་བ་མཆོག་དང་། སྠ་ལ་དང་སྠ་ལ་ཆེན་པོ་དང་། ཤིན་ཏུ་མཛེས་པའི་སྠ་ལ་ལས་བྱས་པའི་ཁང་པ་བརྩེགས་པ་དག་ཀྱང་ཡོད།



The English translation of this folio by 84000 - Translating the words of the Buddha can be found at:
https://read.84000.co/translation/toh130.html?part=UT22084-055-004-264#UT22084-055-004-264