Degé Kangyur volume 55, F.178.a

སྐད་ཅིག་གིས་འཇིག་རྟེན་གྱི་ཁམས་ཐམས་ཅད་དུ་གོ་བར་བྱེད་ཅིང་སེམས་ཅན་ཐམས་ཅད་ཀྱི་བསམ་པའི་རིམ་པ་ཤེས་ལ་སེམས་ཅན་གཞན་གྱི་རྒྱུད་ལ་ཡང་དག་པར་ཐོབ་པར་བྱེད་པའི་ཡེ་ཤེས་ལ་མཁས་པ། སྔོན་གྱི་མཐའི་མུའི་བསྐལ་པ་མཐའ་ཡས་པའི་འགྲོ་བ་ཐམས་ཅད་ཀྱི་སེམས་བསམ་གྱིས་མི་ཁྱབ་པ་རྗེས་སུ་དྲན་པ་ལ་འཇུག་པས་ལས་དང་བྱ་བ་དང་འབྲས་བུ་རྣམ་པར་སྨིན་པ་ཇི་ལྟ་བ་བཞིན་དུ་མངོན་སུམ་དུ་སེམས་ཅན་ལ་སྟོན་ཅིང་སེམས་ཅན་ལ་ཤེས་པར་བྱེད་པ་ལ་མཁས་པ། འཇིག་རྟེན་གྱི་ཁམས་ཐམས་ཅད་བརྒྱན་པ་ལ་མཁས་པ། འཇིག་རྟེན་གྱི་ཁམས་ཐམས་ཅད་ཀུན་ཏུ་འཇུག་པ་ལ་མཁས་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་དང་བདག་གི་སྤྱོད་པ་དང་སྨོན་ལམ་ཡང་དག་པར་སྐྱེད་ཅིང་ཆོས་ཀྱི་སྣང་བ་རབ་ཏུ་གཏོང་བ་ལ་མཁས་པ། རྡུལ་ཕྲ་རབ་ཀྱི་རྡུལ་གཅིག་ལ་བསྐལ་པ་དང་འཇིག་རྟེན་གྱི་ཁམས་བརྗོད་དུ་མེད་པ་ལ་འཇུག་པ་ལ་མཁས་པ། རྡུལ་ཕྲ་རབ་ཀྱི་རྡུལ་གཅིག་ལ་འཇིག་རྟེན་གྱི་ཁམས་ཐམས་ཅད་ཀྱི་ཚད་ཙམ་གྱིས་སངས་རྒྱས་ཀྱི་ཞིང་གཅིག་ཀུན་ཏུ་སྟོན་པ་ལ་མཁས་པ། མཚོ་ཆེན་པོ་རྒྱ་མཚོའི་ཆུའི་ཕུང་པོ་ཐམས་ཅད་སྤུའི་ཁུང་བུ་གཅིག་ཏུ་བཅུག་སྟེ། ཆོས་ཀྱི་དབྱིངས་ཀྱི་ཚད་ཙམ་གྱི་འཇིག་རྟེན་གྱི་ཁམས་ཐམས་ཅད་དུ་འགྲོ་ཡང་སེམས་ཅན་རྣམས་ལ་གནོད་པ་མེད་པ་ལ་མཁས་པ། འཇིག་རྟེན་གྱི་ཁམས་བརྗོད་དུ་མེད་པ་རང་གི་ལུས་སུ་འཇུག་ཅིང་སེམས་ཅན་གྱི་བྱ་བ་ཐམས་ཅད་ཀུན་ཏུ་སྟོན་པ་ལ་མཁས་པ། ཁོར་ཡུག་དང་ཁོར་ཡུག་ཆེན་པོ་དང་རི་ཆེན་པོ་གཞན་གྲངས་མེད་ཅིང་བསམ་གྱིས་མི་ཁྱབ་ལ་མཚུངས་པ་མེད་ཅིང་གཞལ་དུ་མེད་དེ་ཚད་མེད་ལ་བརྗོད་དུ་མེད་པའི་ཡང་བརྗོད་དུ་མེད་པ་དག་སྤུའི་ཁུང་བུ་གཅིག་ཏུ་བཅུག་སྟེ། ཆོས་ཀྱི་དབྱིངས་ཀྱི་ཚད་ཙམ་གྱིས་འཇིག་རྟེན་གྱི་ཁམས་ཐམས་ཅད་དུ་འགྲོ་ཡང་སེམས་ཅན་རྣམས་སྐྲག་པར་མི་འགྱུར་བ་ལ་མཁས་པ། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པ་བསྐལ་པ་གཅིག་ཏུ་བྱིན་གྱིས་རློབ་ཅིང་བསྐལ་པ་གཅིག་ཀྱང་འཇིག་པ་དང་འཆགས་པའི་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་ཀུན་ཏུ་སྟོན་པ་ལ་མཁས་པ། འདུལ་བ་ཇི་ལྟ་བ་བཞིན་དུ་སེམས་ཅན་ཐམས་ཅད་ལ་འཇིག་རྟེན་གྱི་ཁམས་ཐམས་ཅད་ཆུས་འཇིག་པ་དང་མེས་འཇིག་པ་དང་རླུང་གིས་འཇིག་པར་ཀུན་ཏུ་སྟོན་པ་ལ་མཁས་པ།



The English translation of this folio by 84000 - Translating the words of the Buddha can be found at:
https://read.84000.co/translation/toh129.html?part=UT22084-055-003-582#UT22084-055-003-582