Degé Kangyur volume 55, F.177.a

དུས་གསུམ་ཐམས་ཅད་ཆོས་ཀྱི་སྐུ་གཅིག་གིས་ཁྱབ་པར་སེམས་ཅན་ལ་ཀུན་ཏུ་སྟོན་པ་ལུས་གཅིག་གི་ཏིང་ངེ་འཛིན་ལ་སྙོམས་པར་ཞུགས་ལ་ལུས་མཐའ་ཡས་པ་ལས་ལྡང་བར་སེམས་ཅན་ལ་ཀུན་ཏུ་སྟོན་པ། ལུས་གཅིག་གིས་མངོན་པར་རྫོགས་པར་བྱང་ཆུབ་ལ་སེམས་ཅན་ཐམས་ཅད་སྙེད་ཀྱི་ལུས་ཀུན་ཏུ་སྟོན་པ། སེམས་ཅན་ཐམས་ཅད་ཀྱི་ལུས་སེམས་ཅན་གཅིག་གི་ལུས་སུ་ཀུན་ཏུ་སྟོན་པ། སེམས་ཅན་གཅིག་གི་ལུས་སེམས་ཅན་ཐམས་ཅད་ཀྱི་ལུས་སུ་ཀུན་ཏུ་སྟོན་པ། སེམས་ཅན་གྱི་ལུས་ཆོས་ཀྱི་སྐུར་ཀུན་ཏུ་སྟོན་པ། ཆོས་ཀྱི་སྐུ་སེམས་ཅན་གྱི་ལུས་སུ་སྟོན་པ། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་རང་གི་སྨོན་ལམ་དུ་བྱིན་གྱིས་རློབ་པ་ལ་མཁས་པ། བྱང་ཆུབ་སེམས་དཔའ་རྣམས་ལ་སངས་རྒྱས་ཐམས་ཅད་མངོན་པར་རྫོགས་པར་བྱང་ཆུབ་པ་དང་སྨོན་ལམ་དང་། སྟོབས་དང་མངོན་པར་རྫོགས་པར་བྱང་ཆུབ་པ་ཀུན་ཏུ་སྟོན་པ། ཡོངས་སུ་སྨིན་པའི་སེམས་ཅན་ལ་འདུལ་བ་ཇི་ལྟ་བ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀུན་ཏུ་སྟོན་པ། བསྐལ་པ་འགྲངས་པ་ཐམས་ཅད་དུ་སྨོན་ལམ་གྱི་རྒྱུན་མི་གཅོད་པ། རྣམ་པར་ཤེས་པའི་ལུས་ལས་བསྐྱོད་ནས་ཡེ་ཤེས་ཀྱི་སྐུ་ལ་འཇོག་པར་དབང་བྱེད་པར་སེམས་ཅན་གྱི་ཚོགས་ཐམས་ཅད་ལ་ཀུན་ཏུ་སྟོན་པ། རང་གི་ལུས་ཀྱི་རྒྱུན་བཅད་ནས་སེམས་ཅན་གྱི་ཚོགས་གཞན་གྱི་སྨོན་ལམ་ཡོངས་སུ་རྫོགས་པར་བྱེད་པར་ཀུན་ཏུ་སྟོན་པ། སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་སྨོན་ལམ་ལ་འཇུག་པ། འཇིག་རྟེན་གྱི་ཁམས་གཅིག་ན་བསྐལ་པ་འགྲངས་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པ་མངོན་པར་རྫོགས་པར་བྱང་ཆུབ་པར་སྨོན་ལམ་བཏབ་པའི་སྟོབས་ཀྱིས་སྐྲ་ཙམ་གྱི་ཁྱོན་གཅིག་ལ་སངས་རྒྱས་ཀྱི་ཞིང་ཐམས་ཅད་རྒྱས་པར་འགེངས་པའི་འཇིག་རྟེན་གྱི་ཁམས་བརྗོད་དུ་མེད་པ་ཀུན་ཏུ་སྟོན་པ། འཇིག་རྟེན་གྱི་ཁམས་གཅིག་ཏུ་ལུས་དུ་མ་ཀུན་ཏུ་སྟོན་པ། ཆོས་ཀྱི་ཚིག་གཅིག་བརྗོད་པས་ཆོས་ཀྱི་དབྱིངས་མ་ལུས་པར་རྒྱས་པར་འགེངས་པའི་ཆོས་ཀྱི་སྤྲིན་ཆེན་པོ་ལས་བྱུང་བའི་བདུད་རྩིའི་ཁུ་བའི་ཆར་པ་འབེབས་ལ། རིག་པ་དང་རྣམ་པར་གྲོལ་བའི་གློག་བྱུང་ཞིང་ཡང་དག་པ་དེ་ཁོ་ནའི་འབྲུག་བསྒྲགས་པས་སེམས་ཅན་གྱི་ཁམས་ཐམས་ཅད་ཚིམ་པར་བྱེད་ཅིང་སྨོན་ལམ་ཆེན་པོ་ཡོངས་སུ་རྫོགས་པར་བྱེད་པར་ཀུན་ཏུ་སྟོན་པ།



The English translation of this folio by 84000 - Translating the words of the Buddha can be found at:
https://read.84000.co/translation/toh129.html?part=UT22084-055-003-580#UT22084-055-003-580