དེ་བཞིན་གཤེགས་པའི་སྔོན་གྱི་དགེ་བའི་རྩ་བ་དང་། སྤྱོད་པ་དང་སྨོན་ལམ་དང་ཐབས་ལ་མཁས་པའི་སྟོབས་ཀྱི་བྱིན་གྱི་རླབས་ཀྱིས་འདུལ་བ་ཇི་ལྟ་བ་བཞིན་དུ་སེམས་ཅན་ཡོངས་སུ་སྨིན་པར་བྱེད་པས་སེམས་ཅན་རྣམས་ཀྱི་བྱ་བ་དེ་དག་ཤེས་ཀྱང་དེ་བཞིན་གཤེགས་པ་ནི་ཐམས་ཅད་དུ་བཏང་སྙོམས་པ་སྟེ། རྣམ་པར་མི་རྟོག་པ་འདི་ཡང་དེ་བཞིན་གཤེགས་པའི་ཐབས་མཁས་པར་བལྟའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །སངས་རྒྱས་ཀྱི་ཞིང་དེ་ཡོན་ཏན་གྱི་སྙིང་པོ་གང་དག་དང་ལྡན་པ་དང་། ཡོན་ཏན་གང་དང་ལྡན་ན་སངས་རྒྱས་ཀྱི་ཞིང་དེར་སངས་རྒྱས་བཅོམ་ལྡན་འདས་རྣམས་མངོན་པར་རྫོགས་པར་འཚང་རྒྱ་བའི་ཡོན་ཏན་གྱི་སྙིང་པོ་བཅུ་གཉིས་པོ་དེ་བཅོམ་ལྡན་འདས་ཀྱིས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་སངས་རྒྱས་ཀྱི་ཞིང་དེ་ནི་བསྐལ་པའི་སྙིང་པོ་དང་ལྡན་པ་ཡིན། དུས་ཀྱི་སྙིང་པོ་དང་ལྡན་པ་ཡིན། སེམས་ཅན་གྱི་སྙིང་པོ་དང་ལྡན་པ་ཡིན། ཞིང་གི་སྙིང་པོ་དང་ལྡན་པ་ཡིན། ཐེག་པའི་སྙིང་པོ་དང་ལྡན་པ་ཡིན། སའི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་བསྟན་པའི་སྙིང་པོ་དང་ལྡན་པ་ཡིན་སངས་རྒྱས་ཀྱི་ཞིང་དེར་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་དང་གཅེར་བུ་པ་རྣམས་མི་རྒྱུ་བ་ཡིན། སངས་རྒྱས་ཀྱི་ཞིང་དེ་བསམ་པ་དང་ལྷག་པའི་བསམ་པ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་རང་བཞིན་གྱིས་དཀར་པོའི་ཆོས་དང་ལྡན་པའི་སེམས་ཅན་རྣམས་གནས་པ་ཡིན། སངས་རྒྱས་ཀྱི་ཞིང་དེ་འཕགས་པའི་སྐྱེ་བོའི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེར་སྔོན་གྱི་དེ་བཞིན་གཤེགས་པ་རྣམས་གཤེགས་ཤིང་རྗེས་སུ་གཤེགས་པ་ཡིན་ཏེ། འཇམ་དཔལ་སངས་རྒྱས་ཀྱི་ཞིང་དེ་ནི་ཡོན་ཏན་གྱི་སྙིང་པོ་བཅུ་གཉིས་པོ་དེ་དག་དང་ལྡན་པ་ཡིན་ནོ། །དེར་སངས་རྒྱས་བཅོམ་ལྡན་འདས་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །འཇམ་དཔལ་ཁྱོད་ཀྱིས་རྣམ་གྲངས་འདིས་ཀྱང་ངའི་སངས་རྒྱས་ཀྱི་ཞིང་ན་ཉན་ཐོས་དང་རང་སངས་རྒྱས་ཀྱི་ཐེག་པ་ཐ་དད་པ་རྣམ་པར་གཞག་པ་མེད་པར་རིག་པར་བྱའོ།