Degé Kangyur volume 54, F.272.a

།དེ་བཞིན་གཤེགས་པས་ཤིན་ཏུ་ངོ་མཚར་མཛད། །​རྒྱལ་བས་བསྟན་པའི་ཆོས་རྣམས་གང་རྟོགས་པ། །​མི་ཡི་འདྲེན་པ་དེ་དག་ངོ་མཚར་ཏེ། །​མིག་དང་ལྡན་པས་བསྟན་ནས་ལོང་བ་གང་། །​གཟུགས་རྣམས་མཐོང་བ་བཞིན་དུ་ངོ་མཚར་ལགས། །​ལོང་བ་གཞན་གྱིས་བསྟན་པའི་གཟུགས་རྣམས་ལ། །མཐོང་བར་གྱུར་ན་དེ་ནི་ངོ་མཚར་ཏེ། །​དེ་བཞིན་འདྲེན་པ་ཁྱོད་ཀྱི་གསུང་ཐོས་ནས། །​གང་དག་དད་པར་གྱུར་པ་ངོ་མཚར་ལགས། །​ཆོས་རྣམས་བསྟན་པ་དག་ཀྱང་དེ་བཞིན་དུ། །​ཐར་པར་འཚལ་བས་རབ་ཏུ་རྟོགས་པར་བགྱི། །​གང་དག་ཆོས་རྣམས་རིག་པར་མི་འགྱུར་བ། །​དེ་དག་གིས་ནི་དེ་བཞིན་གཤེགས་པ་མཐོང་། །​དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་པ་དེ་དག་སྨྲས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །​བཅོམ་ལྡན་འདས་བྱིས་པ་སོ་སོའི་སྐྱེ་བོ་གང་ཆོས་ཐམས་ཅད་ངོ་བོ་ཉིད་མ་མཆིས་པར་སྟོན་པ་དང་། ཆོས་ཐམས་ཅད་ངོ་བོ་ཉིད་མ་མཆིས་པར་སྨྲ་བ་དེ་དག་ནི་བཅོམ་ལྡན་འདས་ཀྱི་ལྡེམ་པོ་ངག་མ་འཚལ་ལགས་སོ། །​དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་རྣམས་ནི་ཐོག་མ་ནས་དམིགས་སུ་མ་མཆིས་ན་ངོ་བོ་ཉིད་མ་མཆིས་པར་བསྟན་དུ་ག་ལ་མཆིས། བཅོམ་ལྡན་འདས་ཆོས་གང་དམིགས་སུ་མ་མཆིས་པ་དེ་དག་ནི་གང་ཡང་བགྲང་བར་མ་བགྱིས་ལགས་སོ། །​དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་ནི་ནམ་མཁའ་དང་མཚུངས་ཏེ་གཉིས་སུ་མ་མཆིས་ཤིང་གཉིས་སུ་དབྱེར་མ་མཆིས་ལགས་སོ། །​བཅོམ་ལྡན་འདས་གཟུགས་ཞེས་བགྱི་བ་འདི་ནི་གཉིས་སུ་མ་མཆིས་པ་ལ་བགྲང་བར་བགྱིས་པ་ལགས་སོ། །​དེ་ཅིའི་སླད་དུ་ཞེ་ན། བཅོམ་ལྡན་འདས་གཟུགས་ནི་ནམ་མཁའ་དང་མཚུངས་ཏེ་གཉིས་སུ་མ་མཆིས་ཤིང་གཉིས་སུ་དབྱེར་མ་མཆིས་པ་ལགས་སོ། །​བཅོམ་ལྡན་འདས་དཔེར་བགྱི་ན་ནམ་མཁའ་ལ་གཉིས་སུ་མི་དམིགས་པ་དེ་བཞིན་དུ་གཟུགས་ལ་ཡང་གཉིས་སུ་མི་དམིགས་ལགས་སོ། །​བཅོམ་ལྡན་འདས་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའང་གཉིས་སུ་མ་མཆིས་ཏེ། གཉིས་སུ་དབྱེར་མ་མཆིས་ལགས་སོ།



The English translation of this folio by 84000 - Translating the words of the Buddha can be found at:
https://read.84000.co/translation/toh124.html?part=UT22084-054-005-1152#UT22084-054-005-1152