Degé Kangyur volume 54, F.271.b

།སངས་རྒྱས་ཆོས་དང་སངས་རྒྱས་ཞེས། །​དེ་ནི་བྱིས་པའི་སྤྱོད་ཡུལ་ཏེ། །​སངས་རྒྱས་ཆོས་དང་སངས་རྒྱས་ནི། །​སུས་ཀྱང་རྟོགས་པར་རྔོ་མི་ཐོགས། །​ཇི་ལྟར་ཚིག་གིས་བརྗོད་པ་ལྟར། །​ཆོས་འདི་དག་ལ་གདགས་མ་མཆིས། །​ཆོས་དེ་གདགས་པ་མ་ལགས་ཏེ། །​བདག་དང་འདྲ་བར་རྟོགས་པར་བགྱི། །​བདག་ནི་གདགས་སུ་མ་མཆིས་ཏེ། །​འོན་ཀྱང་བདག་ཅེས་སྨྲ་བ་བཞིན། །​ཆོས་རྣམས་ལ་ནི་བཏགས་པ་ཡང་། །​བདག་དང་འདྲ་བར་རྟོགས་པར་བགྱི། །​བདག་ནི་བཏགས་པར་མ་མཆིས་ཏེ། །​འོན་ཀྱང་བདག་ཅེས་སྨྲ་བ་བཞིན། །​ཆོས་རྣམས་བཏགས་པ་མ་མཆིས་པར། །​མཁས་པ་རྣམས་ཀྱིས་རྟག་ཏུ་རྟོགས། །​ཇི་ལྟར་ནམ་མཁའི་རི་མོ་ནི། །​མ་བྱུང་འབྱུང་བར་མི་འགྱུར་ཏེ། །​དེ་བཞིན་ཆོས་རྣམས་གདགས་པ་ཡང་། །​མ་བྱུང་འབྱུང་བར་མི་འགྱུར་ལགས། །​རྫས་མ་ལགས་པའི་འདོགས་པ་ཡིས། །​མི་གང་འདི་ལ་འདོགས་པ་ནི། །​མཛངས་པ་རྣམས་ཀྱིས་མི་བསྔགས་ཏེ། །​དེ་ནི་མཁས་པས་དཔྱ་བ་ལགས། །​འདོགས་པ་དེ་བཞིན་ཆོས་རྣམས་ལ། །​མི་གང་འདི་ལ་འདོགས་པ་ནི། །​མཛངས་པ་རྣམས་ཀྱིས་མི་བསྔགས་ཏེ། །​མཁས་པས་དེ་ནི་དཔྱ་བ་ལགས། །​འགྲོ་བ་མ་མཆིས་འགྲོ་བའི་སྒྲས། །​སངས་རྒྱས་རྣམས་ཀྱིས་བསྟན་པ་ནི། །​ནམ་མཁའི་རི་མོ་བྲིས་པ་ལྟར། །​དེ་བཞིན་ཆོས་རྣམས་རྟོགས་པར་བགྱི། །​བར་སྣང་བྱ་རྗེས་ཇི་བཞིན་དུ། །​འགྲོ་དེ་ངེས་པར་མ་མཆིས་ལགས། །​སྦལ་པའི་སྤུ་ཡི་ལ་བ་ལྟར། །​དེ་བཞིན་ཞི་བའི་ཆོས་ཉིད་བལྟ། །​བཞིན་གྱི་གཟུགས་བརྙན་མེ་ལོང་ལ། །​རང་བཞིན་སྟོན་པར་མཁས་པས་བཤད། །​དཀྱིལ་འཁོར་དེ་ན་བཞིན་གཟུགས་ལྟར། །​དེ་བཞིན་ཆོས་རྣམས་ཐམས་ཅད་བལྟ། །​ཇི་ལྟར་མི་དག་རི་ཡི་བར་མཆིས་ཏེ། །​སྐད་ཕྱུང་ནས་ནི་བྲག་ཕུག་སྒྲ་ཡང་གྲག ། བྲག་ཅ་དེ་ལ་བྱེད་པ་མ་མཆིས་ལྟར། །​དེ་བཞིན་ཆོས་ལ་བྱེད་པ་སུ་མ་མཆིས། །​ཆོས་འདི་དག་ནི་རྒྱལ་བས་དེ་ལྟར་བསྟན། །​མཆིས་པ་མ་ལགས་འདི་ལ་བྱེད་མ་མཆིས། །​རང་བྱུང་འདི་དག་རྟོགས་ནས་རབ་བསྟན་ཏེ། །​དེ་བཞིན་གཤེགས་པས་ཤིན་ཏུ་ངོ་མཚར་མཛད།