Degé Kangyur volume 51, F.190.b

།དེའི་ཡུལ་དུ་སྡིག་པའི་ཆོས་མང་པོ་དང་། ཡིད་མི་བདེ་བ་མང་པོ་འབྱུང་བར་འགྱུར་ཏེ། དེས་ན་རྒྱལ་རིགས་རྒྱལ་པོ་དེས་བདག་གི་ཡུལ་དུ་ཆོས་ནུབ་པར་གྱུར་ཏོ་སྙམ་དུ་འཚལ་བར་བགྱི་སྟེ། དེས་ཆོས་སྤྱད་པར་བགྱིའོ། །​བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །​དེ་ནི་དེ་བཞིན་ཏེ། རིགས་ཀྱི་བུ་དཔེར་ན་རིགས་ཀྱི་བུའམ། རིགས་ཀྱི་བུ་མོ་དད་པ་ཅན་ལ་ལ་ཞིག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་ལ་ལོ་བརྒྱ་འམ། ལོ་སྟོང་གི་བར་དུ་བླ་ན་མེད་པའི་མཆོད་པས་མཆོད་པ་བྱེད་ལ། འཛམ་བུའི་གླིང་འདི་རིན་པོ་ཆེས་ཡོངས་སུ་གང་བར་བྱས་ཏེ། ཉན་ཐོས་རྣམས་དང་། རང་སངས་རྒྱས་རྣམས་ལ་སྦྱིན་པ་བྱིན་པ་དང་། བདག་ཉིད་ཡོངས་སུ་གཏོང་བ་གང་ཡིན་པ་དང་། ཆུང་མ་དང་། བུ་དང་བུ་མོ་ཡོངས་སུ་གཏོང་བ་གང་ཡིན་པ་དང་། གང་གིས་ཆོས་ཀྱི་རྣམ་གྲངས་འདི་མཆོད་པའམ་ཡི་གེར་འདྲིའམ་ཡི་གེར་འདྲིར་འཇུག་པའམ། ཀློག་པའམ། མེ་ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་བ་རྣམས་ཀྱིས་མཆོད་དེ་ཆོས་ཀྱི་རྣམ་གྲངས་འདིའི་ཕྱིར་ཞོའི་བརྒྱད་ཆ་ཅིག་ཙམ་སྦྱིན་པ་བྱིན་ན་དེ་ནི་དེ་བས་ཆེས་བསོད་ནམས་མང་དུ་སྐྱེད་པར་འགྱུར་ཏེ། དགེ་བའི་རྩ་བ་སྔ་མ་ཤོས་དེ་ནི་བརྒྱའི་ཆར་ཡང་མི་ཕོད་ན། གང་བླ་མའི་འདུ་ཤེས་བསྐྱེད་དེ། ཆོས་ཀྱི་རྣམ་གྲངས་འདི་ལ་གདུགས་དང་། རྒྱལ་མཚན་དང་། བ་དན་རྣམས་ཀྱིས་མཆོད་པ་བྱེད་ཅིང་། ཆོས་སྨྲ་བ་དེ་དག་ལ་ཡང་གོས་སམ། རྒྱན་ནམ། གདུགས་སམ། བཞོན་པའམ། གྲོང་ངམ། གྲོང་ཁྱེར་རམ། ས་གཞི་བ་ལང་གི་རྨིག་རྗེས་ཙམ་ཡང་ཆོས་ཀྱི་རྣམ་གྲངས་འདིའི་ཕྱིར་སྦྱིན་པ་བྱེད་ལ། ལུས་འདི་ནི་སྙིང་པོ་མེད་པའོ་སྙམ་དུ་ཤེས་ཤིང་རྨི་ལམ་ལྟ་བུའོ། །​སྒྱུ་མ་ལྟ་བུའོ། །​ཆུའི་ཆུ་བུར་ལྟ་བུའོ་སྙམ་དུ་ཤེས་ཏེ། ལུས་འདི་ལ་ནི་སྙིང་པོ་མེད་དོ། །​ཆོས་ཐམས་ཅད་ནི་མི་རྟག་པའོ་སྙམ་དུ་ཤེས་ན། དེ་ནི་དེ་བཞིན་གཤེགས་པས་ལུང་བསྟན་པ་ཁོ་ན་ཡིན་ནོ། །​དེ་བཞིན་གཤེགས་པས་དབུགས་ཕྱུང་བ་ཁོ་ན་ཡིན་ནོ།



The English translation of this folio by 84000 - Translating the words of the Buddha can be found at:
https://read.84000.co/translation/toh114.html?part=UT22084-051-002-270#UT22084-051-002-270