བདུད་སྡིག་ཅན་ལ་ཡིད་ཆེས་པར་ལྟ་ག་ལ་བྱེད་དེ། དེ་ནི་གནས་མེད་དོ། །དེ་ཅིའི་ཕྱིར་ཞེ་ན། རབ་འབྱོར་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ནི་གང་ལ་ཡིད་ཆེས་པར་བྱ་བའི་གཟུགས་ཀྱང་ཡང་དག་པར་རྗེས་སུ་མི་མཐོང་། །དེ་བཞིན་དུ་གང་ལ་ཡིད་ཆེས་པར་བྱ་བའི་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་ཡང་དག་པར་རྗེས་སུ་མི་མཐོང་། དེ་བཞིན་དུ་གང་ལ་ཡིད་ཆེས་པར་བྱ་བའི་གཟུགས་ཀྱི་དེ་བཞིན་ཉིད་དང་། ཚོར་བའི་དེ་བཞིན་ཉིད་དང་། འདུ་ཤེས་ཀྱི་དེ་བཞིན་ཉིད་དང་། འདུ་བྱེད་རྣམས་ཀྱི་དེ་བཞིན་ཉིད་དང་། རྣམ་པར་ཤེས་པའི་དེ་བཞིན་ཉིད་ཀྱང་ཡང་དག་པར་རྗེས་སུ་མི་མཐོང་ངོ་། །དེ་བཞིན་དུ་སྦྱར་ཏེ། གང་ལ་ཡིད་ཆེས་པར་བྱ་བའི་རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱི་དེ་བཞིན་ཉིད་ཀྱང་ཡང་དག་པར་རྗེས་སུ་མི་མཐོང་བའི་ཕྱིར་ཏེ། རབ་འབྱོར་རྣམ་པ་དང་རྟགས་དང་མཚན་མ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཕྱིར་མི་ལྡོག་པར་སྟོན་ཏོ། །རབ་འབྱོར་གཞན་ཡང་བདུད་སྡིག་ཅན་དགེ་སློང་གི་ཆ་བྱད་དུ་འོངས་ཏེ། བྱང་ཆུབ་སེམས་དཔའ་ལ་འདི་སྐད་དུ་འདི་ནི་འཁོར་བའི་སྤྱོད་པ་ཡིན་གྱི། འདི་བྱང་ཆུབ་སེམས་དཔའི་སྤྱོད་པ་ནི་མ་ཡིན་གྱིས། ཀྱེ་ཁྱོད་ཀྱིས་འདི་ཉིད་དུ་སྡུག་བསྔལ་གྱི་མཐར་ཕྱིན་པར་གྱིས་ཤིག་ཅེས་ཟེར་ཞིང་། དེ་བྱང་ཆུབ་སེམས་དཔའ་དེ་ལ་རྫོགས་པའི་བྱང་ཆུབ་ཀྱི་ལམ་ལྟར་བཅོས་པ་སྟོན་ལ་ལམ་ལྟར་བཅོས་པ་དེ་ཡང་འཁོར་བའི་སྤྱོད་པ་འཇིག་རྟེན་པའི་ལམ་གྱིས་བསྡུས་པ་སྟེ། ཡང་ན་རུས་གོང་དུ་འདུ་ཤེས་པ་དང་། རྣམ་པར་སྔོས་པ་དང་། རྣམ་པར་རྣགས་པ་དང་། རྣམ་པར་བམ་པ་དང་། རྣམ་པར་དམར་བ་དང་། རྣམ་པར་ཟོས་པའི་འདུ་ཤེས་སམ། ཡང་ན་བྱམས་པའམ། ཡང་ན་སྙིང་རྗེའམ། ཡང་ན་དགའ་བའམ། ཡང་ན་བཏང་སྙོམས་སམ། ཡང་ན་བསམ་གཏན་དང་པོའམ། ཡང་ན་བསམ་གཏན་བཞི་པའི་བར་རམ། ཡང་ན་གཟུགས་མེད་པའི་སྙོམས་པར་འཇུག་པ་བཞི་སྟོན་པར་བྱེད་ཅིང་། ཚེ་དང་ལྡན་པ་ལམ་འདི་དང་ནན་ཏན་འདིས་ནི་རྒྱུན་དུ་ཞུགས་པའི་འབྲས་བུ་འཐོབ་པར་འགྱུར་ཞིང་། དགྲ་བཅོམ་པའི་བར་རམ།