།ཀྱེ་དགེ་བའི་རྩ་བ་དེ་དག་སླར་འཆགས་ཤིང་གཏོང་ལ་ཁོ་བོའི་ཚིག་ལྟར་བྱེད་ན་ནི་དེ་ལྟར་ན་ཁྱོད་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཁྱོད་ཀྱིས་དེ་སྐད་ཐོས་པ་གང་ཡིན་པ་ནི་སངས་རྒྱས་ཀྱི་བཀའ་མ་ཡིན་ཏེ། དེ་སྙན་དངགས་སུ་བྱས་པ་ཡིན་གྱི། ཁོ་བོ་ཁྱོད་ལ་སྟོན་པ་གང་ཡིན་པ་དེ་ནི་ཡང་དག་པར་ན། སངས་རྒྱས་ཀྱི་བཀའ་ཡིན་ནོ་ཞེས་ཟེར་ལ། གལ་ཏེ་བྱང་ཆུབ་སེམས་དཔའ་དེ་འཁྲུག་ཅིང་ནེམ་ནུར་བྱེད་ལ། ཐེ་ཚོམ་ཟ་ན་བྱང་ཆུབ་སེམས་དཔའ་དེ་ནི་དེ་བཞིན་གཤེགས་པས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་མ་ཡིན་པར་རིག་པར་བྱ་སྟེ། དེ་ནི་ཕྱིར་མི་ལྡོག་པའི་ས་ལ་གནས་པ་མ་ཡིན་ནོ། །རབ་འབྱོར་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ལ་བདུད་སྡིག་ཅན་གྱིས་འདུན་པ་ཟློག་པ་ན་མི་འཁྲུག་ཅིང་ནེམ་ནུར་མི་བྱེད་ལ། ཐེ་ཚོམ་མི་ཟ་སྟེ། དེའི་ཚིག་ལ་ཡིད་ཆེས་པར་མི་བྱེད། གཞན་ལ་ཡིད་ཆེས་པར་མི་བྱེད། སྦྱིན་པའི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་བར་དང་། དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་ལ་གཞན་གྱི་དྲིང་མི་འཇོག་ན། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཡིན་པར་རིག་པར་བྱའོ། །རབ་འབྱོར་དཔེར་ན་དགྲ་བཅོམ་པ་ཟག་པ་ཟད་པ་ནི་ཆོས་རྣམས་མངོན་སུམ་དུ་མཐོང་བའི་ཕྱིར། ནམ་ཡང་གཞན་སུ་ལ་ཡང་ཡིད་ཆེས་པར་མི་བྱེད་ཅིང་། བདུད་སྡིག་ཅན་གྱིས་ཀྱང་མི་འཕྲོགས་པ་ཡིན་ན། གཞན་གྱིས་ལྟ་ཅི་སྨོས། རབ་འབྱོར་དེ་བཞིན་དུ་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་གཞན་སུ་ལ་ཡང་ཡིད་ཆེས་པར་མི་བྱེད་ལ། ཉན་ཐོས་དང་། རང་སངས་རྒྱས་ཐམས་ཅད་དང་། བདུད་སྡིག་ཅན་གྱིས་ཀྱང་མི་རྫི་ཞིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཡིན་ནོ། །དེ་ནི་སུ་ལ་ཡང་ཡིད་ཆེས་པར་མི་བྱེད་དེ། དེ་བཞིན་གཤེགས་པ་རྣམས་ལ་ཡང་དད་པས་མི་འགྲོ་ན། གཞན་དགེ་སྦྱོང་དང་བྲམ་ཟེ་དང་། སྤྱོད་པ་པ་དང་། ཀུན་ཏུ་རྒྱུ་རྣམས་སམ། བདུད་སྡིག་ཅན་ལ་ཡིད་ཆེས་པར་ལྟ་ག་ལ་བྱེད་དེ།