དགྲ་བཅོམ་པའི་བར་རམ། རང་བྱང་ཆུབ་འཐོབ་པར་འགྱུར་གྱིས། ཀྱེ་ཁྱོད་ཀྱིས་འདི་ཉིད་དུ་སྡུག་བསྔལ་གྱི་མཐར་ཕྱིན་པར་གྱིས་ཤིག་ཕྱིས་འཁོར་བ་ན་སྤྱོད་པའི་སྡུག་བསྔལ་དེ་དག་མྱོང་བར་གྱུར་ཏ་རེ། ཡང་ན་གལ་ཏེ་ཁྱོད་གཟུགས་ཅན་གྱི་ལུས་མི་འདོད་དམ། ཡོངས་སུ་མི་གཟུང་བར་སེམས་ན། འདི་ཉིད་དུ་སྐྱེ་མཆེད་རྣམས་ཡོངས་སུ་སྦྱོངས་ཤིག་ཅེས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་དེ་སྐད་བརྗོད་ཀྱང་། རབ་འབྱོར་གལ་ཏེ་སེམས་མི་འཁྲུག་ཅིང་མི་གཡོ་ལ། གོང་དུ་ཡང་འདི་སྙམ་དུ་བདག་ལ་ལམ་ལྟར་བཅོས་པ་གང་རྒྱུན་དུ་ཞུགས་པའི་འབྲས་བུ་ཡང་མངོན་སུམ་དུ་བྱེད་པར་མི་འགྱུར་ཞིང་། དགྲ་བཅོམ་པའི་འབྲས་བུའི་བར་དུ་མངོན་སུམ་དུ་བྱེད་པར་མི་འགྱུར་ལ། རང་བྱང་ཆུབ་ཀྱང་མངོན་སུམ་དུ་བྱེད་པར་ཡང་མི་འགྱུར་བའི་ལམ་ལྟར་བཅོས་པ་སྟོན་པའི་དགེ་སློང་འདི་ནི་བདག་ལ་གཅེས་སྤྲས་བྱེད་པ་ཡིན་ནོ་སྙམ་དུ་སེམས་སོ། །གོང་དུ་ཡང་བདག་ལ་ཆགས་པ་དེ་སྟོན་པའི་དགེ་སློང་འདི་ནི་བདག་ལ་གཅེས་སྤྲས་བྱེད་པ་ཡིན་ཏེ། ཆགས་པའི་གནས་དེ་ཤེས་ནས། ཐེག་པ་གསུམ་པོ་ཀུན་ལ་བསླབ་པར་བྱའོ་སྙམ་ནས་དགའ་བ་སྐྱེའོ། །བདུད་སྡིག་ཅན་གྱིས་དེ་དགའ་བར་རིག་ནས། དེ་ལ་འདི་སྐད་ཅེས་ཀྱེ་རིགས་ཀྱི་བུ་ཁྱོད་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་དག་ལ། ན་བཟའ་དང་། ཞལ་ཟས་དང་། གཟིམས་ཆ་དང་། གདན་དང་། སྙུན་གྱི་གསོ་སྨན་དང་། ཡོ་བྱད་རྣམས་ཀྱིས་བསྙེན་བཀུར་བྱས་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་པོ་དེ་དག་གི་དྲུང་དུ་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་བསྒོམ་ཞིང་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་ཡང་ཡོངས་སུ་བསྒོམས་ལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་པོ་དེ་དག་ལ་བཀུར་སྟི་བྱས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་ཀྱི་ཆེད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ་དང་།