Degé Kangyur volume 47, F.294.b

།འདུས་མ་བྱས་ནི་གཞིའོ། །​སྤྱོད་པ་མེད་པ་ནི་དབྱེར་མེད་པའོ། །​བྱང་ཆུབ་ནི་གཞིའོ། །​ཉེ་བར་ཞི་བ་ནི་དབྱེར་མེད་པའོ། །​མྱ་ངན་ལས་འདས་པ་ནི་གཞིའོ། །​མངོན་པར་འགྲུབ་པ་མེད་པ་ནི་དབྱེར་མེད་པའོ། །​སྐྱེ་བ་མེད་པ་ནི་གཞིའོ། །​འཇམ་དཔལ་བྱང་ཆུབ་ནི་ལུས་ཀྱིས་མངོན་པར་རྫོགས་པར་བྱང་ཆུབ་པར་མི་འགྱུར་ཏེ། སེམས་ཀྱིས་ཀྱང་མ་ཡིན་ནོ། །​དེ་ཅིའི་ཕྱིར་ཞེ་ན། འཇམ་དཔལ་ལུས་ནི་བེམས་པོ་གཡོ་བ་མེད་པ་སེམས་པ་མེད་པ་སྟེ། རྩྭ་དང་། རྩིག་པ་དང་། ཤིང་དང་བོང་བ་དང་། གཟུགས་བརྙན་ལྟ་བུ་ཡིན་ལ། སེམས་ཀྱང་སྒྱུ་མ་ལྟ་བུ་སྟེ། གསོག་དང་གསོབ་དང་། ཡང་དག་པ་མ་ཡིན་པ་དང་། འདུས་མ་བྱས་པ་ཡིན་པའི་ཕྱིར་རོ། །​འཇམ་དཔལ་གང་གིས་ལུས་དང་སེམས་དེ་ལྟར་རྟོགས་པ་དེ་ནི་བྱང་ཆུབ་ཅེས་བྱ་སྟེ། འཇམ་དཔལ་དེ་ཡང་ཐ་སྙད་ལ་བརྟེན་པ་ཡིན་གྱི་དོན་དམ་པར་ནི་མ་ཡིན་ནོ། །​དེ་ཅིའི་ཕྱིར་ཞེ་ན། འཇམ་དཔལ་བྱང་ཆུབ་ནི་ལུས་དང་སེམས་དང་ཆོས་དང་ཆོས་མ་ཡིན་པ་དང་། ཡང་དག་པ་དང་ཡང་དག་པ་མ་ཡིན་པ་དང་། བདེན་པ་དང་བརྫུན་པས་བརྗོད་པར་བྱ་བ་མ་ཡིན་པའི་ཕྱིར་རོ། །​འཇམ་དཔལ་བྱང་ཆུབ་ནི་ཆོས་ཐམས་ཅད་ཀྱིས་བརྗོད་པར་བྱ་བ་མ་ཡིན་པ་སྟེ། དེ་ཅིའི་ཕྱིར་ཞེ་ན། འཇམ་དཔལ་བྱང་ཆུབ་ལ་ནི་གང་གིས་ཚིག་དང་ཐ་སྙད་འཇུག་པར་འགྱུར་བའི་གནས་ཅུང་ཟད་ཀྱང་མེད་པའི་ཕྱིར་རོ། །​འཇམ་དཔལ་འདི་ལྟ་སྟེ་དཔེར་ན། ནམ་མཁའ་ནི་གནས་མེད་པ། འདུས་མ་བྱས་པ། མ་སྐྱེས་པ། མ་འགགས་པ། བརྗོད་པར་བྱ་བ་མ་ཡིན་པའོ། །​འཇམ་དཔལ་དེ་བཞིན་དུ་བྱང་ཆུབ་ཀྱང་གནས་མེད་པ། འདུས་མ་བྱས་པ་མ་སྐྱེས་པ། མ་འགགས་པ། བརྗོད་པར་བྱ་བ་མ་ཡིན་པའོ། །​འཇམ་དཔལ་འདི་ལྟ་སྟེ་དཔེར་ན། ཡང་དག་པར་ཡོངས་སུ་ཚོལ་བ་ན་ཆོས་ཐམས་ཅད་ཀྱིས་བརྗོད་པར་བྱ་བ་མ་ཡིན་པ་དེ་བཞིན་དུ། འཇམ་དཔལ་ཡང་དག་པར་བྱང་ཆུབ་ཡོངས་སུ་ཚོལ་བ་ན་ཡང་ཆོས་ཐམས་ཅད་ཀྱིས་བརྗོད་པར་བྱ་བ་མ་ཡིན་ནོ། །​དེ་ཅིའི་ཕྱིར་ཞེ་ན། འཇམ་དཔལ་ཡང་དག་པར་ནི་ཚིག་ནི་མ་སྐྱེས་པ་དང་། མ་འགགས་པ་ཡིན་པས་ཡོད་པ་མ་ཡིན་པའི་ཕྱིར་རོ། །​འཇམ་དཔལ་བྱང་ཆུབ་ནི་གཟུང་བ་མེད་པ་ཉིད་དང་། གནས་མེད་པ་ཉིད་ཡིན་ཏེ། འཇམ་དཔལ་དེ་ལ་གཟུང་བ་མེད་པ་ནི་གང་། གནས་མེད་པ་ནི་གང་ཞེ་ན།



The English translation of this folio by 84000 - Translating the words of the Buddha can be found at:
https://read.84000.co/translation/toh100.html?part=UT22084-047-002-427#UT22084-047-002-427