Degé Kangyur volume 47, F.294.a

མ་འོངས་པ་ལ་རྣམ་པར་ཤེས་པ་མི་རྒྱུག་པ་དང་། ད་ལྟར་བྱུང་བ་ལ་ཡིད་ལ་བྱེད་པ་མི་འབྱུང་བ་གང་ཡིན་པ་སྟེ། དེ་ནི་སེམས་དང་ཡིད་དང་། རྣམ་པར་ཤེས་པ་ལ་མི་གནས་ཤིང་རྟོག་པར་མི་བྱེད་རྣམ་པར་རྟོག་པར་མི་བྱེད་དོ། །​རྟོག་པར་མི་བྱེད་རྣམ་པར་རྟོག་པར་མི་བྱེད་པ་ནི་འདས་པ་ཡིད་ལ་མི་བྱེད། མ་འོངས་པ་ལ་རློམ་སེམས་སུ་མི་བྱེད། དེ་ལྟར་བྱུང་བ་ལ་འཕྲོ་བར་མི་བྱེད་དོ། །​འཇམ་དཔལ་བྱང་ཆུབ་ནི་ལུས་མེད་པ་ཉིད་དང་། འདུས་མ་བྱས་པ་ཉིད་ཡིན་ཏེ། འཇམ་དཔལ་དེ་ལ་ལུས་མེད་པ་ཉིད་ནི་མིག་གི་རྣམ་པར་ཤེས་པས་རྣམ་པར་ཤེས་པར་བྱ་བ་མ་ཡིན་པ་དང་། རྣ་བ་དང་སྣ་དང་ལྕེ་དང་ལུས་དང་། ཡིད་ཀྱི་རྣམ་པར་ཤེས་པས་རྣམ་པར་ཤེས་པར་བྱ་བ་མ་ཡིན་པ་གང་ཡིན་པའོ། །​འཇམ་དཔལ་སེམས་དང་ཡིད་དང་རྣམ་པར་ཤེས་པས་རྣམ་པར་ཤེས་པར་བྱ་བ་མ་ཡིན་པ་གང་ཡིན་པ་དེ་ཉིད་འདུས་མ་བྱས་པ་ཉིད་ཡིན་ཏེ། འདུས་མ་བྱས་པ་ཉིད་ཅེས་བྱ་བ་ནི་གང་ལ་སྐྱེ་བ་མེད་པ་དང་། གནས་པ་མེད་པ་དང་། འཇིག་པ་མེད་པའོ། །​དེ་ནི་འཁོར་གསུམ་ཡོངས་སུ་དག་པ་འདུས་མ་བྱས་པ་ཡིན་ཏེ། འདུས་མ་བྱས་པ་ཇི་ལྟ་བ་ཁོ་ན་བཞིན་དུ་འདུས་བྱས་ཀྱང་དེ་ལྟ་བུ་ཁོ་ན་ཡིན་པར་རྟོགས་པར་བྱའོ། །​དེ་ཅིའི་ཕྱིར་ཞེ་ན། འཇམ་དཔལ་ཆོས་ཐམས་ཅད་ཀྱི་ངོ་བོ་ཉིད་གང་ཡིན་པ་དེ་ནི་ངོ་བོ་ཉིད་མེད་པ་སྟེ། ངོ་བོ་ཉིད་མེད་པ་གང་ཡིན་པ་དེ་ལ་ནི་གཉིས་སུ་མེད་པའི་ཕྱིར་རོ། །​འཇམ་དཔལ་བྱང་ཆུབ་དེ་ནི་དབྱེར་མེད་པའི་གཞི་ཡིན་ཏེ། དེ་ལ་དབྱེར་མེད་པ་ནི་གང་། གཞི་ནི་གང་ཞེ་ན། མིང་མེད་པ་ནི་དབྱེར་མེད་པའོ། །​དེ་བཞིན་ཉིད་ནི་གཞིའོ། །​གནས་མེད་པ་ནི་དབྱེར་མེད་པའོ། །ཆོས་ཀྱི་དབྱིངས་ནི་གཞིའོ། །​ཐ་དད་པ་ཉིད་མེད་པ་ནི་དབྱེར་མེད་པའོ། །​ཡང་དག་པའི་མཐའ་ནི་གཞིའོ། །​དམིགས་པ་མེད་པ་ནི་དབྱེར་མེད་པའོ། །​གཡོ་བ་མེད་པ་ནི་གཞིའོ། །​སྟོང་པ་ཉིད་ནི་དབྱེར་མེད་པའོ། །​མཚན་མ་མེད་པ་ནི་གཞིའོ། །​རྣམ་པར་རྟོག་པ་མེད་པ་ནི་དབྱེར་མེད་པའོ། །​སྨོན་པ་མེད་པ་ནི་གཞིའོ། །​སྒྲུབ་པ་མེད་པ་ནི་དབྱེར་མེད་པའོ། །​སེམས་ཅན་མེད་པ་ནི་གཞིའོ། །​སེམས་ཅན་གྱི་ངོ་བོ་ཉིད་མེད་པ་ནི་དབྱེར་མེད་པའོ། །​ནམ་མཁའ་ནི་གཞིའོ། །​དམིགས་སུ་མེད་པ་ནི་དབྱེར་མེད་པའོ། །​སྐྱེ་བ་མེད་པ་ནི་གཞིའོ། །​འགག་པ་མེད་པ་ནི་དབྱེར་མེད་པའོ། །​འདུས་མ་བྱས་ནི་གཞིའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh100.html?part=UT22084-047-002-426#UT22084-047-002-426