།གཞོན་ནུ་ལྐུགས་འཕྱེ་རྐང་པས་གྲོང་ཁྱེར་དུ་འཇུག་པ་ན་ཡ་མཚན་སྐྱེས་པའི་སྲོག་ཆགས་བརྒྱ་སྟོང་ཕྲག་དུ་མ་དག་ཀྱང་འདུས་སོ། །དེ་ནས་གཞོན་ནུ་ལྐུགས་འཕྱེས་རྐང་གིས་གྲོང་ཁྱེར་དུ་ཞུགས་ནས་རྒྱལ་པོ་ཚངས་སྦྱིན་གང་ན་བ་དེར་སོང་སྟེ་ཕྱིན་པ་དང་། རྒྱལ་པོ་ཚངས་སྦྱིན་གྱི་རྐང་པ་གཉིས་ལ་གཏུགས་ནས། དེའི་ཚེ་ཚིགས་སུ་བཅད་དེ་སྨྲས་པ། མི་དབང་བདག་ནི་ལྐུགས་འཕྱེ་དང་། །བླུན་པོ་བློ་མི་ལྡན་མ་ལགས། །རྣམ་པར་གསལ་བར་བགྱིད་པ་ཡི། །ཚིག་གིས་གསལ་བར་བགྱིད་པ་ལགས། །མི་དབང་བདག་ནི་ལྐུགས་འཕྱེ་དང་། །བླུན་པོ་བློ་མི་ལྡན་མ་ལགས། །དབང་པོ་རྣམས་ནི་ཚང་བ་དང་། །གསལ་བ་དག་དང་ལྡན་པ་ལགས། །རྒྱལ་པོས་སྨྲས་པ། བུ་ཅིའི་ཕྱིར་ཚིག་མི་འབྱིན་ཅིང་རྐང་གིས་མི་འགྲོ། ལྷ་དེའི་སླད་ནས་གསོན་ཅིག །བདག་གིས་སྔོན་གྱི་ཚེ་རབས་དྲན། །ལོ་ནི་དྲུག་བཅུའི་བར་དག་ཏུ། །མི་ཡི་ནང་དུ་རིགས་བརྒྱུད་པའི། །རྒྱལ་ཚབ་བདག་གིས་བགྱིས་པ་གང་། །ལོ་ནི་དྲུག་ཁྲིའི་བར་དག་ཏུ། །དམྱལ་བའི་ནང་དུ་མི་བཟད་སྨིན། །དམྱལ་བའི་སྡུག་བསྔལ་མི་བཟད་པ། །དྲག་པོ་འཇིགས་བྱེད་དེ་དྲན་ནས། །དམྱལ་བར་ཡང་མཆི་མི་རུང་བས། །རྒྱལ་སྲིད་ལ་ནི་མངོན་མི་དགའ། །ཡབ་གཅིག་གནང་བར་མཛོད་ཅིག་དང་། །ད་ནི་རབ་ཏུ་དབྱུང་བར་བགྱི། །རྒྱལ་པོས་སྨྲས་པ། བུ་དྲང་སྲོང་རྣམས་ཀྱིས་གང་དཀའ་ཐུབ་ཅུང་ཟད་ཅི་བྱས་པ་དང་། མཆོད་སྦྱིན་དང་སྦྱིན་སྲེག་ཅི་བྱས་པ་དེ་དག་ཐམས་ཅད་ནི་རྒྱལ་སྲིད་ཀྱི་ཕྱིར་ཡིན་ན་ཁྱོད་ཅིའི་ཕྱིར་རྒྱལ་སྲིད་ལག་མཐིལ་དུ་འོངས་པ་སྤངས་ཏེ་རབ་ཏུ་འབྱུང་། དེ་ནས་གཞོན་ནུ་ལྐུགས་འཕྱེས་དེའི་ཚེ་ཚིགས་སུ་བཅད་དེ་སྨྲས་པ། ཀིམ་པའི་འབྲས་བུ་འདྲ་བ་ཡི། །འདོད་པ་རྣམས་ལ་སྤྱོད་མི་འཚལ། །བདུད་རྩིའི་འབྲས་བུའི་རོ་ལྟ་བུའི། །ཚངས་པར་སྤྱོད་པ་སྤྱད་པར་བགྱི། །རྒྱལ་པོས་སྨྲས་པ། བུ་བདེ་བ་གང་ཅི་ཉམས་སུ་མྱོང་བ་དེ་ཐམས་ཅད་རྒྱལ་སྲིད་ཀྱི་ཡིན་ན། ཅིའི་ཕྱིར་ཁྱོད་རྒྱལ་སྲིད་ཀྱི་བདེ་བ་སྤངས་ཏེ་རབ་ཏུ་འབྱུང་། གཞོན་ནུ་ལྐུགས་འཕྱེས་དེའི་ཚེ་ཚིགས་སུ་བཅད་དེ་སྨྲས་པ། གང་ལས་སྡུག་བསྔལ་རབ་འབྱུང་བའི། །བདེ་དེ་བདེའོ་སྙམ་མི་བགྱིད། །གང་ལས་བདེ་བ་རབ་སྐྱེ་བའི། །སྡུག་བསྔལ་སྡུག་བསྔལ་སྙམ་མི་བགྱིད། །ཡབ་གཅིག་བདག་ལ་གནང་བར་མཛོད།