།ལྷ་བཀའ་བཞིན་འཚལ་ཞེས་གཤེད་མ་པའི་མི་རྣམས་ཀྱིས་གཞོན་ནུ་ལྐུགས་འཕྱེ་ཤིང་རྟར་བཅུག་ནས་དུར་ཁྲོད་ཆེན་པོ་གང་ན་བ་དེར་སོང་སྟེ་ཕྱིན་པ་དང་དེར་བརྐོ་བར་བརྩམས་སོ། །དེ་ནས་གཞོན་ནུ་ལྐུགས་འཕྱེས་ཚིགས་སུ་བཅད་དེ་སྨྲས་པ། ཁ་ལོ་སྒྱུར་ཁྱོད་ཅི་ཡི་ཕྱིར། །དོང་ནི་མྱུར་དུ་རྐོ་བྱེད་པའི། །དོང་དེ་ཅི་བྱ་ཞེས་དྲི་ཡིས། །མྱུར་དུ་ང་ལ་སྨྲ་བར་གྱིས། །ཁ་ལོ་སྒྱུར་བས་སྨྲས་པ། རྒྱལ་པོའི་སྲས་པོ་བཙས་པ་ནི། །ཞ་བོ་ལྐུགས་པ་སྨྲ་མི་ཤེས། །དེས་འདི་ཚལ་ཁྲོད་མྱུར་དུ་ནི། །དོང་རྐོས་ཆུག་ཅེས་བཀའ་སྩལ་ཏོ། །དེ་ནས་གཞོན་ནུ་ལྐུགས་འཕྱེ་འདི་སྙམ་དུ་སེམས་ཏེ། འདི་དག་ནི་གདུག་པ། ལག་དམར་བ། གསོད་པ་དང་། གཅོད་པ་ལ་ཆགས་པ། གཞན་གྱི་སྲོག་འཕྲོག་པ། ཕ་རོལ་གྱི་སྲོག་གཅོད་པས་འཚོ་བར་བྱེད་པ་ཡིན་ནོ་སྙམ་ནས། དེ་འཇིགས་ཤིང་བརྒྱ་ལ་ན་འདི་དག་གིས་བདག་གསད་པར་འགྱུར་རོ། །སྙམ་དུ་རིག་ནས་གཤེད་མ་པ་རྣམས་ལ་སྨྲས་པ། ལྷས་གལ་ཏེ་བདག་ལ་མཆོག་ཅིག་གནང་ན་བདག་རྐང་གིས་གྲོང་ཁྱེར་དུ་འཇུག་ཅིང་ཚིག་ཀྱང་སྨྲའོ། །གཤེད་མ་པའི་མི་རྣམས་ཀྱིས་རྒྱལ་པོའི་དྲུང་དུ་སོང་ནས་རྒྱས་པར་སྨྲས་པ་དང་། རྒྱལ་པོས་སྨྲས་པ། གལ་ཏེ་གཞོན་ནུ་རྒྱལ་སྲིད་འདོད་ན་ཡང་ངས་དེ་ཡང་གཞོན་ནུ་ལ་སྦྱིན་བར་བྱའོ། །དེ་ནས་རྒྱལ་པོ་ཚངས་སྦྱིན་ཡིད་དགའ་ཞིང་། ཡིད་དགའ་ནས། བློན་པོ་རྣམས་ལ་བསྒོ་བ། ཤེས་ལྡན་དག་དེང་ལ་གྲོང་ཁྱེར་ཐམས་ཅད་རྡོ་བ་དང་། གསེག་མ་དང་། གྱོ་མོ་རྣམས་མྱུར་དུ་སོལ་ལ་པོག་གི་དུད་པ་དང་ཕྱེ་མས་འཁྲིགས་པར་བྱོས་ཏེ་རྒྱལ་མཚན་དང་བ་དན་བསྒྲེང་ལ། མེ་ཏོག་སྣ་ཚོགས་ཀྱི་སིལ་མ་ཁྲོམ་ཤིག་ཅེས་བསྒོའོ། །ས་བདག་རྣམས་ནི་ཚིག་གིས་འགྲུབ་ལ། ལྷ་རྣམས་དང་། རྣལ་འབྱོར་པ་རྣམས་ནི་སེམས་བསྐྱེད་མ་ཐག་ཏུ་ཐམས་ཅད་འགྲུབ་ཅེས་བྱ་བས་ལྷ་བཀའ་བཞིན་འཚལ་ཞེས་བློན་པོ་རྣམས་ཀྱིས་རྒྱལ་པོ་ལས་མཉན་ནས་གྲོང་ཁྱེར་ཐམས་ཅད་རྡོ་བ་དང་། གསེག་མ་དང་། གྱོ་མོ་རྣམས་བསལ་ཅིང་། པོག་གི་དུད་པ་དང་ཕྱེ་མས་འཁྲིགས་པར་བྱས་ནས་རྒྱལ་མཚན་དང་བ་དན་བསྒྲེང་སྟེ། མེ་ཏོག་སྣ་ཚོགས་ཀྱི་སིལ་མ་བཀྲམ་མོ། །གཞོན་ནུ་ལྐུགས་འཕྱེ་རྐང་པས་གྲོང་ཁྱེར་དུ་འཇུག་པ་ན་ཡ་མཚན་སྐྱེས་པའི་སྲོག་ཆགས་བརྒྱ་སྟོང་ཕྲག་དུ་མ་དག་ཀྱང་འདུས་སོ།