།ཡབ་གཅིག་བདག་ལ་གནང་བར་མཛོད། །དཀའ་ཐུབ་ནགས་སུ་མཆི་བར་བགྱི། །རྒྱལ་པོས་སྨྲས་པ། བུ་རེ་ཞིག་ཁང་བཟངས་ཀྱི་གཞི་པོག་གི་དུད་པ་དང་ཕྱེ་མས་འཁྲིགས་པ་དང་། མེ་ཏོག་སྣ་ཚོགས་བཀྲམ་པར་མལ་འཇམ་པོ་སྟེང་གཡོགས་བཟང་པོ་ཅན་བཤམས་ལ་གང་ནས་ཀྱང་འཇིགས་པ་མེད་པར་ནི་ཉལ། རོལ་མོའི་སྒྲ་སྙན་པས་ནི་སད། གོས་འཇམ་པོ་ནི་བགོ། ཟས་ཞིམ་པོ་ནི་ཟ། བཏུང་བ་ཞིམ་པོ་ནི་བཏུང་བར་བྱའོ། །དགོན་པར་ནི་རབ་ཏུ་བྱུང་བས་རྟག་ཏུ་ཤིང་དྲུང་དུ་རྩྭའི་གདིང་བ་དང་། ལོ་མའི་གདིང་བ་ལ་འཇིགས་ཤིང་བག་ཚ་བའི་སེམས་ཀྱིས་གཅན་གཟན་གདུག་པ་རྣམས་དང་ལྷན་ཅིག་ཉལ། ཅེ་སྤྱང་གི་སྒྲས་ནི་སད། གཡང་གཞི་དང་། ཤིང་ཤུན་གྱི་གོས་ནི་གྱོན། རྩ་བ་དང་། འབྲས་བུ་ནི་ཟ། ཆུ་དྲོན་པོ་དང་། ཆུ་རྙོག་པ་ཅན་གྱི་བཏུང་བ་ནི་བཏུང་དགོས་ན་ཁྱོད་ཅིའི་ཕྱིར་རྒྱལ་སྲིད་སྤངས་ཏེ་རབ་ཏུ་འབྱུང་། དེ་ནས་གཞོན་ནུ་ལྐུགས་འཕྱེས་དེའི་ཚེ་ཚིགས་སུ་བཅད་དེ་སྨྲས་པ། ནགས་ན་ཤིང་ཤུན་གཡང་གཞི་གྱོན་ཞིང་འབྲས་བུ་ཟ། །གཅན་གཟན་གདུག་པ་རྣམས་དང་ལྷན་ཅིག་འདུག་པ་བླའི། །མཁས་པ་འཇིག་རྟེན་ཕ་རོལ་དག་གིས་འཇིགས་པ་ཡིས། །རྒྱལ་སྲིད་ཕྱིར་ནི་གསོད་དང་རྡེག་དང་འཆིང་མི་རུང་། །ཡབ་གཅིག་བདག་ལ་གནང་བར་མཛོད། །དཀའ་ཐུབ་ནགས་སུ་མཆི་བར་བགྱི། །རྒྱལ་པོས་སྨྲས་པ། བུ་རེ་ཞིག་ངའི་ཐེ་ཚོམ་གསུམ་པོ་འདི་དག་ཆོད་ཅིག་དང་དེའི་འོག་ཏུ་ཁྱོད་རབ་ཏུ་འབྱུང་བ་མི་དཀའ་བར་འགྱུར་རོ། །གང་ཁྱོད་ཀྱིས་བཱ་རཱ་ཎ་སཱིའི་འབྱོར་ཅིང་རྒྱས་པ་མཐོང་ནས། བཱ་རཱ་ཎ་སཱི་འདི་ཅི་སྟོང་པ་ཡིན་ནམ། འོན་ཏེ་གནས་པ་ཞིག་ཡོད་ཅེས་སྨྲས་པ། དེ་ཁྱོད་ཀྱིས་ཅི་ཞིག་ལས་བསམས་ཏེ་སྨྲས། ལྷ་དེའི་སླད་དུ་གསོན་ཅིག །ལྷས་བདག་ནོངས་པ་མ་མཆིས་པར་འགུམ་པར་བཀའ་སྩལ་པ། འགས་ཀྱང་གཞོན་ནུ་འདི་ཅིའི་ཕྱིར་གསད་ཅེས་ཆོས་ཀྱི་ཚིག་མ་སྨྲས་པ་དེ་ལས་བསམས་ཏེ་བདག་གིས་སྨྲས་ལགས་སོ། །བཟང་ངོ་། །གང་ཁྱོད་ཀྱིས་མི་རོ་མཐོང་ནས་ཅི་འདི་ཤི་བ་ཉིད་ཤིའམ། འོན་ཏེ་གསོན་པོ་ཤི་ཞེས་སྨྲས་པ་དེ་ཅི་ལས་བསམས་ཏེ་སྨྲས། ལྷ་དེའི་སླད་དུ་གསོན་ཅིག