འདུལ་བ་གཞི། བམ་པོ་བཞི་བཅུ་རྩ་གཅིག་པ། དེ་ནས་རྒྱལ་པོ་ང་ལས་ནུ་འདི་སྙམ་དུ་སེམས་ཏེ། བདག་ལ་འཛམ་བུའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་གང་བ་ཡང་ཡོད། བདག་གི་ཕོ་བྲང་གི་ནང་དུ་ཡང་རིན་པོ་ཆེའི་ཆར་ཞག་བདུན་དུ་བབ། བདག་གིས་ཤར་གྱི་ལུས་འཕགས་ཀྱི་གླིང་དུ་ཡང་ཕྱིན། ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་བདག་གིས་ཤར་གྱི་ལུས་འཕགས་ཀྱི་གླིང་དུ་རྗེས་སུ་བསྟན་ན། ནུབ་ཀྱི་བ་ལང་སྤྱོད་ཅེས་བྱ་བའི་གླིང་ཞིག་ཡོད་ཅེས་གྲག་གིས། མ་ལ་བདག་དེར་ཡང་སོང་ལ་རྗེས་སུ་བསྟན་པར་བྱའོ་སྙམ་པ་དང་། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུ་དཔུང་གི་ཚོགས་བྱེ་བ་བརྒྱད་འབུམ་དང་ཐབས་ཅིག་ཏུ་བུ་སྟོང་གིས་ཡོངས་སུ་བསྐོར་ནས་མདུན་ནས་འགྲོ་བ་རིན་པོ་ཆེ་སྣ་བདུན་དང་སྟེང་གི་ནམ་མཁའ་ལ་འཕགས་ཏེ། རྒྱལ་པོ་ང་ལས་ནུ་ནུབ་ཀྱི་བ་ལང་སྤྱོད་ཀྱི་གླིང་དུ་ཆས་ནས་རྒྱལ་པོ་ང་ལས་ནུ་ནུབ་ཀྱི་བ་ལང་སྤྱོད་ཀྱི་གླིང་དུ་གནས་ཏེ། རྒྱལ་པོ་ང་ལས་ནུས་ཇི་ལྟར་སེམས་ཅན་བསོད་ནམས་བྱས་པ། དགེ་བ་བྱས་པ། མཐུ་ཆེན་པོ། རྫུ་འཕྲུལ་ཆེན་པོས་རང་གི་བསོད་ནམས་ཀྱི་འབྲས་བུ་ཉམས་སུ་མྱོང་བ་ལྟར་ནུབ་ཀྱི་བ་ལང་སྤྱོད་ཀྱི་གླིང་དུ་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་རྗེས་སུ་བསྟན་པར་བྱས་སོ། །དེ་ནུབ་ཀྱི་བ་ལང་སྤྱོད་ཀྱི་གླིང་ན་རྗེས་སུ་སྟོན་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །ཡང་རྒྱལ་པོ་ང་ལས་ནུས་གནོད་སྦྱིན་ལྷ་གནས་ལ་སྨྲས་པ། བཀའ་འོག་ཏུ་མ་ཆུད་པའི་གླིང་གཞན་འགའ་ལྟ་ཡོད་དམ། ལྷ་གནས་ཀྱིས་སྨྲས་པ། ལྷ་བྱང་གི་སྒྲ་མི་སྙན་ཅེས་བགྱི་བའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་། མི་མང་པོས་གང་ལ། གཞན་ཡང་མི་དེ་དག་ནི་བདག་གིར་བགྱི་བ་མ་མཆིས་པ། ཡོངས་སུ་འཛིན་པ་མ་མཆིས་པ་ཞིག་མཆིས་ཀྱིས། ཀྱེ་མ་ལྷ་དེར་ཡང་གཤེགས་ཏེ། ཉིད་ཀྱི་དཔུང་གི་ཚོགས་རྣམས་ལ་རྗེས་སུ་བསྟན་དུ་གསོལ། དེ་ནས་རྒྱལ་པོ་ང་ལས་ནུ་འདི་སྙམ་དུ་སེམས་ཏེ།