དེ་ནས་རྒྱལ་པོ་ང་ལས་ནུ་འདི་སྙམ་དུ་སེམས་ཏེ། བདག་ལ་འཛམ་བུའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་གང་བ་ཡང་ཡོད། བདག་གི་ཕོ་བྲང་གི་ནང་དུ་ཡང་རིན་པོ་ཆེའི་ཆར་ཞག་བདུན་དུ་བབ། བདག་ཤར་གྱི་ལུས་འཕགས་ཀྱི་གླིང་དུ་སོང་སྟེ་ཡང་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་བདག་གིས་ཤར་གྱི་ལུས་འཕགས་ཀྱི་གླིང་དུ་རྗེས་སུ་བསྟན། བདག་ནུབ་ཀྱི་བ་ལང་སྤྱོད་ཀྱི་གླིང་དུ་ཡང་སོང་སྟེ་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་བདག་གིས་ནུབ་ཀྱི་བ་ལང་སྤྱོད་ཀྱི་གླིང་དུ་རྗེས་སུ་བསྟན་ན། བྱང་གི་སྒྲ་མི་སྙན་ཅེས་བྱ་བའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་རབ་ཏུ་གང་ལ། གཞན་ཡང་མི་དེ་དག་ནི་བདག་གིར་བྱ་བ་མེད་པ། ཡོངས་སུ་འཛིན་པ་མེད་པ་ཞིག་ཡོད་ཅེས་གྲག་གིས། མ་ལ་བདག་དེར་ཡང་སོང་ལ་རང་གི་དཔུང་གི་ཚོགས་ལ་རྗེས་སུ་བསྟན་པར་བྱའོ་སྙམ་པ་དང་། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུ་དཔུང་གི་ཚོགས་བྱེ་བ་བརྒྱད་འབུམ་དང་ཐབས་ཅིག་ཏུ་བུ་སྟོང་གིས་ཡོངས་སུ་བསྐོར་ནས་མདུན་ནས་འགྲོ་བ་རིན་པོ་ཆེ་སྣ་བདུན་དང་ནམ་མཁའ་ལ་འཕགས་ཏེ་ཆས་པ་དང་། རྒྱལ་པོ་ང་ལས་ནུས་རི་རབ་ཀྱི་ངོས་ལོགས་ནས་ས་ཕྱོགས་དཀར་ཞིང་དཀར་བ་དག་མཐོང་ངོ་། །མཐོང་ནས་ཀྱང་གནོད་སྦྱིན་ལྷ་གནས་ལ་སྨྲས་པ། ལྷ་གནས་ས་ཕྱོགས་དཀར་ཞིང་དཀར་བ་ཕ་བི་ཅི་ཞིག་ཡིན། ལྷ་དེ་ནི་བྱང་གི་སྒྲ་མི་སྙན་གྱི་མི་རྣམས་ཀྱི་མ་རྨོས་མ་བཏབ་པའི་འབྲས་སཱ་ལུའི་འབྲུ་ལགས་ཏེ། འདི་ལྟར་བྱང་གི་སྒྲ་མི་སྙན་པའི་མི་རྣམས་ནི་མ་རྨོས་མ་བཏབ་པའི་འབྲས་སཱ་ལུའི་འབྲུ་ལ་ལོངས་སྤྱོད་པ་ལགས་པས་ལྷ་ཡང་དེར་ཡང་གཤེགས་ནས་མ་རྨོས་མ་བཏབ་པའི་འབྲས་སཱ་ལུའི་འབྲུ་ལ་ལོངས་སྤྱོད་པར་འགྱུར་ལགས་སོ། །རྒྱལ་པོ་ང་ལས་ནུས་ཐོས་ནས་ཀྱང་བློན་པོ་རྣམས་ལ་སྨྲས་པ། སྣ་བོ་དག་ཁྱེད་ཀྱིས་ས་ཕྱོགས་དཀར་ཞིང་དཀར་བ་དག་མཐོང་ངམ། ལྷ་མཐོང་ལགས་སོ།